1 Tui 22 - Ai Vola Tabu (Vakadewa Makawa Vakavoutaki 2021)

Rau To Vata ko Josefati na Tui Juta kei Eapi

¹ Sa yabaki tolu ka sega ni vala ko ira na kai Siria kei ira na Isireli.

² Ia e na kenai katolu ni yabaki, sa lako sobu ko Josefati na tui Juta vei koya na tui Isireli.

³ A sa kaya vei ira na nona tamata ko tui Isireli, “Dou sa kila beka ni sa noda ko Remoci-kiliati, ia eda sa tiko wele ga ka sega ni taura mai vei koya na tui Siria?”

⁴ A sa kaya ko koya vei Josefati, “O na lako vata kei au ki Remoci-kiliati me ia nai valu, se segai?” A sa kaya vua na tui Isireli ko Josefati, “Koi kedaru vata ga; sa duavata ga ko ira na nodaru tamata, sa duavata talega na nodaru ose.”

⁵ A sa kaya vua na tui Isireli ko Josefati, “Mo taroga mada eliu na vosa i Jiova.”

⁶ A sa qai vakasoqoni ira vata na parofita ko koya na tui Isireli, e le va beka na drau na tamata, ka sa kaya vei ira, “Me'u lako li ki Remoci-kiliati me'u ia kina nai valu, se me'u kakua?” A ra sa kaya, “Mo ni lako cake, ni na solia ko koya na Turaga ki na ligamuni na tui.”

⁷ Ia sa kaya ko Josefati, “E sega beka ni tiko eke e dua tale na parofita i Jiova me daru taroga vua?”

⁸ A sa kaya vei Josefati ko koya na tui Isireli, “Sa dua tale na tamata eke, ko Maikaia na luve i Imila, edaru rawa ni tarogi Jiova kina; ia ka'u sa cati koya, ni sa sega ni parofisaitaka na ka vinaka e na vukuqu, na ka ca ga.” A sa kaya ko Josefati, “Me kakua ni vosa vaka ko ya na tui.”

⁹ Sa qai kaciva e dua na turaga ko koya na tui Isireli, ka kaya, “Mo la'ki kauti Maikaia na luve i Imila vakatotolo sara mai.”

¹⁰ A rau sa dui tiko e nona i tikotiko vakaturaga na tui Isireli kei Josefati na tui Juta e na rara ni samu sila mai na matamata-ni-koro e Samaria, ka rau sa vakaisulu e nai sulu vakatui, ka ra sa parofisai tiko e matadrau ko ira kecega na parofita.

¹¹ A sa cakava ko Setekaia na luve i Kinana eso nai leu vakamanumanu e na kaukamea, ka sa kaya, “Sa vosa vakaoqo ko Jiova, ‘O ni na cumuti ira na kai Siria e na ka oqo me yacova ni ra sa vakarusai kece.’ ”

¹² A ra sa parofisai vakakina ko ira na parofita kecega, ka kaya, “Mo ni lako cake ki Remoci-kiliati, ka rawata na qaqa; ena solia ko Jiova ki na ligamuni na tui.”

Parofisaitaka ko Maikaia ni na Basika na Leqa

¹³ A sa vosa vei Maikaia ko koya nai talaki ka la'ki kaciva, ka kaya, “Raica, sa duavata ga na nodra vosa na parofita, ni ra vosataka na ka vinaka vua na tui. Me tautauvata mada na nomu vosa kei na nona vosa e dua vei ira, ka mo cavuta ga na ka vinaka.”

¹⁴ Ia sa kaya ko Maikaia, “Me vaka sa bula ko Jiova, na ka ga sa kaya vei au ko Jiova, sai koya ga oqori ka'u na tukuna.”

¹⁵ Ni sa lako mai ko koya vua na tui, a sa kaya vua ko koya na tui, “I Maikaia, me keimami lako li ki Remoci-kiliati me vala, se me kakua?” A sa kaya vua ko koya, “Mo ni lako cake, ka mo ni qaqa; ena solia ko Jiova ki na ligamuni na tui.”

¹⁶ Ia sa kaya vua ko koya na tui, “Me'u vakabubuluitaki iko vakavica mada, mo tukuna vei au na vosa dina ga e na yaca i Jiova?”

¹⁷ Ka sa kaya ko koya, “Au a raici ira kecega na Isireli ni ra sa veiseyaki tu e na veiulunivanua, me vaka na sipi sa sega na nodra i vakatawa; ka sa kaya ko Jiova, ‘Sa sega na nodra turaga ko ira oqo; me ra dui lesu e na vakacegu ki na nona vale.’ ”

¹⁸ A sa kaya vei Josefati na tui Isireli, “Au a sega li ni kaya vei iko, ni na sega ni parofisaitaka ko koya na ka vinaka e na vukuqu, na ka ca ga?”

¹⁹ A sa qai kaya ko Maikaia, “O koya oqo, mo rogoca kina na vosa i Jiova: Au a raici Jiova ni sa tiko e nona i tikotiko vakaturaga, ka ra sa tiko voleka vua e na nona i matau kei na nona i mawi ko ira kecega na lewe i lomalagi.

²⁰ Ka sa kaya ko Jiova, ‘O cei ena temaki Eapi, me rawa ni lako cake kina ka la'ki bale mai Remoci-kiliati?’ A sa vosa vaka e dua, ka sa vosa vaka e dua tale.

²¹ A sa qai lako mai e dua na yalo, ka mai tu e na mata i Jiova, ka sa kaya, ‘Oi au ga, ka'u na temaki koya.’ A sa kaya vua ko Jiova, ‘E na cava?’

²² A sa kaya ko koya, ‘Au na lako yani ka'u na dua na yalo lasulasu e na gusudra kecega na nona parofita.’ A sa kaya ko Jiova, ‘Mo lako ka temaki koya, ka ko na gumatua talega; mo lako yani, ka kitaka vakakina.’

²³ Ia oqo, sa vakacuruma ko Jiova na yalo lasulasu ki na gusudra kecega na nomu parofita oqo; a sa tukuna ko Jiova ni na yacovi kemuni na ka ca.”

²⁴ A sa qai toro voleka ko Setekaia na luve i Kinana, ka sabici Maikaia e baluna, ka sa kaya, “A sala cava sa lako tani kina vei au na Yalo i Jiova me vosa vei iko?”

²⁵ A sa kaya ko Maikaia, “Raica, ko na qai kunea e na siga ko na curu kina ki loma ni loqi mo vunitaki iko kina.”

²⁶ A sa kaya na tui Isireli, “Vesuki Maikaia, ka vakasuka kivei Emoni na turaga-ni-koro, kei Joasa na luvena na tui,

²⁷ ka kaya, ‘Sa kaya vakaoqo na tui: Drau vakacuruma na tamata oqo ki na valeniveivesu, ka musuka sobu nai vakarau ni kena madrai kei na wai, me yacova ni'u sa lako yani e na yalo vakacegu.’ ”

²⁸ A sa kaya ko Maikaia, “Kevaka ko ni na lesu dina mai e na vakacegu, sa qai sega ni vosa e na gusuqu ko Jiova.” Ka sa kaya, “Mo ni rogoca kecega, oi kemuni na tamata!”

Na Vakadrukai kei na Mate i Eapi

²⁹ A rau sa lako cake ki Remoci-kiliati na tui Isireli kei Josefati na tui Juta.

³⁰ A sa kaya vei Josefati na tui Isireli, “Au na vakaisulu vakalecaleca koi au ka lako ki nai valu; ia ko iko mo vakaisulutaki iko ga e na nomu i sulu vakatui.” A sa vakaisulu vakalecaleca na tui Isireli, ka lako vakavuni ki nai valu.

³¹ Ia ko tui Siria, sa vakarota vei ira na turaga-ni-valu, era lewe tolusagavulu ka rua, era lewa na nona qiqi-ni-valu, ka kaya, “Kakua ni veivala kaya e dua sa lailai, se dua sa levu, dou vala duaduaga kei na tui Isireli.”

³² Ia ni ra sa raici Josefati ko ira na turaga ni qiqi-ni-valu, era sa kaya, “O koya dina ga na tui Isireli.” A ra sa lako vakatikitiki me vala kaya. A sa qoqolou ko Josefati.

³³ Ia ni ra sa raica ko ira na turaga ni qiqi-ni-valu ni sa sega ni koya na tui Isireli, era sa vuki lesu ka sega tale ni vakacemuri koya.

³⁴ A sa dua na tamata sa kaloca loa ga na dakai, ka vanai koya na tui Isireli e na tikina sa veiuturi kina na nona i sulu ni valu. A sa kaya kina ko koya vua sa vakacici ose ni nona qiqi-ni-valu, “Vuki lesu, ka mo kauti au tani mai nai valu, ni'u sa mavoa vakaca.”

³⁵ A sa levu cake tiko nai valu e na siga ko ya, ka ra sa vakaduria cake tikoga na tui e na nona qiqi-ni-valu e matadra na kai Siria, ka sa qai mate e na yakavi. A sa dave na dra mai na mavoa ki na loma ni qiqi-ni-valu.

³⁶ A sa kacivaki voli vei ira na lewe ni mataivalu, ni sa vakarau dromu na mata-ni-siga, ka vaka, “Ni suka na tamata yadua ki na nona koro, kei na tamata yadua ki na nona vanua!”

³⁷ A sa mate na tui, ka sa kau ki Samaria. A sa bulu mai Samaria ko koya na tui.

³⁸ A ra sa savata na qiqi-ni-valu mai na mata-ni-wai mai Samaria; sa dramica na nona dra ko ira na koli, ka ra sa dausili kina ko ira na dautagane, me vaka na vosa i Jiova ka sa cavuta ko koya.

³⁹ Ia na kena vo ni cakacaka i Eapi, kei na ka kecega sa cakava ko koya, kei na vale ivori ka tara ko koya, kei na veikoro kecega ka tara ko koya, sa sega li ni volai e nai Vola ni Veika sa Caka e na Nodra Gauna na Tui Isireli?

⁴⁰ A sa moce vata kei ira na nona qase ko Eapi; a sa tui ko Esaia na luvena, me kenai sosomi.

Sa Tui Juta ko Josefati

⁴¹ Ia ko Josefati na luve i Esa, sa tekivu me lewa vei ira na Juta e na kenai kava ni yabaki i Eapi na tui Isireli.

⁴² Sa tolusagavulu ka lima na yabaki i Josefati ni sa tekivu na nona lewa, ka sa lewa tiko mai Jerusalemi ka yabaki ruasagavulu ka lima. Ia na yaca i tinana ko Asupa, na luve i Sili.

⁴³ A sa muria nai valavala kecega i Esa na tamana. Sa sega ni vuki tani mai kina, ka sa cakava na ka e dodonu e na mata i Jiova. Ia ka sa sega ni biu tani na veitikina cecere, ka ra se vakacaboisoro tikoga ko ira na tamata ka vakama na ka boi vinaka e na veitikina cecere.

⁴⁴ A rau sa veisaututaki ko Josefati kei na tui Isireli.

⁴⁵ Ia na kena vo ni cakacaka i Josefati, kei na nona qaqa sa cakacaka kina ko koya, kei na nona mataivalu, sa sega li ni volai e nai Vola ni Veika sa Caka e na Nodra Gauna na Tui Juta?

⁴⁶ Ia na kedra vo ni tamata sai valavala vaka-Sotoma, o ira ka vo mai na gauna i Esa na tamana, sa vakaotia ko koya mai na vanua.

⁴⁷ Ia sa sega e dua na tui mai Itomi; sa lesi ga e dua me tui vakatawa.

⁴⁸ Sa cakava eso na waqa ni Tasisi ko Josefati, me lako ki Oferi me usa koula mai, ia era sa sega ni lako, ni ra a voca na veiwaqa mai Esioni-keperi.

⁴⁹ Sa qai kaya kivei Josefati ko Easaia na luve i Eapi, “Me ra lako vata ga ko ira na noqu tamata kei ira na nomu tamata e na waqa,” ia sa bese ko Josefati.

⁵⁰ A sa moce vata kei ira na nona qase ko Josefati, ka sa bulu kei ira na nona qase e na koro i Tevita na nona qase, ka sa tui ko Jiorami na luvena, me kenai sosomi.

Sa Tui Isireli ko Easaia

⁵¹ E na kenai katinikavitu ni yabaki i Josefati na tui Juta, sa tekivu me lewa vei ira na Isireli mai Samaria ko Easaia na luve i Eapi, a sa lewa tiko vei ira na Isireli, ka yabaki rua.

⁵² A sa daucaka ca e na mata i Jiova, ka muria nai valavala i tamana, kei nai valavala i tinana, kei nai valavala i Jeropoama na luve i Nipati, o koya ka vakaivalavalacataki ira na Isireli.

⁵³ Ni sa qaravi Peali ko koya, ka cuva vua, ka vakacudrui Jiova na nodra Kalou na Isireli, me vaka na ka kecega ka cakava ko tamana.