1 Tui 14 - Ai Vola Tabu (Vakadewa Makawa Vakavoutaki 2021)

Na Mate ni Luvei Jeropoama

¹ E na gauna ko ya sa tauvi mate ko Apaija na luve i Jeropoama.

² A sa kaya ko Jeropoama vua na watina, “Mo tucake mada, ka liayalewa tani, mo kakua ni kilai kina ni ko sa wati Jeropoama, ka lako ki Sailo. Raica, sa tiko mai kea ko Eaija na parofita, o koya ka tukuna vei au ni'u na nodra tui na tamata oqo.

³ Ia mo kauta vata kei iko e tini nai buli madrai, ka so na keke, ka dua na tavaya oni, ka lako vua. Ena tukuna vei iko ko koya na ka ena yaco vua na gone.”

⁴ A sa kitaka vakakina na wati Jeropoama, ka cavu tu, ka lako ki Sailo, ka lako ki na vale i Eaija. Ia sa sega ni rai rawa ko Eaija, ni sa buawa na matana ni sa qase sara.

⁵ A sa kaya vei Eaija ko Jiova, “Raica, sa lako tiko mai na wati Jeropoama me taroga vei iko se na vakaevei na luvena; ni sa tauvi mate ko koya. Mo qai vosa vua me vaka ka vaka.” Ni sa curu yani ko koya, a sa vakalecaleca me vaka e duatani tale na yalewa.

⁶ Ia ni sa rogoca na vadugu ni yavana ko Eaija, ni sa curu mai ko koya e katuba, sa kaya, “Mo curu mai, na wati Jeropoama. A cava ko sa liayalewa tani kina? Ni sai tukutuku bibi ka'u sa talai kina vei iko.

⁷ Mo lako, mo kaya vei Jeropoama, ‘Sa vosa vakaoqo ko Jiova na nodra Kalou na Isireli: Ni ka'u a vakalevui iko cake mai vei ira na tamata, ka lesi iko mo tui vei ira na noqu tamata na Isireli,

⁸ ka kaliraka na matanitu mai na vale i Tevita, ka solia vei iko; ia ko sa sega ga ni vakataki Tevita na noqu tamata, o koya ka vakabauta na noqu i vakaro, ka muri au e na yalona taucoko, me cakava ga na ka e dodonu vei au,

⁹ ka ko sa ia nai valavala ca sa uasivia na nodra i valavala ca kecega era a bula eliu vei iko, ni ko sa la'ki cakava eso na nomu kalou tani, kei na matakau eso sa vakawaicalataki, ka me vakacudrui au, ka sa biuti au ki dakumu;

¹⁰ o koya oqo, ka'u na vakayacora kina na ca ki na vale i Jeropoama, ka muduka laivi vei Jeropoama na tagane kecega, io ko koya sa sogolati, kei koya sa lako voli, e Isireli, ia ka'u na taviraka tani na vo ni vuvale i Jeropoama, me vaka sa taviraka tani na de-ni-manumanu na tamata, ka me oti kece sara.

¹¹ O koya sa mate vei Jeropoama e na koro, ena kania na koli; kei koya sa mate e na were, ena kania na manumanu vuka, ni sa tukuna ko Jiova.’

¹² Ia ko iko, mo ia, mo lako ki na nomu vale. Ia ni sa curu ki na koro na yavamu, ena ciba na gone.

¹³ A ra na tagicaki koya ko ira kecega na Isireli, ka buluta; ni na yaco ki nai bulubulu ko koya duaduaga mai vei Jeropoama, ni sa kune vua na ka vinaka vei Jiova, na nodra Kalou na Isireli, e na vale i Jeropoama.

¹⁴ Ia ena vakatubura ko Jiova e dua na tui vei ira na Isireli, o koya ena muduka laivi na vuvale i Jeropoama e na siga oqo, ka sa kena gauna oqo.

¹⁵ “Ia ena yaviti ira na Isireli ko Jiova, me vaka sa vakayavalati na gasau e na wai; ka na cavuivuvutaki ira na Isireli mai na vanua vinaka oqo, ka solia ko koya vei ira na nodra qase eliu, ka na duibiubiuti ira ki tai kadua ni Uciwai, ni ra sa cakava na nodra veikalou-yalewa ni veikau, ka vakacudrui Jiova.

¹⁶ Ia ena biuti ira tani na Isireli e na vuku ni valavala ca sa kitaka ko Jeropoama, ka ni sa vakaivalavalacataki ira kina na Isireli.”

¹⁷ A sa ia na wati Jeropoama, ka lesu yani, ka yaco ki Tirisa. Ia ni sa yaco ko koya ki nai lago ni katuba, sa ciba na gone.

¹⁸ A ra sa buluta, ka ra sa tagicaka ko ira kecega na Isireli, me vaka na vosa i Jiova, ka cavuta ko koya e na gusu ni nona tamata ko Eaija na parofita.

Na Mate i Jeropoama

¹⁹ Ia na vo ni cakacaka i Jeropoama, na nonai valu, kei na nona lewa, raica, sa volai e nai Vola ni Veika sa Caka e na Nodra Gauna na Tui Isireli.

²⁰ Ia na gauna sa lewa kina ko Jeropoama sa ruasagavulu ka rua na yabaki. A sa moce vata kei ira na nona qase, a sa tui ko Netapi na luvena, me kenai sosomi.

Ko Reopoama na Tui Juta

²¹ A sa tui mai Juta ko Reopoama na luve i Solomoni. Sa vasagavulu ka dua na yabaki i Reopoama ni sa buli me tui, a sa tinikavitu na yabaki sa lewa kina ko koya mai Jerusalemi, na koro ka digitaka ko Jiova mai na nodra veiyavusa kecega na Isireli, me vakatikora kina na yacana. Ia na yaca i tinana ko Neema, na yalewa ni Amoni.

²² A ra sa daucaka ca ko ira na Juta e na mata i Jiova; a ra sa vakavuvutaki koya vakalevu e na nodra i valavala ca era sa cakava, ka vakalailai ko ira kece na nodra qase.

²³ Ni ra sa tara talega na nodra veitikina cecere, kei na veimatakau, kei na veikau lalai eso, e na veiulu-ni-koro cecere kecega, kei na ruku ni kau bulabula kecega;

²⁴ ka sa so na tamata talega e na vanua era sai valavala vaka-Sotoma. Era sa vakayacora na veika vakasisila kecega ni veimatanitu ka sa vakaseva tani ko Jiova e matadra na Isireli.

²⁵ A sa yaco e na kenai kalima ni yabaki i Reopoama na tui, sa la'ki vala ki Jerusalemi ko Sisaki na tui Ijipita.

²⁶ A sa kauta tani nai yau mai na vale i Jiova kei nai yau mai na nona vale na tui; sa kauta kece yani. A sa kauta talega nai sasabai koula kecega ka cakava ko Solomoni.

²⁷ A sa cakava ko Reopoama na tui eso nai sasabai parasa me kedrai sosomi, ka solia kivei ira na turaga-ni-valu i vakatawa, ko ira sa vakatawa mai na katuba ni nona vale na tui.

²⁸ Ia ni sa la'ki curu na tui ki na vale i Jiova, sa qai kauta oqori ko ira nai vakatawa, a sa qai vakasuka ki na nodra vale nai vakatawa.

²⁹ Ia na vo ni cakacaka i Reopoama, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?

³⁰ A rau sa veivaluti tiko ko Reopoama kei Jeropoama e na nodrau gauna kecega.

³¹ A sa moce vata kei ira na nona qase ko Reopoama, a sa bulu vata kei ira na nona qase e na koro i Tevita. Ia na yaca i tinana ko Neema, na yalewa ni Amoni. A sa tui ko Epaijami na luvena, me kena i sosomi.