1 Veigauna 9 - Ai Vola Tabu (Vakadewa Makawa Vakavoutaki 2021)

¹ A sa wili na nodra i tabatamata na Isireli kecega; ka raica, sa volai e na kedrai vola na tui Isireli. Ia sa kau vakabobula ki Papiloni ko ira na yavusa i Juta e na vuku ni nodra talaidredre.

² Ia nai taukei eliu era sa tiko e na nodra vanua, e na nodra veikoro, sai ira na Isireli, ko ira na bete, ko ira na Livai, kei ira na Necinimi.

Ko Ira Era Tiko e Jerusalemi

³ A sa tiko mai Jerusalemi eso vei ira na yavusa i Juta, ka so vei ira na yavusa i Penijamini, ka so vei ira na yavusa i Ifereimi, kei ira na Manasa.

⁴ Ko Ucei na tagane na luve i Amiute, na tagane na luve i Omirai, na tagane na luve i Imiri, na tagane na luve i Pani, mai vei ira na luve i Peresi na luve i Juta.

⁵ Ka so vei iratou na kai Sailo: ko Asaia na ulumatua, kei iratou na luvena tagane.

⁶ Ka so vei iratou na tagane na luve i Sira: ko Jiueli, kei na wekadra, era le ono na drau ka ciwasagavulu.

⁷ Ka so vei ira na tagane na luve i Penijamini; ko Salu na luve i Mesulame ka tagane, na luve i Otevaia ka tagane, na luve i Senua ka tagane,

⁸ kei Ipinaia na tagane na luve i Jiroame kei Ela na tagane, na luve i Usai, na luve i Mikiri ka tagane, kei Mesulame na luve i Sefataia ka tagane, na luve i Riueli ka tagane, na luve i Ipinaia ka tagane;

⁹ kei na wekadra e na nodra i tabatamata, era le ciwa na drau ka limasagavulu ka ono. O ira kece na tagane oqo era sa qase turaga e na veivale ni nodra qase.

Na Vuvale Vakabete

¹⁰ Ia mai vei ira na bete: ko Jitaia, kei Jioiaripi, kei Jakini,

¹¹ kei Asaraia na luve i Ilikaia ka tagane, na luve i Mesulame ka tagane, na luve i Setoki ka tagane, na luve i Miraioci ka tagane, na luve i Eiitupi ka tagane, o koya sa lewa na vale ni Kalou;

¹² kei Ataia na luve i Jiroame ka tagane, na luve i Pasuri ka tagane, na luve i Malikaia ka tagane, kei Masei na luve i Etieli ka tagane, na luve i Jasera ka tagane, na luve i Mesulame ka tagane, na luve i Misilemeci ka tagane, na luve i Ima ka tagane,

¹³ kei na wekadra era turaga e na vuvale ni nodra qase, sa le dua na udolu ka vitu na drau ka onosagavulu; era tamata yaga sara e na cakacaka kecega e na vale ni Kalou.

Ko Ira na Livai

¹⁴ Ia mai vei ira na Livai: ko Semaia na luve i Asupi ka tagane, na luve i Asirikame ka tagane, na luve i Esapaia ka tagane, mai vei ira na tagane na luve i Mirari;

¹⁵ kei Pakipakari, ko Eresi, kei Kalali, kei Matanaia na luve i Mika ka tagane, na luve i Sikiri ka tagane, na luve i Esava ka tagane;

¹⁶ kei Opetaia ka tagane na luve i Semaia, na luve i Kalali ka tagane, na luve i Jitucuni ka tagane, kei Perekaia na luve i Esa ka tagane, na luve i Ilikana ka tagane, o ira sa tiko e na nodra koro lalai na kai Nitofa.

¹⁷ Ia ko ira nai vakatawa-ni-katuba: ko Salumi; kei Akupi, kei Talimoni, kei Eiimani, kei ira na wekadra (sa nodra turaga ko Salumi);

¹⁸ ia era sa tiko ga e na matamata-ni-koro ni tui vaka ki na tokalau. Era i vakatawa-ni-katuba e na nodra i tikotiko na Livai.

¹⁹ Ia ko Salumi na luve i Kore ka tagane, na luve i Epaiasafi ka tagane, na luve i Kora ka tagane, kei ira na wekana e na vale ni nona qase, ko ira na luve i Kora, era sa lewa na cakacaka, era i vakatawa-ni-katuba ni Vale tabu ni ra sa turaga ni tikotiko i Jiova ko iratou na nodra qase, era i vakatawa ni curucuru ni vale.

²⁰ Ia ko Finiasi na luve i Iliesa ka tagane, sa lewai ira eliu, a sa totaki koya ko Jiova.

²¹ Sai vakatawa-ni-katuba ni vale ni veitavaki ko Sakaraia na luve i Miselimaia ka tagane.

²² O ira kecega oqo sa digitaki mei vakatawa ni matamata-ni-koro, era sa le rua na drau ka tinikarua. Era sa wili e na nodra i tabatamata, e na nodra veikoro lalai, o ira ka lesia ko Tevita kei Samuela na daurai ni ra sa yalodina.

²³ Ia ko ira kei na luvedra era sa dauvakaraica na matamata-ni-koro ni vale i Jiova, oqori na Vale tabu, ni ra veivuke vakatawa.

²⁴ Era sa tiko e na yasana vava ko ira nai vakatawa, vaka ki na tokalau, ki na ra, ki na vualiku, ki na ceva talega.

²⁵ Ia ko ira na wekadra, era sa tiko e na nodra veikoro lalai, era daulako vakabogi vitu kei ira.

²⁶ Ia sa yalodina nai vakatawa vava sa liu, ko iratou na Livai a ratou sa lewa na veitaba-ni-vale e cake kei nai yau ni vale ni Kalou.

²⁷ A ra sa dautiko vakavolivolita na vale ni Kalou, ni sa nodra i tavi me ra vakaraica, ka sa nodra i tavi talega me dolava e na veimataka kecega.

Eso Tale Vei Ira na Livai

²⁸ Ia eso vei ira sa nodra i tavi nai yaya ni cakacaka, me ra wilika ni sa kau ki loma, ka wilika talega ni sa kau ki tautuba.

²⁹ A sa lesi eso vei ira me ra vakaraica nai yaya, io nai yaya ni vale tabu kecega, kei na madrai droka vinaka, kei na waini, kei na waiwai, kei na kau boi vinaka, kei nai saluaki.

³⁰ Ka so vei ira na luvedra tagane na bete era sa dau ulia nai lumu e vakaisaluaki.

³¹ Ia ko Matacaia, e dua vei ira na Livai, o koya na ulumatua i Salumi na luve i Kora, sa nona i tavi me lewa na ka sa tavuteke.

³² Ka so tale vei ira na wekadra, era luvedra tagane na Koaca, sa nodra i tavi na madrai dau yatuni, me ra vakarautaka e na veisiga ni vakacecegu.

³³ Ia ko ira oqo na dau-ni-sere, era nodra qase turaga na Livai, era tiko vakadua e na veivale e cake ka ra sa lalaga mai na cakacaka tani; ni ra sa ia tiko na cakacaka oqo e na siga kei na bogi.

³⁴ O ira oqo na nodra qase turaga na Livai, era sa liu e na nodra i tabatamata; ka ra sa tiko ko ira oqo mai Jerusalemi.

Na Vuvale i Saula na Tui

³⁵ A sa tiko mai Kipioni na tama i Kipioni, ko Jieli, ia na yaca ni watina ko Meeka;

³⁶ a nona ulumatua tagane ko Apitoni, ka tarava ko Suri, ko Kisi, ko Peali, ko Neri, ko Netapi,

³⁷ ko Kitori, ko Eiio, ko Sakaraia, kei Mikiloci.

³⁸ A sa vakatuburi Semea ko Mikiloci. Ia ko ira talega oqo era tiko vata kei ira na wekadra mai Jerusalemi, ka donuya na wekadra.

³⁹ A sa vakatuburi Kisi ko Neri; ka vakatuburi Saula ko Kisi, ka vakatuburi Jonacani ko Saula, kei Malikisua, kei Epinatapi, kei Esipeali.

⁴⁰ Ia na luve i Jonacani ka tagane, ko Miripi-peali; a sa vakatuburi Maika ko Miripi-peali.

⁴¹ Ia ko iratou na luve i Maika eratou tagane: ko Piconi, kei Meleki, kei Tarea, kei Easi.

⁴² A sa vakatuburi Jara ko Easi; a sa vakatuburi Alemeci, kei Asimavece, kei Simirai, ko Jara; a sa vakatuburi Mosa ko Simirai;

⁴³ a sa vakatuburi Pina ko Mosa; ia sa luvena ko Rifaia ka tagane, sa luvena ko Elasa ka tagane, sa luvena ko Aseli ka tagane.

⁴⁴ A sa le ono na luve i Aseli, na yacadratou oqo: ko Asirikame, ko Pokiru, kei Isimeli, kei Siaraia, kei Opetaia, kei Anani. O iratou oqo na luve i Aseli eratou tagane.