2 Samuela 12 - Ai Vola Tabu (Vakadewa Makawa Vakavoutaki 2021)

Sa Vunauci Tevita ko Necani na Parofita

¹ A sa talai Necani vei Tevita ko Jiova. A sa lako vua ko koya, ka kaya vua, “Sa tiko e na dua na koro e lewe rua na tamata, e dua sa vutuniyau, ka dua sa dravudravua.

² Na tamata vutuniyau sa levu sara na nona qele ni sipi kei na nona qele ni bulumakau;

³ ia sa sega vua na tamata dravudravua e dua na ka, e dua walega na lami yalewa lailai ka volia ko koya, ka dauvakania. A sa tubu cake kaya kei iratou talega na luvena. Sa kania eso na tiki ni kena, ka sa gunu mai na mena bilo, ka sa koto e lomaserena, ka sa vaka e dua na luvena yalewa ki vua.

⁴ A sa lako vua na tamata vutuniyau e dua na tamata sa lako tu, ia sa sega ni taura ko koya e dua na nona sipi se na nona bulumakau me vakarautaka vua sa taubale voli ka sa lako mai vua, ia sa qai taura ga na nona lami na tamata dravudravua, ka vakarautaka me kena na tamata sa lako mai vua.”

⁵ A sa waqa vakalevu mai na cudru i Tevita vua na tamata. A sa kaya vei Necani, “Me vaka sa bula ko Jiova, sa dodonu me mate na tamata sa cakava na ka oqo,

⁶ ka me na sauma vakava na lami, ni sa cakava na ka oqo, ka ni sa sega vua na loloma.”

⁷ A sa kaya vei Tevita ko Necani, “Sai kemuni ga na tamata ko ya! Sa vosa vakaoqo ko Jiova na nodra Kalou na Isireli, ‘Ka'u a lumuti iko mo nodra tui na Isireli, ia ka'u a vakabulai iko mai na liga i Saula.

⁸ Au a solia talega vei iko na nona vale na nomu turaga, kei iratou na watina na nomu turaga ki na lomaseremu, au a solia talega vei iko na nodra vale na Isireli kei ira na Juta; ia kevaka sa lailai ko ya, ka'u na qai vakaikuritaka vakalevu vei iko.

⁹ A cava ko sa beca kina na vosa i Jiova, mo cakava na ka ca e matana? Ko a vakamatei Uraia na Itaiti e nai seleiwau, ka kauta na watina me watimu, ka vakamatei koya e na nodra i seleiwau na luve i Amoni.

¹⁰ Ia oqo, ena sega kina ni yali mai na nomu vale nai seleiwau, ka sega ni mudu; ni ko sa beci au, ka kauta na wati Uraia na Itaiti me watimu.’

¹¹ Sa vosa vakaoqo ko Jiova, ‘Raica, ka'u na vakatubura vei iko na ca mai na nomu vale. Ia ka'u na kauti iratou na watimu e matamu, ka solia vua na wekamu, ia ena moce vata kei iratou na watimu ko koya e na mata-ni-siga oqo.

¹² Ko a cakava vakavuni ko iko ia ka'u na cakava na ka oqo e matadra kecega na Isireli, kei na mata-ni-siga.’ ”

¹³ A sa kaya vei Necani ko Tevita, “Au sa cala vei Jiova.” A sa kaya vei Tevita ko Necani, “Sa kauta tani na nomuni valavala ca ko Jiova; ko ni na sega ni mate.

¹⁴ Ia ni kemuni sa vakavuna me ra vosavakacaca ko ira na meca i Jiova e na vuku ni ka oqo, sa na mate vakaidina talega na luvemuni sa sucu.”

¹⁵ A sa qai lako yani ko Necani ki na nona vale. A sa vakavuna ko Jiova me tauvi mate na luve i Tevita ka vakasucuma na wati Uraia, ka sa malumalumu sara.

Sa Mate na Gone e Vakasucuma ko Pacisepa

¹⁶ A sa vakamasuta na Kalou ko Tevita e na vuku ni gone. A sa lolo ko Tevita, ka curu yani ka davo koto ga e na buturara e na veibogi.

¹⁷ A sa ia ko iratou na qase ni nona vale ka la'ki tu e yasana me ra vakaduria cake mai na qele, ia sa bese ko koya, ka sega ni kana vata kei ira.

¹⁸ E nai kavitu ni siga, a sa ciba na gone. Ka ratou sa rere ni tukuna vei Tevita ko ira na nona tamata ni sa mate na gone, ni ratou sa kaya, “Raica, ni se bula tiko na gone, edatou a vosa vua, ka sega ni vakarogoca na nodatou vosa ko koya. Ena vakaevei na nona rarawa ni datou sa tukuna vua ni sa mate na gone?”

¹⁹ Ia ni sa raica ko Tevita ni ratou sa vakasolokakana tiko ko iratou na nona tamata, sa kila kina ko Tevita ni sa mate na gone. Ka sa taroga vei iratou na nona tamata ko Tevita, “Sa mate na gone, ne?” A ratou sa kaya, “Sa mate ko koya.”

²⁰ Sa qai tucake mai na qele ko Tevita, ka sili, ka lumu, ka veisautaka na nonai sulu. A sa qai la'ki curu ki na vale i Jiova, ka lotu. Sa qai lako ki na nona vale. Ia ni sa taroga me kana, sa kau mai vua na kakana, ka sa kana ko koya.

²¹ Eratou sa qai taroga vua ko iratou na nona tamata, “A cava na ka oqo ko ni sa cakava? Ni se bula tiko na gone, ko ni a lolo ka tagi e na vukuna; ia ni sa qai mate na gone, ko ni a tucake ka kana.”

²² A sa kaya ko koya, “Ni se bula tiko na gone, ka'u a lolo ka tagi, ni'u a kaya, ‘O cei e kila se na lomani au ko Jiova, se segai, me bula na gone?’

²³ Ia sa qai mate oqo ko koya. Me'u qai lolo e na vuku ni cava? Au sa rawa li ni kauti koya tale mai? Au na lako ga vua, ia ko koya ena sega ni lesu tale mai vei au.”

Sa Sucu ko Solomoni

²⁴ A sa vakacegui Pacisepa na watina ko Tevita, ka lako yani vua ka moce kaya, ka sa vakasucuma ko koya e dua na gonetagane, ka sa vakayacani koya ko Solomoni. A sa lomani koya ko Jiova,

²⁵ ka sa talai Necani na parofita ko koya; ka vakatokai kina na yacana ko Jititia [Ko koya sa lomani vei Jiova], e na vuku i Jiova.

Kabai ka Rawai na Koro ko Rapa

²⁶ Ia sa vala tiko ko Joape kei Rapa, ka nodra na luve i Amoni, a sa rawa na koro turaga ko ya.

²⁷ A sa tala eso na tamata vei Tevita ko Joape, ka kaya, “Au sa kabai Rapa, ka rawa na koro ni veiwai.

²⁸ Ia mo ni vakasoqoni ira vata na tamata sa vo, ka me buku na druadrua ni koro, ka rawa; de'u sa rawa na koro koi au, ka me vakatokai e na yacaqu.”

²⁹ A sa vakasoqoni ira vata na tamata kecega ko Tevita, ka lako ki Rapa, ka ia kina nai valu, ka rawa.

³⁰ Sa luvata na nona i sala vakaturaga mai vua na nodra tui, a kena bibi e dua na taledi koula, ka tu kina na veivatu talei eso; a sa vakaisalataki kina ko Tevita. A sa kauta yani nai toki-ni-valu mai na koro, e dua na ka levu sara.

³¹ A sa kauti ira yani na tamata sa tiko kina, ka cudruvi ira e nai varo, kei nai kadrukadru kaukamea ni were, kei na matau kaukamea, ka lesi ira ki na cakacaka ni vatu-buli. A sa cakava vakakina ki na nodra koro kecega na luve i Amoni. A sa lesu tale ki Jerusalemi ko Tevita kei ira kecega na tamata.