1 Tui 9 - Ai Vola Tabu (Vakadewa Makawa Vakavoutaki 2021)

Sa Rairai Tale vei Solomoni ko Jiova

¹ Ia sa yaco ni sa tara vakaoti ko Solomoni na vale i Jiova kei na vale-ni-tui kei na ka kecega ka gadreva ko Solomoni ka via cakava,

² sa qai rairai tale vei Solomoni ko Jiova, me vaka na nona a rairai vua mai Kipioni.

³ Ka sa kaya vua ko Jiova, “Au sa rogoca oti na nomu masu kei na nomu kerekere, ko a vakayacora vei au. Au sa vakatabuya na vale oqo ko sa tara oti, me tiko kina na yacaqu ka tawa mudu. Ia ena tiko mai kea na mataqu kei na lomaqu e na veisiga kecega.

⁴ Ia kevaka ko na lako voli e mataqu, me vaka ka lako kina ko Tevita na tamamu e na yalodina, kei nai valavala dodonu, mo cakava na ka kecega ka'u a vakarota vei iko, ka vakabauta na ka ka'u sa lesia kei na ka ka'u sa lewa,

⁵ au na qai vakataudeitaka nai tikotiko vakaturaga ni nomu matanitu, mo lewa kina vei ira na Isireli ka sega ni mudu, me vaka ka'u a yalataka vei Tevita na tamamu, ka kaya, ‘Ena sega ni mudu vei iko na tamata me veisosomitaki e na nodra i tikotiko vakaturaga na Isireli.’

⁶ Ia kevaka dou na vuki tani mo dou kua ni muri au, oi kemudou se ko ira na luvemudou, ka sega ni vakabauta na noqu i vakaro kei na noqu i lesilesi ka'u sa tauca vei kemudou, ia dou sa lako tani ka qarava na kalou tani ka cuva vei ira,

⁷ au na qai muduki ira tani na Isireli mai na vanua ka'u a solia vei ira; ia na vale oqo ka'u sa vakatabuya ki na yacaqu, au na biuta tani e mataqu; ena daucavuti talega e nai bole ko ira na Isireli, ka na vosabecitaki vei ira na veimatanitu kecega.

⁸ Ia e na vuku ni vale oqo, sa cecere tu, era na kurabui ko ira kece sa lako voli kina, ka vakaisaisa; a ra na kaya, ‘E na vuku ni cava beka sa cakacaka kina vakaoqo ko Jiova ki na vanua oqo kei na vale oqo?’

⁹ Ia ena kainaki, ‘Ni ra sa biuti Jiova na nodra Kalou, o koya ka kauti ira na nodra qase mai na vanua ko Ijipita, a ra sa bauta eso na kalou tani, ka cuva vei ira, ka qaravi ira. O koya oqo sa vakayacora kina vei ira ko Jiova na ka ca kecega oqo.’ ”

Na Veiyalayalati nei Irami kei Solomoni

¹⁰ Ia ni sa oti na yabaki e ruasagavulu sa tara tiko kina ko Solomoni na vale ruarua, na vale i Jiova, kei na vale-ni-tui,

¹¹ (sa kauta vei Solomoni ko Irami na tui Taia na sitari kei na damanu, kei na koula, me vaka na ka kecega sa vinakata ko koya,) sa qai solia vei Irami ko Solomoni na tui e ruasagavulu na koro e na vanua ko Kalili.

¹² A sa lako yani ko Irami mai Taia me la'ki raica na veikoro ka solia vua ko Solomoni; a sa sega ni vinakata ko koya.

¹³ A sa kaya ko koya, “A veikoro cava oqo ko sa solia mai vei au, na wekaqu?” A sa vakatoka na yacadra ko koya me vanua ko Kepuli ka yacova na siga oqo.

¹⁴ A sa vakauta ko Irami vei koya na tui e dua na drau ka ruasagavulu na taledi koula.

Nai Tavi Tale Eso ka Qarava ko Solomoni

¹⁵ Ia oqo nai vakacavacava sa vakarota me ia ko Solomoni na tui, me tara kina na vale i Jiova, kei na nona vale, kei Milo, kei na bai kei Jerusalemi, kei Asori, kei Mikito, kei Keseri

¹⁶ (A sa lako cake eliu ko Fero na tui Ijipita, ka kabai Keseri, ka vakama, ka vakamatei ira na kai Kenani era a tiko e na koro, ka solia me ka-ni-loloma vua na luvena, na wati Solomoni;

¹⁷ ka sa tarai Keseri vou tale ko Solomoni), kei Peci-oroni mai ra,

¹⁸ kei Pealaci, kei Tatimoa mai na vanua lala, e na loma ni vanua,

¹⁹ kei na veikoro kecega ni yau nei Solomoni, kei na veikoro ni qiqi-ni-valu, kei na nodra veikoro na tamata dauvodo ose, kei na ka kecega sa via tara ko Solomoni mai Jerusalemi, kei Lepanoni, kei na vanua kece ni nona matanitu.

²⁰ Ia na tamata kecega sa vo mai vei ira na Amoraiti, kei ira na Itaiti, kei ira na Perisaiti, kei ira na Aivaiti, kei ira na Jepusaiti, ko ira era sega ni kawa vata kei ira na Isireli—

²¹ na nodra kawa era sa vo tiko e na vanua, ko ira era a sega ni vakarusa vakadua ko ira na Isireli—vei ira sa lesia ko Solomoni me ra nona tamata bobula, ka yacova na siga oqo.

²² Ia sa sega ni vakabobulataka e dua mai vei ira na Isireli ko Solomoni. Ia era sa tamata i valu ga, kei na nona tamata, kei na nona tamata turaga, kei na turaga ni nona mataivalu, kei na turaga ni nona qiqi-ni-valu, kei na nona tamata dauvodo ose.

²³ O ira oqo sa turaga vei ira sa lewa na cakacaka i Solomoni, era sa lewe lima na drau ka limasagavulu, era sa lewai ira na tamata era sa kitaka tiko na cakacaka.

²⁴ Ia sa lako cake na marama na luve i Fero mai na koro i Tevita, ki na vale sa tara ko Solomoni me nona. Sa qai tarai Milo ko koya.

²⁵ A sa vakacabora vakatolu e na veiyabaki ko Solomoni nai soro kama, kei nai soro ni veivinakati, e nai cabocabo-ni-soro ka cakava ko koya e na vale i Jiova, a sa vakama kina na ka boi vinaka e nai cabocabo-ni-soro sa tu e na mata i Jiova. A sa vakaotia na vale ko koya.

²⁶ A sa cakava ko Solomoni na tui eso na waqa mai Esi-oni-keperi, voleka ki Eloci, mai na matasawa ni Wasa Damudamu, e na vanua ko Itomi.

²⁷ A sa talai ira na nona tamata e na veiwaqa ko Irami, ko ira era kai wai ka daukila na wasawasa me ra lako vata kei ira na tamata i Solomoni.

²⁸ A ra sa lako ki Oferi, ka kauta mai kea na koula, e va na drau ka ruasagavulu na taledi kivei Solomoni na tui.