2 Samuela 17 - Ai Vola Tabu (Vakadewa Makawa Vakavoutaki 2021)

Sa Vakabulai Tevita ko Usai

¹ A sa kaya talega vei Apisalome ko Eitofeli, “Me'u digitaka mada e le tinikarua na udolu na tamata, ka'u na ia, ka cicimuri Tevita e na bogi oqo.

² Au na vauci koya ni se ceguoca tiko ka liga malumalumu, ka'u na vakarerei koya, ka ra na dro na tamata kecega era tiko vata kaya. Au na mokuti koya duaduaga na tui,

³ ka'u na kauti ira tale mai vei iko na tamata kecega me vaka na nona sa lesu ki vale vua na watina na yalewa sa musuki. Ko sa qara ga na nona bula e duabau na tamata, ka sa na qai vakacegu na tamata kecega.”

⁴ A sa vinaka sara nai vakasala oqo vei Apisalome kei ira kece talega na qase ni Isireli.

Nai Vakasala nei Usai

⁵ A sa qai kaya ko Apisalome, “Me tei kacivi mada vakakina ko Usai na Ariki, me da rogoca talega na ka e kaya ko koya.”

⁶ A sa lako mai vei Apisalome ko Usai, ka sa vosa vua ko Apisalome, ka kaya, “Sa vosa vakaoqo ko Eitofeli; sa vakaevei, me da muria na nona vosa, se segai? Kevaka e segai, mo vosa mai ko iko.”

⁷ A sa kaya vei Apisalome ko Usai, “Sa sega ni vinaka nai vakasala sa tauca ko Eitofeli e na siga oqo.”

⁸ Sa kaya talega ko Usai, “Ko ni sa kilai tamamuni kei ira na nona tamata, ni ra sa tamata qaqa ko ira, ka sa rarawa vakalevu na yalodra, me vaka e dua na bea sa tobo na luvena mai vanua. Sa tamata vuku sara e nai valu ko tamamuni, ka na sega kina ni moce vata kei ira na tamata.

⁹ Raica, sa na vuni tu ko koya e na dua nai keli se dua tale na vanua. Ia ni na bale ko ira eso ni sa qai ia, ena kaya ko koya sa rogoca, ‘Raica, sa dua na moku levu vei ira na tamata era muri Apisalome.’

¹⁰ Ko koya mada ga e tamata kaukauwa, o koya ka sa vaka na yalo ni laione na yalona, ena waicala sara e na rere, ni sa kila ko ira kecega na Isireli ni sa tamata qaqa ko tamamuni, ka ra sa tamata kaukauwa vakakina ko ira era sa tiko vata kaya.

¹¹ Ia na noqu i vakasala me ra soqoni vata vei kemuni ko ira kecega na Isireli, mai Tani ka yaco sara ki Peri-sepa, me vaka na mata ni nuku mai matasawa na kedra lewe vuqa; ka mo ni lako talega e nai valu koi kemuni.

¹² Eda na qai vauci koya e na dua na tikina sa na kune kina ko koya, ia eda na qai sikiti koya sara me vaka sa tau ki na vanua na tegu; ia ena sega ni vo ko koya se dua vei ira kecega era tiko vata kaya.

¹³ Ni kevaka sa curu ko koya ki na dua na koro, era na qai kauta mai na dali ki na koro ko ya ko ira kecega na Isireli, ka da na yarataka ki na uciwai, ka na sega tale ni kune mai kea e dua na vatu lailai.”

¹⁴ A sa kaya ko Apisalome kei ira kecega na Isireli, “Sa vinaka na ka sa vakasalataka ko Usai na Ariki, ka ca na ka sa vakasalataka ko Eitofeli.” Ni sa lewa ko Jiova me vakawaletaka nai vakasala vinaka i Eitofeli, ka me vakayacora kina ko Jiova na ka ca vei Apisalome.

¹⁵ A sa kaya qai ko Usai kivei rau na bete, ko Setoki kei Epaiaca, “Sa vakaoqo nai vakasala i Eitofeli vei Apisalome kei ira na qase ni Isireli, ka sa vakaoqo na noqu i vakasala.

¹⁶ O koya oqo, mo drau talaki vakatotolo sara ka tukuna vei Tevita, ‘Mo kakua ni moce e na bogi edaidai e na buca mai na vanua lala, ia mo lako vakatotolo sara ki tai kadua, de sa tilomi sara na tui kei ira na tamata kecega era tiko vata kaya.’ ”

¹⁷ A rau a wawa tiko ko Jonacani kei Eiimaasi mai Eni-rokeli. A sa tiko e dua na vada sa daulako ka tukutuku vei rau, ka rau sa qai daulako ka tukuna vei Tevita na tui, ni sa tabu me rau raici ni rau sa curu ki na koro.

¹⁸ Ia sa raici rau e dua na cauravou ka tukuna vei Apisalome. Erau sa mani lako vakatotolo sara yani, ka la'ki curu ki na nona vale e dua na tamata mai Peurimi, ka sa tiko e dua nai keli-wai e nona loma ni bai. A rau a lako sobu kina.

¹⁹ A sa ia na yalewa, ka tevuka nai ubi ki na gusu ni keli-wai, ka kaburaka e delana na sila sa qaqi oti, ka sa sega ni kilai kina na ka ko ya.

²⁰ Ni ra sa lako mai vua na yalewa ki vale ko ira na tamata i Apisalome, a ra sa kaya, “Sa evei ko Eiimaasi kei Jonacani?” A sa kaya vei ira na yalewa, “Erau sa qalo kosova na uciwai.” Ia ni ra sa vakasaqaqara ka sega ni kunea, era sa lesu tale ki Jerusalemi.

²¹ Ia ni ra sa lako yani, erau sa lako cake mai na keli-wai, ka la'ki tukuna vei Tevita na tui. A rau sa kaya vei Tevita, “Mo ni cavu tu, ka lako vakatotolo sara yani ki tai kadua ni wai, ni sa vakaoqo na nona i vakasala ko Eitofeli me caka vei kemuni.”

²² A sa cavu tu ko Tevita kei ira kece na tamata era tiko vata kaya, ka ra sa qalo kosova na Joritani. Ni sa kida na mataka, sa sega ni vo e dua sa sega ni qalo kosova oti na Joritani.

²³ Ia ko Eitofeli, ni sa raica sa sega ni vakabau na ka sa tukuna ko koya, a sa vauca nai vodovodo ki na nona asa, ka sa ia, ka lako yani ki na nona vale, ki na nona koro. A sa tataunaka na nona ka kece, ka qai kunati koya; a sa mate, ka sa bulu e nai bulubulu nei tamana.

²⁴ A sa yaco ki Meeneimi ko Tevita, ka sa qalo kosova na Joritani ko Apisalome kei ira na Isireli era sa tiko vata kaya.

²⁵ A sa lesi Amasa ko Apisalome me turaga-ni-valu mei sosomi kei Joape. Ko Amasa na luvena e dua na tamata ka yacana ko Jicera, e dua na luve i Isimeli, o koya ka watina ko Apikali na luve i Neasi, na marama taci Seruwaia, na tina i Joape.

²⁶ A ra sa la'ki keba tiko ko ira na Isireli kei Apisalome e na vanua ko Kiliati.

²⁷ Ni sa yaco ko Tevita ki Meeneimi, ko Sobi na luve i Neasi mai Rapa ka nodra na luve i Amoni, kei Mekiri na luve i Amieli mai Lo-tipari, kei Pasiliai na kai Kiliati mai Rokilimi,

²⁸ eratou sa kauta eso nai mocemoce, ka so na beseni, ka so na bilo qele, na witi talega, kei na barile, kei na madrai droka, kei na sila sa tavu, ka so na pini, kei na pini tani, sa tavu,

²⁹ kei na oni, kei na uro ni wai-ni-sucu, ka so na sipi, kei na wai-ni-sucu ni bulumakau sa buli, me kei Tevita, ka me kedra na tamata era tiko vata kaya; ni ratou sa kaya, “Era sa viakana na tamata, ka ra sa malumalumu, ka viagunu mai na vanua lala.”