2 Cesalonaika 1 - Ai Vola Tabu (Vakadewa Makawa Vakavoutaki 2021)

¹ Oi keitou ko Paula, kei Silivenusi, kei Timoci, Ki nai soqosoqo lotu mai Cesalonaika era sa tu vua na Kalou ko Tamada kei na Turaga ko Jisu Karisito:

² Me nomudou na loloma, kei na vakacegu, mai vua na Kalou ko Tamada kei na Turaga ko Jisu Karisito.

Vakavinavinaka

³ Sa kilikili kei keitou me keitou ia tikoga na vakavinavinaka vua na Kalou e na vukumudou, na veiwekani, ni sa dodonu ga oqori, ni sa tubu vakalevu sara na nomudou vakabauta, a sa uasivi cake na nomudou veilomani vakataki kemudou yadua.

⁴ Ia keitou sa vakacaucautaki kemudou vei ira na veisoqosoqo lewe ni lotu ni Kalou, e na vuku ni nomudou lomadei kei na vakabauta e na nomudou vakacacani kecega, kei na vakararawataki dou sa vosota.

Na Veilewai ni sa Lako Mai na Karisito

⁵ Oqo nai vakatakilakila ni lewa dodonu ni Kalou, mo dou vakabau kina mo dou yaga me rawata na matanitu ni Kalou, o koya dou sa vakararawataki talega kina.

⁶ Ni sa dodonu vua na Kalou me saumi ira vakararawa era sa vakararawataki kemudou;

⁷ ia vei kemudou talega sa vakararawataki, me vakacegui vata kei keitou, ni na vakaraitaki mai lomalagi na Turaga ko Jisu kei ira vata kaya na nona agilosi kaukauwa,

⁸ e na yameyame ni bukawaqa, me cudruvi ira era sa sega ni kila na Kalou, a sa sega ni vakabauta nai tukutuku-vinaka ni noda Turaga ko Jisu Karisito;

⁹ sa nodra cudruvi na veivakarusai tawa mudu mai na mata ni Turaga, mai na nona kaukauwa vakaidina talega;

¹⁰ ni na lako mai ko koya me ra vakarokorokotaka ko ira na nona tamata yalosavasava, ka me dokai koya ko ira kecega era sa vakadinata, e na siga ko ya, (ni sa vakadinati na neitou i tukutuku vei kemudou.)

¹¹ O koya oqo keitou sa masulaki kemudou tikoga; me vakabauti kemudou na neitou Kalou mo dou yaga me rawata na ka dou a kacivi kina, ka me vakayacora sara e na kaukauwa na gagadre vinaka kecega, kei na cakacaka ni vakabauta,

¹² me vakacaucautaki kina na yaca ni noda Turaga ko Jisu Karisito e na vukumudou, koi kemudou talega e na vukuna, me vaka na loloma ni noda Kalou kei na Turaga ko Jisu Karisito.