2 Samuela 6 - Ai Vola Tabu (Vakadewa Makawa Vakavoutaki 2021)

Sa Kauta mai ko Tevita na Kato ni Kalou ki Jerusalemi

¹ A sa vakasoqoni ira vata tale ko Tevita na tamata digitaki kecega, e le tolu na oba (30,000), mai vei ira na Isireli.

² A sa ia ko Tevita, kei ira kecega na tamata era sa tiko vata kaya, ka lako yani mai Peali e Juta, ka me kauta cake mai kea na kato ni Kalou, sa vakayacani e na yaca i Jiova-ni-lewevuqa, o koya sa tiko e na tadrua ni jerupi.

³ A ra sa vakavodoka na kato ni Kalou ki na dua na qiqi-ni-yaya vou, a ra sa kauta mai na vale i Epinatapi mai Kipea. A sa tubera na qiqi-ni-yaya vou ko Usa kei Eiio, oi rau na luve i Epinatapi.

⁴ A ra sa kauta mai na vale i Epinatapi mai Kipea, a ra sa lako vata kei na kato ni Kalou, ka sa liutaka na kato ko Eiio.

Ko Usa kei na Kato ni Kalou

⁵ Ia era sa qiriqiri e na mata i Jiova ko Tevita kei na vale kecega i Isireli, e na ka ni meke kecega sa caka e na kau damanu, io e na api, kei na soliteri, kei na tibereli, kei na sibali kei na kasitaneti.

⁶ Ia ni ra sa yaco ki na rara ni samu sila nei Nakoni, sa dodoka na ligana ki na kato ni Kalou ko Usa ka taura, ni ra sa tarabe na bulumakau.

⁷ A sa waqa na cudru i Jiova vei Usa, ka sa yaviti koya mai kea na Kalou e na vuku ni nona cala, ka sa mate mai kea ko koya e na yasa ni kato ni Kalou.

⁸ A sa rarawa ko Tevita, ni sa yaviti Usa ko Jiova. A sa vakayacana na tikina ko ya, ko Peresi-usa, ka yacova na siga oqo.

⁹ A sa rere vei Jiova ko Tevita e na siga ko ya, ka kaya, “Ena kau vakacava mai vei au na kato i Jiova?”

¹⁰ A sa sega kina ni via kauta vua ko Tevita na kato i Jiova ki na koro i Tevita. Ia sa kauta vakatikitiki ga ko Tevita ki na vale i Opeti-itomi na kai Kaca.

¹¹ A sa tiko na kato i Jiova e na vale i Opeti-itomi na kai Kaca ka vula tolu, ka sa vakalougatataki Opeti-itomi ko Jiova, kei iratou kecega na nona lewe-ni-vuvale.

¹² A sa tukuni vei Tevita na tui, ka vaka, “Sa vakalougatataka ko Jiova na vale i Opeti-itomi, kei na nona ka kecega, e na vuku ni kato ni Kalou.” A sa lako kina ko Tevita, ka kauta cake e na yalo mamarau na kato ni Kalou mai na vale i Opeti-itomi ki na koro i Tevita.

¹³ Ia ni ra sa lako tu ka kalawa vakaono ko ira ka colata na kato i Jiova, sa cabora e dua na bulumakau kei na dua na manumanu uro ko koya.

¹⁴ Ka sa tabalaka na meke ko Tevita e na mata i Jiova e na nona i gu taucoko. A sa vauca voli ko Tevita e dua na efoti lineni.

¹⁵ A sa kauta cake na kato i Jiova ko Tevita, kei na matavale kece i Isireli, e na kaila kei na uvu davui.

Ko Tevita kei Mikali

¹⁶ Ia ni sa yaco ki na koro i Tevita na kato i Jiova, sa vakararai ko Mikali na luve i Saula mai na katuba-leka, ka kunei Tevita na tui ni sa ladelade ka meke tiko e na mata i Jiova, ka sa beci koya e lomana.

¹⁷ A ra sa kauta na kato i Jiova, ka tauca e na kena tikina, e loma ni valelaca ka birika ko Tevita me tu kina. A sa vakacabora ko Tevita eso nai soro kama ka so nai soro ni veivinakati e na mata i Jiova.

¹⁸ Ia ni sa vakacabora oti ko Tevita nai soro kama kei nai soro ni veivinakati, sa vosavakalougatataki ira na tamata ko koya, e na yaca i Jiova-ni-lewevuqa.

¹⁹ A sa vota vei ira kecega na tamata, io vei ira na lewe vuqa kecega na Isireli, na tagane kei na yalewa, ki na tamata yadua e dua nai buli madrai, kei na tiki ni lewe ni manumanu, ka dua na keke vua ni lolo. A ra sa lako yani na lewe vuqa, na tamata yadua ki na nona vale.

²⁰ A sa lesu ko Tevita me vosavakalougatataki ira na nona lewe-ni-vuvale. A sa curu yani ko Mikali na luve i Saula me tavaki Tevita, a sa kaya, “Sa lagilagi na tui Isireli edaidai, ne! O koya ka luvata na nona i sulu e matadra na vada ni nona tamata, me vaka sa luvata votu na nona i sulu e dua vei ira na tamata lialia!”

²¹ A sa kaya vei Mikali ko Tevita, “E na mata i Jiova ga, o koya ka digitaki au, ka biuti tamamu, kei na nona lewe-ni-vuvale kecega, ka lesi au me'u turaga vei ira na nona tamata ko Jiova, io vei ira na Isireli, o koya oqo ka'u na reki kina e na mata i Jiova.

²² Ia ka'u na beci au vakalevu cake, ka'u na vakamalumalumutaki au sara. Ia ko ira na vada ko sa vosa kina, era na vakarokorokotaki au tiko.”

²³ A sa sega kina ni vakaluveni ko Mikali na luve i Saula, ka yacova na siga sa mate kina.