2 Samuela 14 - Ai Vola Tabu (Vakadewa Makawa Vakavoutaki 2021)

Lesu Tale ki Jerusalemi ko Apisalome

¹ A sa kila ko Joape na luve i Seruwaia ni sa vagolei vei Apisalome na yalona na tui.

² A sa talaki ki Tikoa ko Joape, ka kauta mai kina e dua na yalewa vuku, ka kaya vua, “Mo vakataka mada e dua sa dauyasovaka na mate, ka mo daramaka nai sulu ni lolosi. Mo kakua ni lumuti iko e na waiwai, ia mo vakataka ga na yalewa sa vakalolokutaka vakadede na mate.

³ Mo lako vua na tui, ka vosa vakaoqo vei koya.” A sa vakavulica vua na vosa me la'ki tukuna ko Joape.

⁴ Ni sa yaco yani vua na tui na yalewa ni Tikoa, sa cuva e matana ki na qele, ka vakarokoroko, ka kaya, “Mo ni veivuke, kemuni na tui.”

⁵ Ka sa kaya vua ko koya na tui, “A cava na nomu leqa?” A sa kaya ko koya, “Isa, koi au e dua na yada; sa mate na watiqu.

⁶ Ia sa le rua na luvequ tagane na nomuni vada, ka rau a veivala e na were. Sa sega ni dua me tataro, ka sa mokuta e dua ko koya nai karua, ka vakamatea.

⁷ Ia oqo, na vuvale taucoko sa tu vakaukauwa kivei au na nomuni tamata, ka ra sa kaya, ‘Mo soli koya mada ka mokuta na tacina, me keitou vakamatei koya, me kenai sau ni tacina ka vakamatea ko koya.’ Ka keitou na vakamatea talega nai kenai sosomi e muri. A ra na bokoca kina na qilaiso ni noqu buka sa vo tu, ka na sega ni laiva me vo na yaca vei koya na watiqu, se na nona kawa e dela i vuravura.”

⁸ A sa kaya vua na yalewa na tui, “Mo lako yani ki na nomu vale, ia koi au, ka'u na lewa e na vukumu.”

⁹ A sa kaya vua na tui ko koya na yalewa ni Tikoa, “Me bale vei au na kena ca, noqu turaga na tui, ka me baleta talega na vale i tamaqu; ia me kakua ni cala na tui kei na nona i tikotiko vakaturaga.”

¹⁰ A sa kaya na tui, “Kevaka sa vosa vei iko e dua na tamata, mo kauti koya mai vei au, ena qai sega ni tarai iko tale ko koya.”

¹¹ A sa qai kaya na yalewa, “Mo ni yalololoma mada na tui ka masuti Jiova na nomuni Kalou, ka me kakua ni ia tale kina na veivakamatei ko koya sa dauveisausaumitaka na dra, ka me kakua ni vakarusai kina na luvequ.” A sa kaya na tui, “Me vaka sa bula ko Jiova, ena sega ni lutu ki na qele e dua na drau ni uluna na luvemu.”

¹² Sa qai kaya na yalewa, “Ni yalovinaka me tukuna tale mada na nomuni vada e dua na vosa vei kemuni na noqu turaga na tui.” A sa kaya ko koya, “Mo vosa mai.”

¹³ A sa kaya na yalewa, “A cava ga na vuna ko ni sa nakita kina vakaoqo vei ira na tamata ni Kalou? Ni sa soli na lewa oqo, sa vakacalai koya kina na tui, ka ni sa sega ni kauta tale mai ko koya na tui na nona sa vakasevi.

¹⁴ E dodonu me da mate kece; eda sa vaka na wai sa tasova ki na qele, ni sa sega ni rawa ni takivi tale mai. Ia na Kalou ena sega talega ni kauta tani na nona bula e dua na tamata, ka sa vakarautaka na sala me vakalesui tale mai kina ko koya ka vakasevi.

¹⁵ Ia na ka oqo ka'u sa mai vosa kina vei kemuni na noqu turaga na tui, ni ra sa vakarerei au na tamata, ka sa nanuma vakaoqo na nomuni vada, ‘Au na qai vosa vua na tui; ena rairai kitaka beka na tui na ka sa kerea na nona vada.

¹⁶ Ni na rogoca na tui ka na vakabula na nona vada mai na liga ni tamata sa via vakarusai keirau vata kei na luvequ mai nai votavota ni Kalou.’

¹⁷ Sa nanuma na nomuni vada vakaoqo, ‘Na vosa ni noqu turaga na tui e na solia vei au na veivakacegui’, ni sa vaka na agilosi ni Kalou na noqu turaga na tui, me daukila na ka vinaka kei na ka ca. Me tiko vata kei kemuni ko Jiova na nomuni Kalou!”

¹⁸ A sa kaya vua na yalewa na tui, “Mo kakua mada ni vunia vei au na ka ka'u na tarogi iko kina.” A sa kaya na yalewa, “Me vosa mada mai na noqu turaga na tui.”

¹⁹ A sa kaya na tui, “Sa toka beka vei iko na liga i Joape e na ka kecega oqo, se segai?” A sa vosa ko koya na yalewa, ka kaya, “Me vaka sa bula na yalomuni, na noqu turaga na tui, sa sega ni rawa vua e dua me gole ki nai matau se ki nai mawi mai na ka kecega sa kaya na noqu turaga na tui. Ni sai koya ga na nomuni tamata ko Joape ka sa vakarota vei au, ka sa vakavulica vei au na nomuni vada na vosa kecega oqo.

²⁰ Na nona via veisautaka nai lakolako ni veika sa yaco oqo sai koya na ka sa kitaka kina na ka oqo ko Joape na nomuni tamata. Ia na noqu turaga sa vuku me vaka na nona vuku na agilosi ni Kalou me daukila kina na ka kecega e vuravura.”

²¹ Sa qai kaya vei Joape ko koya na tui, “Raica, ka'u sa vakadonuya na ka oqo; mo lako mada, mo kauta tale mai na cauravou ko Apisalome.”

²² A sa cuva vakatoboicu ki na qele ko Joape, ka vakarokoroko, ka vakavinavinaka vua na tui. Ka sa kaya ko Joape, “Sa kila edaidai na nomuni tamata ni'u sa kune loloma e matamuni, na noqu turaga na tui, ni sa vakayacora ko koya na tui na vosa ni nona tamata.”

²³ A sa ia ko Joape, ka lako yani ki Kesuri, ka kauti Apisalome mai ki Jerusalemi.

²⁴ Ka sa kaya na tui, “Me lesu yani ko koya ka tiko tani ga e na nona vale, ka me kakua ni rairai mai vei au ko koya.” A sa lesu yani ki na nona vale ko Apisalome, ka sa sega ni rairai vei koya na tui.

Sa Vosoti Apisalome ko Tevita

²⁵ Ia sa sega e dua vei ira kecega na Isireli me dauqoroi e na vuku ni nona matavinaka me vakataki Apisalome; mai na qeteqete ni yavana ka cavaraka na buradelana, sa sega na tikina e ca.

²⁶ Ia ni sa kotiva na uluna, (sa daukotiva ni sa cava na yabaki, ni sa bibi vua, sa daukotiva kina,) sa dauvakarautaka na kena bibi ni drau ni uluna, a sa rua na drau na sikeli me vaka nai vakarau ni tui.

²⁷ A sa sucu na luve i Apisalome, e le tolu na tagane, ka dua na yalewa e yacana ko Tema. A sa yalewa matavinaka ko koya.

²⁸ A bula voli mai Jerusalemi ko Apisalome me rua vinaka na yabaki, ka sega ni bau raici koya na tui.

²⁹ A sa qai talaki ko Apisalome kivei Joape, me vakauti koya mada vua na tui, ia sa bese ni lako mai vua ko Joape. A sa veitalaki tale vua ko koya e nai karua ni gauna, ia sa bese ga ni lako mai ko Joape.

³⁰ A sa qai kaya vei ira na nona tamata, “Raica, sa voleka nai teitei i Joape ki na noqu tikina, ka sa tu kina na nona barile; dou la'ki vakama mada.” A ra sa vakama nai teitei ko ira na tamata i Apisalome.

³¹ A sa ia ko Joape, ka lako vei Apisalome ki na nona vale, a sa kaya vua, “A cava era sa vakama kina na noqu i teitei na nomu tamata?”

³² A sa kaya vei Joape ko Apisalome, “Raica, ka'u a talaki vei iko ka kaya, ‘Mo lako mai ki ke, me'u talai iko vua na tui, mo kaya, “A cava beka ka'u sa lakovi kina mai Kesuri? Sa vinaka cake ke'u a tikotikoga kina.” Ia oqo, me'u raici koya mada na tui, ka kevaka sa tu vei au na ca, me vakamatei au ko koya.’ ”

³³ Sa qai lako vua na tui ko Joape, ka tukuna vua; ka sa kacivi Apisalome ko koya. A sa lako mai ko koya vua na tui, ka sa vakacuva na matana ki na qele e na mata ni tui, ka sa reguci Apisalome na tui.