1 Tui 15 - Ai Vola Tabu (Vakadewa Makawa Vakavoutaki 2021)

Sa Tui Juta ko Epaijami

¹ E na kenai katinikawalu ni yabaki i Jeropoama na tui, na luve i Nipati, sa tekivu me lewa vei ira na Juta ko Epaijami.

² Sa tui tiko mai Jerusalemi ka yabaki tolu. Ia na yaca i tinana ko Meeka, na luve i Apisalome.

³ A sa muria ko koya nai valavala ca kecega i tamana, o koya ka kitaka ni sa bula eliu vua; a sa sega ni dodonu na lomana vei Jiova na nona Kalou, me vaka na loma i Tevita na nona qase.

⁴ Ia e na vuku i Tevita ga sa solia vei koya ko Jiova na nona Kalou e dua na cina mai Jerusalemi, ni sa vakatubura na luvena me taravi koya, ka me vakataudeitaki Jerusalemi,

⁵ ni sa cakava ko Tevita na ka e dodonu e na mata i Jiova, ka sega ni lesu tani mai na dua na ka sa vakaroti vua e na veisiga kecega ni nona bula, ka vakavo ga na ka me baleti Uraia na Itaiti.

⁶ A rau sa veivaluti ko Reopoama kei Jeropoama e na gauna kece ni nona bula.

⁷ Ia na vo ni cakacaka i Epaijami, kei na ka kecega ka cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta? A rau sa veivaluti tiko ko Epaijami kei Jeropoama.

⁸ A sa moce vata kei ira na nona qase ko Epaijami; a sa bulu ko koya e na koro i Tevita; a sa tui ko Esa na luvena, me kenai sosomi.

Sa Tui Juta ko Esa

⁹ Ia e na kenai karuasagavulu ni yabaki i Jeropoama na tui Isireli, sa tekivu me lewa vei ira na Juta ko Esa.

¹⁰ A sa tui tiko ko koya mai Jerusalemi ka yabaki vasagavulu ka dua. Ia na yaca i tinana ko Meeka, na luve i Apisalome.

¹¹ A sa caka dodonu ko Esa e na mata i Jiova, me vakataki Tevita na nona qase.

¹² A sa vakasevi ira tani mai na vanua era sai valavala vaka-Sotoma, ka biuta tani na matakau kecega ka cakava ko ira na nona qase.

¹³ Ia ko Meeka talega na tinana, sa vakasivoya ko koya me kakua ni ranadi tiko, ni sa cakava e dua na matakau ki na kalouyalewa ni veikau. A sa vakacacana na nona matakau ko Esa, ka vakama mai na uciwai ko Kitironi.

¹⁴ Ia sa sega ni biu tani na veitikina cecere, ka sa dodonu ga vei Jiova na loma i Esa e na nona gauna kecega.

¹⁵ A sa kauta ki na vale i Jiova na veika ka vakatabuya ko tamana me nei Jiova, kei na veika ka vakatabuya ko koya me nei Jiova—na siliva, kei na koula, kei nai yaya.

¹⁶ A rau sa veivaluti tiko ko Esa kei Pasa na tui Isireli e na nodrau gauna kecega.

¹⁷ A sa lako cake ko Pasa na tui Isireli me veivala kei ira na Juta, a sa tarai Rama, ka me dredre vua e dua me lako tani se lako mai vei Esa na tui Juta.

¹⁸ A sa qai kauta ko Esa na siliva kei na koula kecega sa vo tu e nai yau ni vale i Jiova, kei nai yau ni vale-ni-tui, ka solia ki na ligadra na nona tamata. A sa vakauta ko Esa na tui kivei Peni-etati na luve i Tapirimoni, na luve i Esioni, na tui Siria, o koya sa tiko mai Tamasiko, ka kaya,

¹⁹ “Sa dua na nodaru veiyalayalati, ka dua vei rau na tamaqu kei na tamamu. Raica, ka'u sa vakauta vei iko e dua na ka-ni-loloma, na siliva kei na koula. Mo lako mai, mo tinia na nomudrau veiyalayalati kei Pasa na tui Isireli, ka me lako tani vei au ko koya.”

²⁰ A sa vakarorogo vei Esa na tui ko Peni-etati, ka talai ira na kavetani ni nona mataivalu me veivala kei na nodra veikoro na Isireli. A sa samuti Aijoni, kei Tani, kei Epeli-peci-meeka, kei Kineroci taucoko, kei na vanua taucoko ko Navitalai.

²¹ Ia ni sa rogoca ko Pasa, sa tarova na nona tarai Rama tiko ko koya, ka sa la'ki tiko mai Tirisa.

²² A sa qai kacivi ira kecega na Juta ko Esa na tui, ka sa sega ni vo e dua. A ra sa kauta tani na veivatu mai Rama kei na kena kau ka tarai Rama tiko kina ko Pasa; a sa tara kina ko Esa na tui na koro ko Kipa e Penijamini kei Misipa.

²³ Ia na vo ni cakacaka kecega i Esa, kei na nona kaukauwa kecega, kei na ka kecega ka cakava ko koya, kei na veikoro ka tara ko koya, sa sega li ni volai e nai Vola ni Veika sa Caka e na Nodra Gauna na Tui Juta? Ia e na gauna sa qase kina sa tauvi mate na yavana.

²⁴ A sa moce vata kei ira na nona qase ko Esa, ka sa bulu vata kei ira na nona qase e na koro i Tevita na nona qase, ka sa tui ko Josefati na luvena me kena i sosomi.

Sa Tui Isireli ko Netapi

²⁵ A sa tekivu me lewa vei ira na Isireli ko Netapi, na luve i Jeropoama, e na kenai karua ni yabaki i Esa na tui Juta, a sa tui vei ira na Isireli ka yabaki rua.

²⁶ A sa daucaka ca ko koya e na mata i Jiova, ka muria nai tovo i tamana, kei na nona i valavala ca ka vakaivalavalacataki ira kina na Isireli.

²⁷ A sa buki kena vere ko Pasa na luve i Eaija, e na vuvale i Isakari; a sa mokuti koya ko Pasa mai Kipiconi, sa nodra na kai Filisitia, ni ra sa tiko vakaivalu ki Kipiconi ko Netapi kei ira kecega na Isireli.

²⁸ Ia sa vakamatei koya ko Pasa e na kenai katolu ni yabaki i Esa na tui Juta, ka sa tui ko koya me kena i sosomi.

²⁹ Ia ni sa tui ko koya, sa mokuti ira kecega na lewe-ni-vuvale i Jeropoama; sa sega ni vakabula vei Jeropoama e dua sa cegu rawa, ka sa vakarusai koya oti, me vaka na vosa i Jiova ka cavuta ko koya e na gusu ni nona tamata ko Eaija na kai Sailo—

³⁰ e na vuku ni valavala ca i Jeropoama ka kitaka ko koya, ka sa vakaivalavalacataki ira kina na Isireli, e na nona i valavala ka vakacudrui Jiova kina na nodra Kalou ni Isireli.

³¹ Ia na kena vo ni cakacaka i Netapi, kei na ka kecega ka cakava ko koya, sa sega li ni volai e nai Vola ni Veika sa Caka e na Nodra Gauna na Tui Isireli?

³² A rau sa veivaluti ko Esa kei Pasa na tui Isireli e na nodrau gauna kecega.

Sa Tui Isireli ko Pasa

³³ E na kenai katolu ni yabaki i Esa na tui Juta, sa tekivu me lewa ko Pasa, na luve i Eaija, vei ira kecega na Isireli mai Tirisa, ka sa lewa yabaki ruasagavulu-ka-va.

³⁴ A sa daucaka ca ko koya e na mata i Jiova, ka muria nai tovo i Jeropoama, kei na nona i valavala ca sa vakaivalavalacataki ira kina na Isireli.