1 Tui 3 - Ai Vola Tabu (Vakadewa Makawa Vakavoutaki 2021)

Masu ko Solomoni ka Kerea na Vuku

¹ A sa ia ko Solomoni me vakaveiwekani kei Fero na tui Ijipita, ka kauta na luvena yalewa ko Fero, ka kauti koya ki na koro i Tevita, ka me tara oti mada eliu na nona vale, kei na vale i Jiova, kei na bai me vakavolivoliti Jerusalemi.

² A ra sa vakacaboisoro tiko ko ira na tamata e na veitikina cecere ga, ni sa sega ni tara oti tu e dua na vale ki na yaca i Jiova, ka yacova na veisiga oqori.

³ A sa lomani Jiova ko Solomoni, ka sa muria tiko na vunau i Tevita na tamana; ka sa vakacaboisoro tiko ka vakama na ka boi vinaka e na veitikina cecere.

⁴ A sa lako na tui ki Kipioni me vakacabora kina nai soro, ni sa rogo levu na tikina cecere ko ya. A sa dauvakacabora ko Solomoni e dua na udolu nai soro kama e nai cabocabo-ni-soro ko ya.

⁵ Sa rairai vei Solomoni ko Jiova mai Kipioni e na tadra e na bogi, ka sa kaya na Kalou, “Mo kerea mada na ka me'u solia vei iko.”

⁶ A sa kaya ko Solomoni, “Ko ni sa cakava vakalevu na loloma vua na nomuni tamata ko Tevita na tamaqu, me vaka sa lako ko koya e matamuni e na yalodina, kei nai valavala dodonu, kei na yalododonu vei kemuni. Ka ko ni sa cakava vua na loloma levu oqo, ni kemuni sa solia vua e dua na luvena me dabe e nona i tikotiko vakaturaga e na siga oqo.

⁷ Ia oqo, oi kemuni Jiova na noqu Kalou, o ni sa lesi au na nomuni tamata me'u tui, mei sosomi kei Tevita na tamaqu, ia koi au, ka'u se gone lailai. Au se sega ni kila me'u curu yani se curu mai.

⁸ Ka sa tiko na nomuni tamata e na kedra maliwa na nomuni tamata, o ira ko ni a digitaka, na lewe vuqa, era sega ni wili se tukuni rawa.

⁹ Mo ni solia mada kina vei au na nomuni tamata na yalo sa vuku me'u liutaki ira vinaka kina na nomuni tamata, ka me'u kila kina na veika e vinaka mai na veika e ca; ia ko cei sa rawata me lewai ira na nomuni tamata oqo era lewe vuqa?”

¹⁰ A sa vinaka vua na Turaga na veika sa kerea oqo ko Solomoni.

¹¹ Ka sa kaya vua na Kalou, “Ni ko sa kerea na ka oqo, ka sega ni kerea me nomu na bula dede, ka sega ni kerea me nomu nai yau, ka sega ni kerei ira na nomu meca me ra mate, ia ko sa kerea ga me nomu na vuku, mo kila kina na lewa dodonu,

¹² raica, ka'u sa cakava oqo me vaka na nomu vosa. Raica, ka'u sa solia vei iko na yalo sa vuku ka daukila rawa na ka; sa sega kina e dua eliu me tautauvata kei iko, ena sega talega ni tubu e dua e muri me vakataki iko.

¹³ Ia ka'u sa solia talega vei iko na ka ko a sega ni kerea, nai yau kei na dokai, me kakua kina ni dua tale vei ira na tui me tautauvata kei iko e na nomu gauna taucoko.

¹⁴ Ia kevaka ko na lako e na noqu sala, mo vakabauta na noqu vunau kei na noqu i vakaro, me vaka ka cakava na tamamu ko Tevita, ka'u na qai vakadedetaka na nomu bula.”

¹⁵ A sa yadra ko Solomoni, ka raica, sa tadra ga. A sa lako ki Jerusalemi, ka tu e na mata ni kato ni veiyalayalati i Jiova, ka vakacabora eso nai soro kama, kei nai soro ni veivinakati, ka caka magiti vei ira kecega na nona tamata dauveiqaravi.

Na Vakatulewa Vuku i Solomoni

¹⁶ Sa qai lako mai vua na tui e le rua na yalewa dautagane, ka rau mai tucake tu e matana.

¹⁷ A sa kaya e dua vei rau na yalewa, “Kemuni na noqu turaga, keirau sa tiko kaya na yalewa oqo e na dua na vale; ia ka'u a vakasucu ni keirau a tiko kaya e na vale ko ya.

¹⁸ Ia e na kenai katolu ni siga ni'u a vakasucu oti, sa qai vakasucu na yalewa talega oqo. Ia keirau sa tiko taurua ga. Sa sega e dua tale keitou sa tiko kaya e vale; koi keirau ruarua ga sa tiko e na vale ko ya.

¹⁹ A sa mate e na bogi na luvena na yalewa oqo, ni sa bika ko koya.

²⁰ Ka sa duri cake ko koya e na lomaloma ni bogi, ka kauta tani vei au na luvequ tagane, ni'u sa moce koto na nomuni vada, ka sa vakotora e na lomaserena, ka vakotora na luvena sa mate ki na lomaserequ.

²¹ Ni gauna me'u duri cake kina e na mataka me'u vakasucuma na luvequ, au raica ni sa mate tu. Ia ni'u a qai vakaraici koya vakavinaka e na mataka, raica, sa sega ni ko koya na luvequ ka'u a vakasucuma.”

²² Ia sa kaya na yalewa kadua, “E segai, ni sa luvequ ga ko koya sa bula, ka sa luvemu ko koya sa mate.” A sa kaya nai matai ni yalewa, “E segai, sa luvemu ga ko koya sa mate, ka sa luvequ ga ko koya sa bula.” A rau sa vosa vakaoqo e na mata ni tui.

²³ A sa kaya na tui, “Sa kaya e dua, ‘A luvequ oqo ko koya sa bula, ka sa luvemu ko koya sa mate’; ka sa kaya nai karua, ‘E segai; sa luvemu ga ko koya sa mate, ka sa luvequ ko koya sa bula.’ ”

²⁴ Sa qai kaya na tui, “Dou kauta mai vei au e dua nai seleiwau.” A ra sa kauta nai seleiwau ki vua na tui.

²⁵ A sa kaya na tui, “Dou wasea rua na gone sa bula, ka solia e dua na kena veimama vua e dua, vua talega na kenai karua na kena veimama ka dua.”

²⁶ Ia sa qai vosa vua na tui na tina ni gone sa bula na luvena—ni sa tubu na nona loloma vua na luvena—ka sa kaya, “Isa, kemuni na noqu turaga, mo ni solia ga vei koya na gone sa bula; ni kakua sara ni vakamatea!” Ia sa kaya na yalewa kadua, “Me kakua ni noqu se nomu; me wasei rua ga.”

²⁷ Sa qai kaya na tui, “Dou solia vua nai matai ni yalewa na gone sa bula, ka kakua sara ni vakamatea. Sa tinana ga ko koya.”

²⁸ A ra sa rogoca ko ira kecega na Isireli na nona lewa ko koya na tui, ka ra sa rerevaka na tui, ni ra sa kunea sa tu vua na vuku ni Kalou me ia kina na veilewai.