1 Tui 18 - Ai Vola Tabu (Vakadewa Makawa Vakavoutaki 2021)

Ko Ilaijia kei Ira na Parofita i Peali

¹ Sa bogi vuqa, sa qai yaco mai na vosa i Jiova vei Ilaijia e na kenai katolu ni yabaki, ka kaya, “Mo lako, mo rairai mada vei Eapi; ia ka'u na vakatauca tale na uca ki vuravura.”

² A sa lako ko Ilaijia, me rairai vei Eapi. A sa ka levu na dausiga mai Samaria.

³ A sa kacivi Opetaia ko Eapi, o koya ka lewa na lewe ni vuvale. (Ia sa rerevaki Jiova vakalevu ko Opetaia,

⁴ ka sa yaco eliu ni sa vakamatei ira tiko na parofita i Jiova ko Jesipeli, sa kauta e le dua na drau na parofita ko Opetaia, ka vunitaki ira vakayayalimasagavulu e na qara vatu, ka vakani ira e na madrai kei na wai.)

⁵ A sa qai kaya vei Opetaia ko Eapi, “Mo lako voli e na vanua ki na mataniwai vure kecega kei na uciwai kecega. De daru na kunea na co me vakabula na ose kei na meule, me kakua ni mate kece na noda manumanu.”

⁶ A rau sa wasea rua na vanua me rau dui lako voli kina. Sa lako vakataki koya e na dua na sala ko Eapi, ka sa lako vakataki koya e na dua na sala tani ko Opetaia.

⁷ Ia ni sa lako tu e na sala ko Opetaia, raica, sa tavaki koya ko Ilaijia. A sa kilai koya ko Opetaia, ka sa cuva vakatoboicu, ka kaya, “Oi kemuni beka na noqu turaga ko Ilaijia?”

⁸ A sa kaya vua, “Koi au ga. Ia mo la'ki kaya vua na nomu turaga, ‘Raica, sa tiko eke ko Ilaijia.’ ”

⁹ Sa qai kaya ko koya, “A cava na noqu cala, ko sa via solia kina na nomu tamata ki na liga i Eapi, me vakamatei au?

¹⁰ Me vaka sa bula ko Jiova na nomu Kalou, sa sega e dua na vanua se matanitu sa sega ni talaki kina na noqu turaga me vakasaqarai iko. Ia ni ra sa kaya, ‘E yali eke ko koya’, sa qai vakabubuluitaki ira ko koya na matanitu kei na vanua ko ya, ni ra sa sega ni kunei iko.

¹¹ Ia ko sa qai kaya oqo, ‘Mo la'ki kaya vua na nomu turaga, “Raica, sa tiko oqo ko Ilaijia.” ’

¹² Ia ni'u sa lako tani vei iko, ena kauti iko tani na yalo i Jiova, ia ka'u na sega ni kila se ko sa kau kivei. Ia ni'u sa lako ka tukuna vei Eapi ka sega ni kunei iko ko koya, ena qai vakamatei au, ia ka dina ga ni koi au na nomu tamata sa rerevaki Jiova ni'u sa cauravou ka yacova na gauna oqo.

¹³ Sa sega beka ni tukuni vei iko na noqu turaga na ka ka'u a kitaka ni sa vakamatei ira na parofita i Jiova ko Jesipeli, ni'u a vunia e le dua na drau na tamata vei ira na parofita i Jiova, ka vakayayalimasagavulu e na qara vatu, ka vakani ira e na madrai kei na wai?

¹⁴ Ia ko sa kaya oqo, ‘Mo la'ki kaya vua na nomu turaga ni sa tiko oqo ko Ilaijia’; ia ena qai vakamatei au ko koya.”

¹⁵ Sa qai kaya ko Ilaijia, “Me vaka sa bula ko Jiova-ni-lewevuqa, o koya ka'u sa tu e matana, au na vakaraitaki au vakaidina vua edaidai.”

¹⁶ A sa la'ki tavaki Eapi ko Opetaia, ka sa tukuna vua. A sa la'ki tavaki Ilaijia ko Eapi.

¹⁷ Ia ni sa raici Ilaijia ko Eapi, sa kaya vua ko Eapi, “Ko iko beka ko koya na dauveivakararawataki e Isireli?”

¹⁸ A sa kaya ko koya, “Au sa sega ni vakararawataki Isireli; koi kemuni ga, kei na vale i tamamuni, ni kemuni sa biuta na vunau i Jiova, ka sa muri ira na Peali.

¹⁹ Ia oqo, mo ni talaki, mo ni vakasoqoni ira kecega na Isireli vei au, ki na Ulunivanua ko Kameli, kei ira na parofita i Peali era sa lewe va na drau ka limasagavulu, kei ira na parofita ni kalouyalewa ni veikau era sa lewe va na drau, era sa kana tiko mai na tepeli i Jesipeli.”

Na Vakavala Kaukauwa e Ului Kameli

²⁰ A sa talaki ko Eapi vei ira kecega na Isireli, ka vakasoqoni ira vata na parofita ki na Ulunivanua ko Kameli.

²¹ A sa toro voleka vei ira kecega na tamata ko Ilaijia, ka kaya, “E bogi vica mada kemuni na lomalomarua tiko kina? Kevaka sa Kalou ko Jiova, mo ni muri koya; ia kevaka ko Peali, mo ni muri koya.” A ra sa sega ni kaya vua e dua na vosa ko ira na tamata.

²² A sa kaya vei ira na tamata ko Ilaijia, “Oi au duaduaga, ka'u sa vo tiko vei ira na parofita i Jiova; ia na parofita i Peali era sa le va na drau ka limasagavulu.

²³ Ia me ra solia mai vei keda e rua na bulumakau, ka me ra qai digitaka ko ira e dua na bulumakau, ka me ra musumusuka mada, ka vakotora e na dela ni buka, ia me kakua ni viri kina na bukawaqa. Ia ka'u na vakarautaka na bulumakau kadua, ka vakotora e na dela ni buka, ia ka'u na sega talega ni viria kina e dua na bukawaqa.

²⁴ Ia mo ni masu ki na yaca ni nomuni kalou, ka'u na masu ki na yaca i Jiova; ia na kalou sa sauma mai e na bukawaqa, me Kalou ga ko koya.” A ra sa vosa kecega na tamata, ka kaya, “Sa donu vinaka na vosa!”

²⁵ Sa qai kaya ko Ilaijia vei ira na parofita i Peali, “Mo ni digitaka e dua na nomuni bulumakau ka vakarautaka mada eliu, ni kemuni sa lewe vuqa; ni qai masu ki na yaca ni nomuni kalou, ia kakua ga ni viria kina e dua na bukawaqa.”

²⁶ Era sa qai kauta na bulumakau sa soli vei ira, ka ra sa vakarautaka, ka ra sa qai masu ki na yaca i Peali mai na mataka ka yacova na sigalevu, ka ra sa kaya, “I Peali, mo rogoci keimami mai!” Ia sa sega na domo e rogo mai, se dua me sauma mai. Ka ra sa ladeva nai cabocabo-ni-soro sa caka.

²⁷ Ia ni sa sigalevu, sa qai vakalialiai ira ko Ilaijia, ka kaya, “Dou kaci vakadomoilevu, ni sa kalou ko koya. De vakanananu tiko beka, se la'ki vakacegui koya, se sa lako tu ki na dua na vanua, se moce tiko beka ka sa yaga me vakayadrati.”

²⁸ A ra sa kaci vakadomoilevu, ka tavalaki ira e nai seleiwau kei na yame-ni-sele lalai, me vaka na nodra i valavala, ka sa dave mai kina na dra.

²⁹ Ia ni sa oti na sigalevu, era sa parofisai tiko me yacova na gauna me dauvakacabori kina nai soro, ia sa sega ga na domo e rorogo. A sa sega ni dua e vosa mai, se dua e rogoca.

³⁰ A sa qai kaya vei ira kecega na tamata ko Ilaijia, “Ni toro voleka mai vei au.” A ra sa toro voleka ki vua ko ira na tamata kecega. Ka sa vakavinakataka tale ko koya nai cabocabo-ni-soro i Jiova ka a talaraki sobu.

³¹ A sa kauta ko Ilaijia na vatu e tinikarua, me vaka nai wiliwili ni nodra veiyavusa na luve i Jekope, o koya ka yaco vua na vosa i Jiova, ka kaya, “Ena vakatokai na yacamu ko Isireli”;

³² ka sa cakava ko koya e na veivatu ko ya nai cabocabo-ni-soro e na yaca i Jiova. A sa kelia e dua na keli me volita nai cabocabo-ni-soro, ka me rauta e rua nai vakarau ni sila.

³³ A sa virikotora na buka, ka musumusuka vakalalai na bulumakau, ka vakotora e dela ni buka. Ka sa kaya, “Ni vakasinaita e va na saqa e na wai, ka sova ki nai soro kama kei na buka.”

³⁴ A sa qai kaya, “Ni vakaruataka.” A ra sa vakaruataka. A sa kaya ko koya, “Ni vakatolutaka.” A ra sa vakatolutaka,

³⁵ ka sa dave vakavolivolita nai cabocabo-ni-soro na wai, ka sa vakasinaiti talega nai keli e na wai.

³⁶ Ia e na gauna sa dauvakacabori kina nai soro ni yakavi, sa toro voleka yani ko Ilaijia na parofita, ka kaya, “Kemuni Jiova na Kalou i Eparaama, kei Aisake, kei Isireli, me kilai mada edaidai ni kemuni sa Kalou e Isireli, ka ni'u sa nomuni tamata talega koi au, ka sa nomuni vosa ka'u sa cakava kina na ka kecega oqo.

³⁷ Mo ni rogoci au, i Jiova, mo ni rogoci au, me ra kila na tamata oqo ni ko ni sa Kalou koi kemuni, i Jiova, ka ni kemuni sa vukica lesu tale na yalodra.”

³⁸ Sa qai lutu sobu mai na bukawaqa i Jiova, ka kania nai soro kama, kei na buka, kei na vatu, kei na kuvu-ni-qele, ka domica na wai e nai keli.

³⁹ Ia ni ra sa raica ko ira na tamata kecega, era sa cuva vakatoboicu, ka ra sa kaya, “Sa Kalou vakaidina ga ko Jiova; sa Kalou vakaidina ga ko Jiova.”

⁴⁰ A sa kaya vei ira ko Ilaijia, “Ni vesuki ira na parofita i Peali, ka me kakua ni dro bula e dua vei ira.” A ra sa vesuki ira; a sa kauti ira sobu ko Ilaijia ki na uciwai ko Kisoni, ka vakamatei ira mai kea.

Sa Vakatauca na Uca ko Jiova

⁴¹ A sa kaya vei Eapi ko Ilaijia, “Mo lako cake, mo la'ki kana ka gunu, ni sa rorogo mai na vakere ni uca levu.”

⁴² A sa lako cake ko Eapi me la'ki kana ka gunu. A sa lako cake ki na dela i Kameli ko Ilaijia. A sa cuva ki na qele mai kea ka vakacuva na matana ki na maliwa ni duruna.

⁴³ A sa kaya vua na nona cauravou, “Mo lako cake mada, ka rai vaka ki na wasawasa.” A sa lako cake na cauravou, ka rai voli, ka sa kaya, “Sa sega na ka e kune.” A sa kaya ko Ilaijia, “Mo lako tale, ka me vakavitu.”

⁴⁴ Ia e na kenai kavitu ni gauna, sa kaya na cauravou, “Raica, sa tubu cake mai na wasawasa e dua na o lailai, sa vaka na liga ni tamata.” A sa kaya vua ko Ilaijia, “Mo lako cake, mo kaya vei Eapi, ‘Mo ni vakarautaka na nomuni qiqi vakaturaga, ka lako sobu, de tarovi kemuni na uca.’ ”

⁴⁵ A sega ni dede ni sa loaloa mai na lomalagi e na veiyasana kecega, e na o kei na cagi, ka sa tau na uca levu. A sa vodo ko Eapi, ka lako ki Jesireli.

⁴⁶ Ka sa tiko vei Ilaijia na liga i Jiova, ni sa vauca ki tolona na nona i sulu, ka cici siviti Eapi ki na matamata mai Jesireli.