2 Samuela 4 - Ai Vola Tabu (Vakadewa Makawa Vakavoutaki 2021)

Sa Labati ko Isiposeci

¹ Ia ni sa rogoca na luve i Saula ni sa mate ko Epineri mai Epironi, sa malumalumu na ligana, ka ra sa kidroa ko ira kecega na Isireli.

² A sa le rua na nona tamata na luve i Saula e rau turaga ni mataivalu; na yacana e dua ko Peana kei na yaca ni kenai karua ko Rekapi. Erau luve i Rimoni na kai Pieroci, o koya sa dua vei ira na kawa i Penijamini—ni sa wili vata kei Penijamini ko Pieroci.

³ (Ko ira na kai Pieroci oqo era a dro ki Kiteimi ka ra sa la'ki tiko vulagi kina ka yacova na gauna oqo).

⁴ Ia sa dua na luve i Jonacani na luve i Saula, ka sa lokiloki na yavana ruarua. Sa yabaki lima ko koya ni sa kau mai Jesireli nai rogorogo kei Saula kei Jonacani. A sa keveti koya cake na yalewa sa nona i mei, ka sa dro; ia ni sa kusarawa me dro ko koya, sa lutu na gone, ka sa lokiloki kina. Ia na yacana ko Mefiposeci.

⁵ A rau sa lako ko Rekapi kei Peana, na luve i Rimoni na kai Pieroci, ka rau sa tadu mai ni sa katakata na siga, ki na vale i Isi-poseci, a sa davo koto ko koya me vakacegu ni sa siga levu.

⁶ A rau sa curu ki loma ni vale, me vaka era via kauta na witi, ka rau sa cokai koya e na ketena. Ka rau sa dro bula ko Rekapi kei Peana na tuakana.

⁷ Ia oqo ni rau sa lako mai ki vale, sa davo ko koya e nona i mocemoce e nona vale ni moce, a rau sa mokuti koya, ka vakamatei koya, ka tamusuka na uluna, ka kauta na uluna, ka lako yani e na sala mai na buca e na bogi ko ya ka siga.

⁸ A rau sa kauta na ulu i Isi-poseci kivei Tevita ki Epironi, ka rau sa kaya vua na tui, “Ni raica, na ulu i Isi-poseci na luve i Saula na nomuni meca, o koya ka qarai kemuni mo ni mate. Sa cudruvaka ko Jiova na noqu turaga na tui vei Saula kei na nona kawa e na siga edaidai.”

⁹ A sa vosa ko Tevita vei Rekapi kei Peana na tuakana, erau luve i Rimoni na kai Pieroci, ka kaya vei rau, “Me vaka sa bula ko Jiova, o koya sa vakabula na yaloqu mai na ka rarawa kecega,

¹⁰ ni sa tukuna vei au e dua, ka vaka, ‘Raica, sa mate tu ko Saula,’ ka sa nanuma ko koya ni sa kauta mai nai tukutuku vinaka, ka'u a qai taura ka vakamatea mai Sikilaki, ka sai koya oqori na veika ka'u a cakava vua mei covi ni gusuna.

¹¹ Ia ena vakaevei li na kena levu cake, ni ra sa vakamatea e dua na tamata yalododonu e na nona vale, e na nona i kotokoto, ko ira na tamata ca? Me'u kakua beka ni taroga na kena dra mai na ligamudrau, ka muduki kemudrau tani mai vuravura?”

¹² Ka sa qai vakaroti ira na cauravou ko Tevita, ka ra sa vakamatei rau, ka muduka tani na ligadrau kei na yavadrau, ka vakarubeca ki cake mai na mata-ni-wai mai Epironi. Ia era sa kauta ga na ulu i Isi-poseci ka buluta e nai bulubulu i Epineri mai Epironi.