2 Timoci 3 - Ai Vola Tabu (Vakadewa Makawa Vakavoutaki 2021)

Na Biu Vakatikitiki ni Kalou e na Gauna e Muri

¹ Mo kila talega na ka oqo, ni na yaco mai na veika dredre eso e na gauna e muri.

² Na tamata era na daulomani ira walega na tamata, era na dauvinakata nai lavo, era na daubole, era na viavialevu, era na dauvosavakacaca, era na talaidredre kivei ira na nodra qase, era na sega ni vakavinavinaka, era na sega ni yalosavasava,

³ era na caca veiwekani, era na dauyalayala ka lasu tale, era na dauveibeitaki vakailasu, era na sega ni daurawa na yalodra, era na daucudrucudru, era na daucati ira na tamata vinaka,

⁴ era na dauveisoliyaki me mate, era na qaqa sodrosodro, era na yalolevu, era na lomana vakalevu na marau a ra na lomani koya na Kalou vakalailai,

⁵ sa nodra ga na lotu vakarairai, ka sega vei ira na kena dina. Mo lako tani mai vei ira era sa vakaoqo!

⁶ Ni sa vakakina ko ira era sa curu vakailawaki ki na veivale eso, a ra sa daurawai ira na yalewa sesewa sa bini tu vei ira nai valavala ca, era sa vakagolei vakatani e na gagadre ca e vuqa,

⁷ era sa dauvakatavulici tiko, ka sega ni rawata me ra kila na ka dina.

⁸ Sa vakataki Jani kei Jabari ko ira oqo ni rau sa qati Mosese, era sa qatia vakakina na ka dina; a tamata lomaqeleqelewa, a sa sega ni vinakati na nodra vakabauta.

⁹ Ia era na sega ni tubu cake me levu, ena vakavotui vei ira kecega na tamata na nodra sesewa, me vaka na nodrau oqori.

Nai Otioti ni Vakaro vei Timoci

¹⁰ Ia ko iko, ko sa dau muria na noqu i vakavuvuli, na noqu i valavala, na noqu i naki, na noqu vakabauta, na noqu vosota vakadede, na noqu loloma, na noqu vosota na ca,

¹¹ na veivakacacani, na veivakararawataki; na ka sa yaco vei au mai Anitioki, mai Ikoniona, mai Lisitira; na kena levu ni veivakacacani ka'u a vosota; ia ka sa vakabulai au na Turaga mai na ka kecega oqo,

¹² Io, ko ira kecega era na via lotu dina vei Karisito Jisu, era na vakacacataki.

¹³ Ia ko ira na tamata ca kei ira na dauveitemaki, era na tubu cake me ra ca sara, ni ra sa ia na dauveivakacalai, ka ra sa vakacalai talega ko ira.

¹⁴ Ia ko iko, mo tudei e na ka ko a vakatavulici kina, a ka sa vakadinadinataki vei iko, ni ko sa kila se ko cei sa vakatavulici iko;

¹⁵ ni ko sa kila nai Vola tabu, ni ko a gone, oqori sa vakavukui iko rawa mo bula ni ko sa vakabauti Karisito Jisu.

¹⁶ Sai koya na Kalou sa vakavuna nai Vola Tabu kecega, ka sa yaga oqo mei vakavuvuli, me vunauca na ca, me ia kina na veivakadodonutaki, me ia kina na vakatavuvuli e na ka e dodonu,

¹⁷ me yaco kina na tamata ni Kalou me vakarau tu, ni sa vakarautaki ki nai valavala vinaka kecega.