2 Samuela 21 - Ai Vola Tabu (Vakadewa Makawa Vakavoutaki 2021)

Sausaumi Lesu ko Tevita e Vukudra na Kai Kipioni

¹ Sa qai dua na dausiga e na gauna i Tevita, ka yabaki tolu ka veitaravi. A sa masu vei Jiova ko Tevita. Ka sa kaya ko Jiova, “E na vuku i Saula ga, kei na nona lewe-ni-vuvale dauveivakamatei ko ya, ni sa vakamatei ira na kai Kipioni ko koya.”

² A sa kacivi ira na kai Kipioni ko koya na tui, ka vosa vei ira. (Ia sa sega ni kawa i Isireli ko ira na kai Kipioni, era sa kena vo vei ira na Amoraiti. E dina ga ni sa bubului eliu vei ira ko ira na Isireli me ra vakabulai, ia sa segata ga ko Saula me vakawabokotaki ira e na nona lomakatakata e na vukudra na Isireli kei ira na Juta.)

³ A sa kaya vei ira na kai Kipioni ko Tevita, “A cava me'u kitaka e na vukumudou? Ka cava me'u cakava me kenai bulubulu, mo dou vosavakalougatataka kina nai votavota i Jiova?”

⁴ A ra sa kaya vua ko ira na kai Kipioni, “Me kakua vei keitou na siliva se na koula mai vei Saula, se vei ira na nona lewe-ni-vuvale; me kakua talega ni vakamatei e dua vei ira na Isireli e na vuku i keitou.” A sa kaya ko koya, “A ka dou sa kaya me'u na kitaka e na vukumudou?”

⁵ A ra sa kaya vua na tui, “Na tamata ka vakamatei keitou ka nakita me vakarusai keitou, me kakua kina ni dua na neimami vanua e na nodra veiyasana na Isireli—

⁶ me soli mai vei keitou e lewe vitu vei iratou na luvena tagane, ka me keitou na vakalilici iratou e na mata i Jiova mai Kipea na koro i Saula, o koya ka digitaka ko Jiova.” A sa kaya na tui, “Au na soli iratou yani.”

⁷ Ia sa maroroi Mefiposeci ko koya na tui, o koya na luve i Jonacani na luve i Saula, e na vuku ni bubului vei Jiova erau a kitaka ko Tevita kei Jonacani na luve i Saula.

⁸ A sa kauti Erimoni kei Mefiposeci ko koya na tui, oqo koi rau na tagane ka luve i Saula kei Risipa, o koya ka luve i Eya; kei iratou na lewe lima eratou tagane ka luve i Mikali, na luve i Saula ka yalewa, o iratou ka vakasucuma ko koya vei Atirieli na luve i Pasiliai na kai Miola;

⁹ ka sa soli iratou kivei ira na kai Kipioni, ka ra sa vakalilici iratou mai na ulunivanua e na mata i Jiova. A ratou sa bale vata ko iratou vituvitu, a ratou sa vakamatei e na gauna ni tamusuki sila, ka ni sa qai tekivu na tamusuki barile.

¹⁰ A sa kauta ko Risipa na luve i Eya e dua nai sulu taga ka birika e dela ni vatu levu, me tiko kina mai nai vakatekivu ni tamusuki sila, ka yacova na gauna sa tauci iratou kina na uca mai lomalagi. A sa sega ni laiva na manumanu vuka me ro vei iratou e na siga, se na manumanu ni vanua e na bogi.

¹¹ Ni sa tukuni vei Tevita na veika na kitaka ko Risipa na luve i Eya, na watina lailai i Saula,

¹² a sa lako ko Tevita ka kauta na sui i Saula, kei na sui i Jonacani na luvena, mai vei ira na kai Jepesi-kiliati, era a butakoca mai na sala ni koro mai Peci-sani, na tikina ka vakalilici rau kina ko ira na kai Filisitia, e na siga sa mokuti Saula kina mai Kilipoa ko ira na kai Filisitia.

¹³ A sa kauta cake mai kea ko koya na sui i Saula, kei na sui i Jonacani na luvena; a ra sa kumuna vata na suidratou eratou a vakalilici.

¹⁴ Ka ra sa buluta na sui i Saula kei Jonacani na luvena e na vanua nei Penijamini mai Sela, e nai bulubulu i Kisi na tamana; a ra sa kitaka na ka kecega ka vakarota ko koya na tui. Ni sa oti na ka oqo, sa qai rogoca na Kalou na kerekere e na vuku ni vanua.

Nai Valu kei Ira na Kai Filisitia

¹⁵ A ra sa vala tale ko ira na kai Filisitia kei ira na Isireli, ka sa lako sobu ko Tevita, kei ira vata kaya na nona tamata, ka ra sa vala kei ira na kai Filisitia. A sa malumalumu mai ko Tevita.

¹⁶ Ka sa dua vei ira na luve ni tamata yagolevu, ko Isipipinopi, sa tolu na drau na sikeli parasa na kena bibi ni nona moto, ka vauci tu vua nai yaragi vou, a sa nakita me vakamatei Tevita.

¹⁷ Ia sa vukei koya ko Apisai na luve i Seruwaia, ka mokuta mate na kai Filisitia. Era sa qai bubului vei Tevita ko ira na nona tamata, ka kaya, “O na sega tale ni lako kei keitou ki nai valu, mo kakua kina ni bokoca na cina i Isireli.”

¹⁸ Ni sa oti oqo, a sa dua tale nai valu kei ira na kai Filisitia mai Kopo. A sa mokuti Safi e dua vei ira na luve ni tamata yagolevu ko Sipikei na luve i Usa.

¹⁹ A sa dua tale nai valu kei ira na kai Filisitia mai Kopo, ia ko Elanani na luve i Jeere-orikimi, na kai Peceliema, sa mokuta na taci Koliaci, na kai Kaca, na dia ni nona moto sa vaka na nodra kau na dautali sulu.

²⁰ Sa dua tale nai valu mai Kaca, a sa dua na tamata yagolevu, a sa tauyaono nai qaqalo ni ligana ruarua, ka tauyaono nai qaqalo ni yavana ruarua, e ruasagavulu-ka-va ni wili vata; ko koya talega na luvena na tamata yagolevu.

²¹ Ia ni sa bolei ira na Isireli ko koya, sa mokuti koya ko Jonacani na luve i Semea, na tuakai Tevita.

²² Ko iratou na lewe va oqo e ratou kawa ni tamata yagolevu mai Kaca, ka ratou sa bale e na liga i Tevita kei na ligadratou na nona tamata.