2 Samuela 5 - Ai Vola Tabu (Vakadewa Makawa Vakavoutaki 2021)

Buli ko Tevita me Tui ni Vanua Taucoko e Isireli

¹ A ra sa lako mai kivei Tevita ki Epironi ko ira na veiyavusa kecega ni Isireli, a ra sa kaya, “Ni raica, sa suimuni kei na lewemuni dina koi keimami.

² E na gauna eliu, ni se neimami tui kina ko Saula, sai kemuni ga ka kauti ira yani ka kauti ira tale mai na Isireli. Ka sa kaya vei kemuni ko Jiova, ‘Ko iko ko na vakatawai ira na noqu tamata na Isireli, ka ko na veiliutaki vei ira na Isireli.’ ”

³ A ra sa lako mai kina vua na tui ki Epironi ko ira kecega na qase ni Isireli. A sa veiyalayalati kei ira ko koya na tui ko Tevita mai Epironi e na mata i Jiova, ka ra sa lumuti Tevita me nodra tui na Isireli.

⁴ Sa yabaki tolusagavulu ko Tevita ni sa buli me tui, ka sa tui tiko ko koya me yabaki vasagavulu.

⁵ Sa nodra tui na Juta mai Epironi ka yabaki vitu ka vula ono; ka sa nodra tui na Isireli kecega kei na Juta mai Jerusalemi me yabaki tolusagavulu ka tolu.

Buli me Koroturaga ni Matanitu Cokovata ko Jerusalemi

⁶ Sa qai lako ko koya na tui kei ira na nona tamata ki Jerusalemi me ra saqati ira na Jepusaiti, nai taukei ni vanua, ko ira era a vosa vei Tevita, ka kaya, “O na sega ni curu mai ki ke, ni ko ira mada ga na mataboko kei ira na lokiloki era na vakatalai kemudou tani” — ni ra sa nanuma, “Ena sega ni lako rawa mai ki ke ko Tevita.”

⁷ Ia, sa kaba ga na koro-ni-valu ko Saioni ko Tevita ka rawa, ka sa yaco oqo me koro i Tevita.

⁸ Ni a sa kaya ko Tevita e na siga ko ya, “O koya ga ena yaviti ira na Jepusaiti, me qai lakova cake nai keli-wai me yaviti ira ‘na mataboko kei na lokiloki’, ko ira ka sa cata ko Tevita.” O koya oqo era sa kaya kina, “Ena sega ni curu mai ki vale ko ira na mataboko kei na lokiloki.”

⁹ A sa tiko ko Tevita e na koro-ni-valu ko ya, ka vakatoka, Na koro i Tevita. A sa tara voli na koro ko Tevita mai Milo ka kauta ki loma.

¹⁰ A sa kaukauwa cake tikoga ko Tevita, ni sa tiko vata kei koya ko Jiova na Kalou-ni-lewevuqa.

¹¹ Ia ko Irami na tui Taia, sa tala vei Tevita eso na tamata, ka vakauta eso na kau sitari; ka tala eso na matai-ni-kau, ka so na matai-ni-vatu; a ra sa tara e dua na vale nei Tevita.

¹² A sa kila ko Tevita ni sa vakataudeitaki koya ko Jiova me nodra tui na Isireli, ka sa vueta cake na nona matanitu e na vukudra na nona tamata na Isireli.

¹³ A sa kauta vua ko Tevita eso tale me watina lalai ka so me watina dina mai Jerusalemi, ni sa biuti Epironi, ka sa sucu tale eso na luvena tagane kei na luvena yalewa.

¹⁴ Ia oqo na yacadratou na luvena eratou sa sucu mai Jerusalemi: ko Samua, kei Sopapi, kei Necani, kei Solomoni,

¹⁵ kei Ipiari, kei Ilisua, kei Nefeki, kei Jafia,

¹⁶ kei Ilisama, kei Elaiata, kei Ilifeleti.

Era sa Vakamalumalumutaki na Kai Filisitia

¹⁷ Ni ra sa rogoca ko ira na kai Filisitia sa lumuti ko Tevita me nodra tui na Isireli, era sa lako cake ko ira kecega na kai Filisitia me ra qarai Tevita; a sa rogoca ko Tevita, ka sa lako sobu ki na koro-ni-valu.

¹⁸ A ra sa lako vakaivalu mai ko ira na kai Filisitia, ka ra yatuni ira e na buca ko Refeimi.

¹⁹ A sa tarogi Jiova ko Tevita, ka kaya, “Me'u lako cake vei ira na kai Filisitia, se me'u kakua? Ko ni na soli ira ki na ligaqu, se segai?” A sa kaya vei Tevita ko Jiova, “Mo lako cake ga, ni'u na soli ira vakaidina na kai Filisitia ki na ligamu.”

²⁰ A sa lako ko Tevita ki Peali-pirasimi, ka sa mokuti ira mai kea ko Tevita. Ka sa kaya, “Sa gumatua vei ira na noqu meca e mataqu ko Jiova, me vaka na kaukauwa ni waluvu.” O koya oqo sa vakayacana kina na tikina ko ya, ko Peali-pirasimi.

²¹ Ka ra sa biuta mai kea na nodra matakau ko ira na kai Filisitia, ka sa kauta tani ko Tevita kei ira na nona tamata.

²² A ra sa lako cake tale ko ira na kai Filisitia, ka ra sa yatuni tu e na buca ko Refeimi.

²³ Ni sa vakatarogi Jiova ko Tevita, a sa kaya ko koya, “Mo kakua ni lako cake; mo gole wavokiti ira ga mai dakudra, ka valuti ira ni ko sa donuya na veivuni-baka.

²⁴ Ia ni ko sa rogoca na rorogo ni tayabe e na tuvuka ni veivuni-baka oqori, mo qai vakarau; ni sa liutaki iko yani ko Jiova me mokuta na nodra mataivalu na kai Filisitia.”

²⁵ A sa kitaka vakakina ko Tevita me vaka sa vakarota vua ko Jiova, ka sa mokuti ira kina na kai Filisitia mai Kipa ka yaco sara ki Keseri.