1 Tui 6 - Ai Vola Tabu (Vakadewa Makawa Vakavoutaki 2021)

Sa Tara na Valenisoro ko Solomoni

¹ E nai kava na drau ka walusagavulu ni yabaki ni nodra lako tani mai na vanua ko Ijipita ko ira na Isireli, ka e nai kava ni yabaki sa lewai ira kina na Isireli ko Solomoni, e na vula ko Sifi, ko ya nai karua ni vula, sa mai tara ko koya na vale i Jiova.

² Na balavu ni vale sa tara vei Jiova ko Solomoni na tui sa onosagavulu na kiupiti, kei na kena raraba e ruasagavulu, kei na kena cecere e tolusagavulu na kiupiti.

³ Na varada e na mata ni vale-ni-soro e ruasagavulu na kiupiti na kena balavu, me tautauvata kei na raraba ni vale, ka tini na kiupiti na kena raraba e na mata ni vale.

⁴ Ka sa cakava ko koya ki na vale eso na katuba e cake sa vakaisogo cicila me rai voli kina.

⁵ A sa cakava eso nai taba-ni-vale e cake ki na lalaga ni vale me vakavolivolita na lalaga ni vale, io, na tikina tabu, kei na loqi ni Vosa; ka sa cakava eso nai taba-ni-vale e cake me volita.

⁶ Nai taba-ni-vale e ra, e lima na kiupiti na kena raraba, ia oqori e loma sa ono na kiupiti na kena raraba, ia nai katolu sa vitu na kiupiti na kena raraba. Ni sa cakava ko koya eso nai nono me volita na vale e taudaku, ka me kakua ni curu ki na lalaga ni vale.

⁷ Ni sa tara na vale, sa tara ga e na vatu sa vakarautaki oti tu, ka sa qai kau yani ki kea, me kakua kina ni dua na rorogo ni tukituki, se kolakola e na matau, se vakayagataki ni dua nai yaya kaukamea vakamatai e na vale ko ya ni sa tara tiko.

⁸ A katuba ni taba-ni-vale e loma sa caka mai na yasa i matau ni vale, ka ra sa cabe cake e nai kabakaba cowiri ki na loqi e loma, ia mai na loqi e loma ki na kenai katolu.

⁹ A sa tara na vale ko koya, ka vakaotia, ka ubia na vale e nai sa kei na papa sitari.

¹⁰ A sa cakava eso nai taba-ni-vale e na veiyasana kece ni vale, e lima na kiupiti na kedra cecere, ka ra sa semati ki na vale e na kau sitari.

¹¹ A sa yaco mai na vosa i Jiova vei Solomoni, ka kaya,

¹² “Na vale oqo ko sa tara tiko, kevaka ko sa muria na noqu i lesilesi, ka kitaka na noqu lewa, ka vakabauta na noqu i vakaro kecega mo lako vakakina, au na qai vakataudeitaka vei iko na noqu vosa ka'u a tukuna vei Tevita na tamamu.

¹³ Ka'u na tiko ga e na kedra maliwa na Isireli, ka sega ni biuti ira na noqu tamata na Isireli.”

Nai Ukuuku e Loma ni Valenisoro

¹⁴ A sa tara na vale ko Solomoni, ka vakaotia.

¹⁵ A sa botana e loma na lalaga ni vale e na papa sitari. Mai na buturara ni vale ka kauta ki nai coka sa no kina nai botani, sa botana e loma e na kau, ka cakava na buturara ni vale e na papa damanu.

¹⁶ A sa botana na lalaga ni vale e na papa sitari, ka ruasagavulu na kiupiti, mai na buturara ka yaco ki nai coka, ka sa cakava e loma me dua kina na loqi ni Vosa, io, me kena tikina tabu sara.

¹⁷ Ia na vale ko ya, io na kena tikina tabu sa vasagavulu na kiupiti.

¹⁸ Ia na sitari e loma ni vale sa ceuti tu kina eso na vago kei na senikau sa seraki; sa sitari taucoko; sa sega ni rairai na vatu.

¹⁹ A sa vakarautaka na loqi ni Vosa e loma ni vale, me tu kina na kato ni veiyalayalati i Jiova.

²⁰ Ia na loqi ni Vosa, sa ruasagavulu na kiupiti na kena balavu e matana, ka ruasagavulu na kiupiti na kena raraba, ka ruasagavulu na kiupiti na kena cecere. A sa botana e na koula talei ko koya, ka sa botana nai cabocabo-ni-soro sitari.

²¹ A sa botana na vale e loma ko Solomoni e na koula talei, ka sa viria e dua na bai e na sinucodo koula, e na mata ni loqi ni Vosa, ka sa botana e na koula.

²² A sa botana ko koya na vale taucoko e na koula, ka me oti sara na vale. Kei nai cabocabo-ni-soro taucoko, sa tu mai na loqi ni Vosa, sa botana e na koula.

²³ Ia mai loma ni loqi ni Vosa, sa cakava ko koya e rua na jerupi, e na olive, sa tau yatini na kiupiti na kedrau cecere.

²⁴ E dua na taba ni jerupi sa lima na kiupiti, ka lima talega na kiupiti na tabana kadua; mai na sovu ni tabana e dua, ka yaco ki na sovu ni tabana kadua, sa tini na kiupiti.

²⁵ A sa tini na kiupiti na jerupi kadua; sa tautauvata na kedrau i vakarau na jerupi kei na kedrau levu.

²⁶ Sa tini na kiupiti na kena cecere e dua na jerupi, a sa vaka talega kina nai karua ni jerupi.

²⁷ A sa viritu na jerupi ki loma ni vale e loma. A rau sa vakatetaba tu na jerupi, a sa tara na lalaga na taba ni dua na jerupi, a sa tara na lalaga kadua na taba ni jerupi kadua; a sa veiuturi na tabadrau ki loma ni vale.

²⁸ A sa botana na jerupi ko koya e na koula.

²⁹ A sa ceuta ko koya na lalaga kecega ni vale, me vakavolivolita, e nai vakatakarakara ni jerupi, kei na vuni niu-sawa, kei na senikau sa seraki, e loma, e taudaku talega.

³⁰ A sa botana na buturara ni vale e na koula, e loma, e taudaku talega.

³¹ Ia nai sogo ni katuba ni loqi ni Vosa, sa cakava ko koya e na olive; na duru ni sogo kei na ulu ni katuba, sa rivirivi ka lima na yasa.

³² Ia sa cakava talega e na olive nai sogo ruarua; a sa ceuta kina ko koya nai vakatakarakara ni jerupi, kei na vuni niu-sawa, kei na senikau sa seraki, ka botana e na koula; ka botana e na koula na jerupi kei na vuni niu-sawa.

³³ A sa cakava na duru ruarua ni sogo ni vale e na olive, sa ta vakarivirivi, ka va na yasa,

³⁴ ia sa damanu nai sogo ruarua. Sa lobi rawa e rua na yasa ni sogo e dua, ka sa lobi rawa e rua na yasa ni sogo kadua.

³⁵ A sa ceuta kina ko koya na jerupi, kei na vuni niu-sawa, kei na senikau sa seraki, ka sa botana e na koula na kena ceuceu.

³⁶ A sa viria na bai ni rara e loma e na vatu sa ta, ka taqa tolu, ka dua nai yatu e nai coka sitari.

³⁷ Sa tauyavutaki na vale i Jiova e nai kava ni yabaki, e na vula ko Sifi.

³⁸ Ia e na kenai katinikadua ni yabaki, e na vula ko Puli, ko ya nai kawalu ni vula, sa caka vakaoti na vale, io, na veitikina kecega, me vaka na kenai valavala kecega. A sa tara tiko ko koya ka yabaki vitu.