1 Tui 20 - Ai Vola Tabu (Vakadewa Makawa Vakavoutaki 2021)

Nai Valu i Eapi kei Siria

¹ Ia ko Peni-etati na tui Siria, sa vakasoqoni ira vata kecega na nona mataivalu. A ra sa le tolusagavulu-ka-rua na tui era tiko vata kaya, kei na ose kei na qiqi-ni-valu. A sa lako cake ko koya, ka buku druadrua ki Samaria, ka vala kaya.

² A sa tala ko koya eso na tamata ki loma ni koro kivei Eapi na tui Isireli, a sa kaya vua, “Sa vosa vakaoqo ko Peni-etati:

³ ‘Sa noqu na nomu siliva kei na nomu koula; ka sa noqu talega ko iratou na watimu kei iratou na luvemu, io ko ira sa vinaka sara.’ ”

⁴ A sa vosa ko koya na tui Isireli, ka kaya, “Me vaka na nomu vosa, noqu turaga na tui; koi au, kei na noqu ka kecega sa nomu ga.”

⁵ A ra sa lako tale mai ko ira na tamata, ka kaya, “Sa vosa vakaoqo ko Peni-etati, ka kaya: ‘E dina ka'u a talaki vei iko, ka kaya, “Mo solia mai vei au na nomu siliva, kei na nomu koula, kei iratou na watimu, kei iratou na luvemu.”

⁶ Ia ka'u na tala ga vei iko na noqu tamata eso e na gauna vata vakaoqo ni mataka, ka ra na vakasaqaqara e na nomu vale, kei na nodra veivale na nomu tamata; ia na ka kecega sa vinaka sara vei iko era na taura, ka ra na kauta mai.’ ”

⁷ Sa qai kacivi ira kecega na qase ni vanua na tui Isireli, ka sa kaya vei ira, “Ni kila mada, ka raica ni sa nakita na ka ca na tamata oqo; ni sa talaki vei au me nona ko iratou na watiqu, kei iratou na luvequ, kei na noqu siliva, kei na noqu koula; ia ka'u a sega ni bureitaka vua.”

⁸ Ia sa kaya vua ko ira kecega na qase, kei ira kecega na tamata, “Mo kakua ni vakarorogo vua, se vakadonuya.”

⁹ A sa kaya kina ko koya vei iratou na tamata i Peni-etati, “Dou kaya vua na noqu turaga na tui, ‘A ka kecega ko a talaki kina eliu vei au na nomu tamata ka'u na cakava, ia na ka oqo au sa sega ni cakava rawa.’ ” A ratou sa lako yani na tamata, ka tukuna tale vua na vosa.

¹⁰ A sa talaki vua ko Peni-etati, ka kaya, “Me ra qai sauma vei au ko ira na kalou, ka vakaikuritaka, kevaka sa levu na kuvu-ni-soso mai Samaria me ra yakuta yadua ko ira me rauti ira na tamata kecega sa muri au.”

¹¹ A sa kaya na tui Isireli, “Dou tukuna vua, ‘Me kakua ni dokai koya ko koya sa vauca vua nai sulu ni valu me vakataki koya sa luvata tani.’ ”

¹² Ia ni sa rogoca na vosa oqo ko Peni-etati—ni sa gunu tiko ko koya kei ira na tui e na veivale vakacevaceva—a sa kaya vei ira na nona tamata, “Dou vakarau!” A ra sa vakarau me ra kaba na koro.

Sa Vakadrukai Peni-etati ko Eapi

¹³ Ka raica, sa toro mai vei Eapi na tui Isireli e dua na parofita, ka kaya, “Sa vosa vakaoqo ko Jiova, O sa raici ira na lewe vuqa kecega oqo, se segai? Raica, ka'u na solia kece ki na ligamu edaidai, ia ko na kila kina ni sai au ko Jiova.”

¹⁴ A sa taroga ko Eapi, “E na liga i cei?” A sa kaya ko koya, “Sa vosa vakaoqo ko Jiova, E na ligadra ga na cauravou ni turaga ni veitikina.” A sa taroga ko koya, “O cei ena tekivuna nai valu?” A sa kaya ko koya, “Ko iko ga.”

¹⁵ A sa qai soqoni ira na cauravou ni turaga ni veitikina ko koya, a ra sa le rua na drau ka tolusagavulu ka rua. Ka oti sa qai wiliki ira kecega na tamata, io ko ira kecega na Isireli, ka ra sa lewe vitu na udolu.

¹⁶ A ra sa lako yani ni sa siga levu tutu, ni se gunu tiko ko Peni-etati ka sa mateni e na vale vakacevaceva, ko koya kei ira na tui e lewe tolusagavulu ka rua sa to vata kaya.

¹⁷ A ra sa curu yani eliu na cauravou ni turaga ni veitikina. Ka sa tala yani eso na yamata ko Peni-etati, ka ra sa tukutuku lesu vua, ka kaya, “Sa ra lako mai eso na tamata mai Samaria.”

¹⁸ A sa kaya ko koya, “Kevaka era sa lako mai me ia na sautu, dou vesuki ira bulabula; ia kevaka era sa curu mai me ra vala, dou vesuki ira bulabula talega.”

¹⁹ Ia era sa curu oti yani e na koro ko ira oqo: ko ira na cauravou ni turaga ni veitikina, kei ira na mataivalu era muri ira.

²⁰ A ra sa dui mokuta na tamata sa donui koya ko ira na tamata yadua. A ra sa dro ko ira na kai Siria, ka sa cicimuri ira ko ira na Isireli, ia sa dro bula ko Peni-etati na tui Siria ni sa vodo ose kei ira vata kaya era sa dauvodo ose.

²¹ A sa lako yani na tui Isireli, ka mokuta na ose kei na qiqi-ni-valu, ka sa mokuti ira na kai Siria e na dua na ravuravu levu.

²² A sa qai lako mai vakavoleka na parofita vua na tui Isireli, ka kaya vua, “Mo lako, ka vakaukauwataki iko, ka vakasamataka vinaka na ka mo cakava, ni na mai vala tale kei iko na tui Siria e na vula i tubutubu.”

Era sa Vakadrukai na Kai Siria

²³ Ia sa kaya vua na tui Siria ko ira na nona tamata, “Sa kalou ni veiulunivanua na nodra veikalou, o koya era sa gumatua kina vei keda; ia me da veivala mada kei ira e na buca, eda na qai gumatua vakaidina vei ira.

²⁴ Ka me caka talega oqo: mo ni kauti ira tani na tui, na tamata yadua mai na nona tikina, ka lesi ira na kavetani ni valu me kedrai sosomi,

²⁵ ia mo ni wilika e dua na mataivalu me tautauvata kei na nomuni mataivalu sa bale, kei na ose me tautauvata kei na ose, kei na qiqi-ni-valu me tautauvata kei na qiqi-ni-valu. Eda na qai veivala kei ira e na buca, ka da na gumatua cake vakaidina mai vei ira.” A sa vakarorogo ki na nodra vosa ko koya, ka kitaka vakakina.

Sa Vakadrukai Peni-etati Vakarua ko Eapi

²⁶ Ia e na vula i tubutubu, a sa qai soqoni ira na kai Siria ko Peni-etati, ka lako cake ki Efeki, me vala kei ira na Isireli.

²⁷ A ra sa soqoni ko ira na Isireli, ka ra kauta na kedrai vaqa, ka lako yani me ra vala kei ira. A ra sa la'ki tiko e matadra ko ira na Isireli me vaka e rua na qele ni me lailai, ia ko ira na kai Siria era sa robota na vanua.

²⁸ A sa lako mai na tamata ni Kalou, ka vosa vua na tui Isireli, ka kaya, “Sa kaya vakaoqo ko Jiova: Me vaka ni ra sa kaya vakaoqo na kai Siria, ‘Sa Kalou ni veiulunivanua ga ko Jiova, ka sa sega ni Kalou ni veibuca’, au na qai soli ira kecega kina na lewe vuqa oqo ki na ligamu, ia dou na kila ni sai au ko Jiova.”

²⁹ A ra sa tiko vakaivalu ka toka veibasai me bogi vitu. Ia e na kenai kavitu ni siga sa qai tekivu nai valu. A sa mokuti ira na kai Siria ko ira na Isireli, ka ra le oba vakatini (100,000) na tamata i valu era taubale e na dua bauga na siga.

³⁰ Ia sa dro ko ira na kena vo ki Efeki, ki loma ni koro; ia e dua na bai sa baleti ira e le ruasagavulu ka vitu na udolu vei ira na tamata sa vo. A sa dro ko Peni-etati, ka curuma na koro, ka lako ki na loqi e loma ni dua na vale.

³¹ A ra sa kaya vua ko ira na nona tamata, “Raica, keitou sa rogoca oti ni ra sa dauyalololoma ko ira na nodra tui na lewe-ni-vuvale ni Isireli. Me keitou vakaisulutaki keitou mada e nai sulu taga, ka me vauci na ulu i keitou e na dali, ka me keitou na lako yani vua na tui Isireli; de sa na rawa ni vakabulai kemuni ko koya.”

³² A ra sa sulumaka nai sulu taga ki na tolodra, ka vauca ki na uludra na dali, ka lako yani vua na tui Isireli, ka ra sa kaya, “Sa kaya ko Peni-etati na nomuni tamata, ‘Isa, me'u bula mada.’ ” A sa kaya ko koya, “Oi, e se bula tiko li ko koya? Sa wekaqu ko koya.”

³³ Ia era sa vakarorogo vakavinaka ko ira na tamata, ka sa qara sara e dua nai vakatakilakila ni sa mai vei koya oqo, ka ra sa kaya, “Io, na wekamuni, ko Peni-etati.” A sa kaya ko koya, “Dou la'ki kauti koya mai.” A sa lako yani vua ko Peni-etati; ka sa kaya vua ko koya me vodo ki na qiqi-ni-valu.

³⁴ A sa kaya vua ko Peni-etati, “A veikoro sa kauta tani ko tamaqu mai vei tamamu, ka'u na vakasuka; ia mo cakava na nomu yatu vale mai Tamasiko, me vaka ka cakava ko tamaqu mai Samaria.” Ka sa kaya ko Eapi, “Au na qai sereki iko mo lako yani ka ni sa vakabau na veiyalayalati oqo.” A sa veiyalayalati kaya, ka sereki koya me lako yani.

Sa Vosa Vakadodonu vei Eapi na Parofita

³⁵ A sa dua na tamata vei ira na luve ni parofita, sa kaya vua na kai nona e na vosa i Jiova, “Au masuti iko mo mokuti au mada.” A sa bese ni mokuti koya na tamata.

³⁶ A sa kaya vua ko koya, “Ni ko a sega ni muria na vosa i Jiova, raica, ni ko sa lako tani vei au, ena vakamatei iko e dua na laione.” Ia ni sa lako tani vua, sa kunei koya e dua na laione, ka vakamatei koya.

³⁷ A sa kunea e dua tale na tamata ko koya, ka sa kaya, “Mo mokuti au mada!” A sa mokuti koya sara na tamata, ka sa vakamavoataki koya.

³⁸ A sa qai lako yani na parofita, ka la'ki waraka na tui e na sala, ka vakalecaleca tu ni sa tabonaka na matana e nai vadreti ni mavoa.

³⁹ Ia ni sa lako tu kina na tui, sa tagi vua na tui ko koya, ka kaya, “Sa lako yani na nomuni tamata ki nai valu; ka raica, sa lako vakatikitiki e dua na tamata, ka kauta vei au e dua na tamata, ka kaya, ‘Mo yadrava na tamata oqo; ni kevaka e mani yali, ko na mate me kenai sau, se ko na sauma e na dua na taledi siliva.’

⁴⁰ Ia ni'u sa ogaoga voli vaka ka vaka na nomuni tamata, raica, sa yali ko koya.” A sa kaya vua na tui Isireli, “Ko na lewai me vakakina; sai iko ga ka sa vakatulewataka.”

⁴¹ A sa kusarawa ko koya ka luvata nai vadreti mai na matana, ka sa qai kilai koya na tui Isireli, ni sa dua vei ira na parofita.

⁴² A sa kaya na parofita vua na tui, “Sa vosa vakaoqo ko Jiova, ‘Ni ko sa laiva me lako tani e ligamu na tamata ka'u sa lesia me rusa sara, sa na kenai sosomi ni nona mate na nomu mate, ka na nodra i sosomi na nona tamata ko ira na nomu tamata.’ ”

⁴³ A sa lako yani ki na nona vale na tui Isireli, ka sa yalobibi ka yalo ca, ka lesu ki Samaria.