1 Tui 17 - Ai Vola Tabu (Vakadewa Makawa Vakavoutaki 2021)

Sa Tukuna ko Ilaijia na Dausiga

¹ A sa kaya vei Eapi ko Ilaijia na kai Tisipa, e dua vei ira na kai Kiliati, “Me vaka sa bula ko Jiova na nodra Kalou na Isireli, o koya ka'u sa tu e matana, ena sega ni lutu na tegu se tau na uca e na veiyabaki oqo, me yacova na gauna ka'u na vosa tale kina.”

² A sa yaco mai vua na vosa i Jiova, ka kaya,

³ “Mo lako tani eke, ka gole vaka ki na tokalau, ka vunitaki iko mai na uciwai ko Kirici, oqori e na mata ni Joritani.

⁴ Ia ko na gunu mai na uciwai, ka'u sa vakaroti ira talega na reveni me ra vakani iko tiko mai kea.”

⁵ A sa muria ko koya na vosa i Jiova; ka sa la'ki tiko ko koya mai na uciwai ko Kirici, oqori sa tu mai na mata ni Joritani.

⁶ Ia na reveni sa dau kauta vua na kena madrai kei na kena lewe ni manumanu e na veimataka, kei na kena madrai kei na kena lewe ni manumanu e na veiyakavi, ka sa gunu ko koya mai na uciwai.

⁷ Ia sa bogi vica, sa qai maca na uciwai, ni sa sega ni tau na uca e na vanua.

Na Yada mai Sarifaci

⁸ A sa yaco vua na vosa i Jiova, ka kaya,

⁹ “Mo cavu tu, mo lako ki Sarifaci, oqori sa vaka-Saitoni, ka tiko mai kea. Raica, ka'u sa vakarota vua e dua na yada mai kea me vakani iko.”

¹⁰ A sa cavu tu ko koya, ka lako ki Sarifaci. Ia ni sa yaco ki na matamata-ni-koro, raica, sa tiko mai kea e dua na yada, a sa ca buka tiko. A sa kaci vua ko koya, ka kaya, “Mo kauta mada mai vei au e dua na wai lailai e na bilo, me'u gunu.”

¹¹ Ia ni sa lako yani ko koya me kauta mai, sa kaci tale vua ko koya, ka kaya, “Mo kauta talega mai vei au e na ligamu e dua na tiki ni madrai.”

¹² A sa kaya na yada, “Me vaka sa bula ko Jiova na nomu Kalou, sa sega vei au e dua na keke, ia sa dua ga na valawa lailai sara e na saqa sa yakuta rawa na ligaqu, ka dua na waiwai lailai e na tavaya. Ka raica, ka'u sa kauta mai e rua na buka me'u la'ki vakarautaka na keirau kei luvequ, me keirau kania, ka qai mate.”

¹³ A sa kaya vua ko Ilaijia, “Mo kakua ni rere; mo la'ki cakava me vaka na nomu vosa. Ia mo cakava mada eliu vei au e dua na keke lailai, ka kauta mai vei au, ka mo qai vakarautaka e muri na kemudrau kei luvemu.

¹⁴ Ni sa kaya vakaoqo ko Jiova na nodra Kalou na Isireli, ‘Ena sega ni oti na valawa mai na kena saqa, ena sega talega ni maca sobu na tavaya waiwai, ka me yacova na siga ena vakatauca tale kina na uca ko Jiova ki vuravura.’ ”

¹⁵ A sa lako na yada, ka kitaka me vaka na vosa i Ilaijia. A sa kana tiko ko Ilaijia, kei na yada, kei iratou na nona lewe-ni-vuvale, ka bogi vuqa.

¹⁶ Sa sega ni oti na valawa mai na kena saqa, ka sega ni maca sobu na tavaya waiwai, me vaka na vosa i Jiova ka vosataka ko koya e na gusu i Ilaijia.

Sa Vakabula na Luvei koya na Yada ko Ilaijia

¹⁷ Sa oti na veika oqo, sa qai tauvi mate na luvena na yada, nai taukei ni vale; ia sa bibi sara na nona tauvi mate, ka sa cavuka kina na nona i cegu.

¹⁸ A sa kaya ko koya vei Ilaijia, “A cava li na ka ko sa sega ni vinakata vei kedaru, o iko na tamata ni Kalou? O sa lako ga mai mo vakananumi au e na noqu i valavala ca, ka vakavuna na nona mate na luvequ!”

¹⁹ A sa kaya vua ko Ilaijia, “Mo solia mai vei au na luvemu.” A sa kauti koya tani mai na lomaserena ko koya, ka kauta ki na loqi e cake sa dautiko kina ko koya, ka sa vakadavora e na nona i mocemoce.

²⁰ A sa tagi vei Jiova ko koya, ka kaya, “Kemuni Jiova na noqu Kalou, o ni sa vakayacora beka talega na ca vua na yada ka'u sa tiko vulagi kaya, ni kemuni sa vakamatea na luvena?”

²¹ A sa qai davo bikaca na gone vakatolu ko koya, ka tagi vei Jiova, ka kaya, “Kemuni Jiova na noqu Kalou, me curu tale mada vua na gone oqo na yalona.”

²² A sa rogoca na vosa i Ilaijia ko Jiova; a sa curu tale mai vua na gone na yalona, ka sa bula tale mai.

²³ A sa keveta na gone ko Ilaijia, ka kauti koya sobu ki vale mai na loqi e cake, ka solia vei tinana. A sa kaya ko Ilaijia, “Raica, sa bula na luvemu.”

²⁴ A sa kaya vei Ilaijia na yada, “Au sa qai kila e na ka oqo ni ko sa tamata ni Kalou, ka sa dina na vosa i Jiova e na gusumu.”