1 Veigauna 5 - Ai Vola Tabu (Vakadewa Makawa Vakavoutaki 2021)

Na Kawa i Rupeni

¹ Ia ko ira na luve i Rupeni ka tagane na ulumatua i Isireli, (ni sa ulumatua ko koya; ia ni sai valavala vakavelavela ni sa toro ki nai mocemoce i tamana, sa soli na nona i tutu vakaulumatua vei rau na tagane na luve i Josefa na luve i Isireli, ka sa sega ga ni wili nai tabatamata me vaka na vakaulumatua.

² Ia sa gumatua vei iratou na tuakana kei na tacina ko Juta, a sa vu mai vua na turaga sa levu cake; ka sa nei Josefa na ka vakaulumatua.)

³ Io ko iratou na tagane na luve i Rupeni na ulumatua i Isireli: ko Enoke, kei Palu, ko Esironi, kei Kamai.

⁴ O iratou na luve i Joeli ka tagane: ko Semaia, ko Koki, ko Semeai,

⁵ ko Maika, ko Riaia, ko Peali,

⁶ ko Piera, ko koya ka kauta tani vakabobula ko Tikilaci-pilineseri na tui Asiria; ko koya sa nodra turaga na Rupeni.

⁷ Ia ko ira na tacina e na nodra veimataqali, ni sa wili nai tabatamata ni nodra kawa: ko Jieli sa liu, kei Sakaraia,

⁸ kei Pela na luve i Asasi ka tagane, na luve i Sema ka tagane, na luve i Joeli ka tagane, o koya ka tiko mai Aroeri, ka yala ki Nipo kei Peali-mioni.

⁹ A sa tiko e na vanua vaka ki na tokalau ko koya, ka yala ki nai curucuru ki na vanua dravuisiga mai na uciwai ko Uferetisi, ni sa tubu me ka levu na nodra manumanu e na vanua ko Kiliati.

¹⁰ Ia e na gauna i Saula era sa vala kei ira na Akiri, a ra sa mokuti ira; a ra sa tiko e na nodra veivale laca e na vanua kecega vaka ki na tokalau mai Kiliati.

Na Kawa i Kata

¹¹ Ia ko ira na luve i Kata era tiko donui ira e na vanua ko Pasani, ka yala ki Salika:

¹² ko Joeli sa liu, kei Safami na kenai karua, kei Janei, kei Safati mai Pasani.

¹³ Kei iratou na wekadratou e na vale i tamadratou: ko Maikeli, kei Mesulame, kei Sipa, kei Jorei, kei Jakani, kei Sia, kei Iperi, e lewe vitu.

¹⁴ Oqo na tagane na luve i Epaieli na luve i Uri ka tagane, na luve i Jaroa ka tagane, na luve i Kiliati ka tagane, na luve i Maikeli ka tagane, na luve i Jisisei ka tagane, na luve i Jato ka tagane, na luve i Pusa ka tagane;

¹⁵ ko Ei na luve i Apitieli ka tagane, na luve i Kuni ka tagane, era sa veiliutaki e na vale i tamadra.

¹⁶ A ra sa tiko e Kiliati mai Pasani, kei na kena veikoro, kei na vanua veico kecega ni Saroni, e na nodra i yalayala.

¹⁷ O ira kece oqo sa wili na nodra i tabatamata e na gauna i Jocame na tui Juta, kei na gauna i Jeropoama na tui Isireli.

Na Mataivalu ni Mataqali mai na Tokalau

¹⁸ O ira na luve i Rupeni ka tagane, kei ira na Kata, kei na yavusa-veimama i Manasa, ko ira na tamata qaqa, era sa taura rawa nai sasabai kei nai seleiwau, ka dauvanataka na dakai dina, ka daukila nai valu, era le vasagavulu ka va na udolu, ka vitu na drau ka onosagavulu, era lako rawa e nai valu.

¹⁹ A ra sa ia nai valu kei ira na Akari, kei Jeturi, kei Nefisi, kei Notapi.

²⁰ A ra sa vukei ni ra sa vala kei ira, a ra sa soli ko ira na Akari ki na ligadra, kei ira kece talega na nodra i to, ni ra sa tagi vua na Kalou e nai valu, a sa rogoci ira ko koya ni ra sa vakararavi vua.

²¹ A ra sa tokia na nodra manumanu; e lima na oba (50,000) na nodra kameli, ka ruasagavulu ka lima na oba (250,000) na sipi, ka rua na udolu na asa, ka le tini na oba (100,000) na tamata.

²² Ni ra sa moku mate na lewe vuqa, ni sa ka mai vua na Kalou nai valu. A ra sa tikotiko ga me kedrai sosomi ka yacova na veivakabobulataki.

Na Yavusa-Veimama i Manasa

²³ Ia ko ira na luvedra na yavusa-veimama i Manasa era sa tiko e na vanua oqo. Era sa tubu me lewe vuqa mai Pasani, ka yacovi Peali-erimoni, kei Siniri, ka yacova na Ulunivanua ko Erimoni.

²⁴ Ia ko ira oqo na turaga ni mataqali ni nodra qase: ko Iferi, kei Isai, kei Ilieli, kei Asirieli, kei Jeremaia, kei Otevaia, kei Jatieli, era tamata qaqa, ka tamata rogo, era turaga ni mataqali ni nodra qase.

²⁵ Ia era sa talaidredre vua na Kalou ni nodra qase, ka lako vakatani me ra muria na veikalou ni lewe-ni-vanua oqori, ko ira ka vakarusa ko koya na Kalou e matadra.

²⁶ Ia na nodra Kalou na Isireli sa vakauqeta na yalo i Puli na tui Asiria, kei na yalo i Tikilaci-pilineseri na tui Asiria, a sa kauti ira tani, io ko ira na Rupeni, kei ira na Kata, kei ira na yavusa-veimama i Manasa, ka kauti ira ki Ela, kei Apori, kei Ara, kei na uciwai mai Kosani, ka yacova na gauna oqo.