1 Veigauna 10 - Ai Vola Tabu (Vakadewa Makawa Vakavoutaki 2021)

Sa Vakamatei ko Saula kei Iratou na Luvena

¹ A sa vala kei ira na Isireli ko ira na kai Filisitia; a ra sa dro tani ko ira na Isireli e matadra na kai Filisitia, ka ra sa bale sobu ni ra sa moku mai na Ulunivanua ko Kilipoa.

² A sa cicimuri Saula kei iratou na luvena tagane ko ira na kai Filisitia; ka ra sa mokuti Jonacani, kei Epinatapi, kei Malikisua eratou luve i Saula, ko ira na kai Filisitia.

³ A sa gumatua nai valu kivei Saula, ka sa vanai koya ko ira na dauvanavana, a sa vakamavoataki koya ko ira na dauvanavana.

⁴ Sa qai kaya ko Saula vua sa daucolata na nona i yaragi, “Ucuna na nomu i seleiwau, ka suaki au sara kina, de sa lako mai ko ira na sega ni cili oqo ka vakalialiai au.” A sa bese ko koya sa daucolata na nona i yaragi; ni sa ka levu na nona rere. A sa taura nai seleiwau ko Saula, ka baletaka.

⁵ Ia ni sa raica ko koya sa daucolata na nona i yaragi ni sa mate ko Saula, sa baletaka talega ko koya na nona i seleiwau, ka sa ciba.

⁶ A sa mate ko Saula, kei na luvena tagane tolutolu, ia sa mate vata kecega na nona kawa.

⁷ Ia ni ra sa raica ko ira kecega na Isireli era tiko e na buca, ni ra sa dro, a sa mate talega ko Saula kei iratou na luvena, era sa biuta na nodra veikoro, ka dro talega; a ra sa lako mai na kai Filisitia, ka tiko kina.

⁸ Ia e na mataka, ni ra sa lako mai ko ira na kai Filisitia me ra tokia na nodra i sulu na moku, era sa kunei Saula kei iratou na luvena, ni ratou sa davo mate e na Ulunivanua ko Kilipoa.

⁹ Ia era luvata na nona i sulu, ka ra sa kauta tani na uluna, kei na nona i yaragi, a ra sa talatala ki na nodra vanua na kai Filisitia me vakarogorogoya ki na nodra veimatakau, vei ira talega na tamata.

¹⁰ Ia na nona i yaragi era sa ciqira e na nodra burekalou, ka rubeca na uluna e na burekalou i Tekoni.

¹¹ Ia ni ra sa rogoca ko ira kece na kai Jepesi-kiliati na ka kecega era sa kitaka vei Saula ko ira na kai Filisitia,

¹² era sa ia kecega na tamata qaqa, ka la'ki kauta tani na yago i Saula, kei na yagodratou na luvena, ka kauta mai ki Jepesi, ka buluta na suidratou e na ruku ni oki mai Jepesi; a ra sa lolo ka bogi vitu.

¹³ A sa mate ko Saula e na vuku ni nona caka cala sa kitaka ko koya vei Jiova, io, ki na vosa i Jiova, ka ni sa sega ni vakabauta ko koya, ka ni sa lako talega me kere vakavuvuli vua na tamata sa curumi, ka me tarogi koya,

¹⁴ ka sa sega ni tarogi Jiova. A sa vakamatei koya kina ko koya, ka sa vukica na matanitu kivei Tevita na luve i Jese.