1 Tui 13 - Ai Vola Tabu (Vakadewa Makawa Vakavoutaki 2021)

Na Tamata ni Kalou mai Juta

¹ Ka raica, sa lako yani e dua na tamata ni Kalou mai Juta ki Peceli, ni sa vosa vua ko Jiova. A sa wavu tu ko Jeropoama mai nai cabocabo-ni-soro me vakama na ka boi vinaka.

² Ka sa qai kaci na tamata ni Kalou ki nai cabocabo-ni-soro e na vosa i Jiova, ka kaya, “I cabocabo-ni-soro, i cabocabo-ni-soro, sa kaya vakaoqo ko Jiova: ‘Raica, ena sucu e dua na gonetagane mai na vale i Tevita, ko Josaia na yacana, ka na vakacabori iratou ko koya e delamu na bete ni veitikina cecere, ko iratou ka vakama na ka boi vinaka e delamu, ka na vakamai e delamu na sui ni tamata.’ ”

³ Ka sa solia talega e dua nai vakatakilakila e na siga ko ya, ka kaya, “Sa vakaoqo nai vakatakilakila ni sa tukuna oqo ko Jiova: ‘Raica, sa na kavida nai cabocabo-ni-soro, ka na tasova na dravusa sa koto e delana.’ ”

⁴ Ia ni sa rogoca ko koya na tui na nona vosa na tamata ni Kalou, o koya ka kaci ki nai cabocabo-ni-soro mai Peceli, sa qai dodoka yani na ligana ko Jeropoama mai nai cabocabo-ni-soro, ka kaya, “Vesuki koya!” A sa malai sara na ligana ka dodoka yani vua ko koya, ka sa sega tale ni lokia rawa vua.

⁵ A sa kavida nai cabocabo-ni-soro, ka sa tasova na dravusa mai nai cabocabo-ni-soro, me vaka nai vakatakilakila ka solia na tamata ni Kalou e na vosa i Jiova.

⁶ Ka sa vosa na tui, ka kaya vua na tamata ni Kalou, “Mo vakamasuti Jiova mada na nomu Kalou, ka masulaki au, ka me'u lokia rawa tale vei au na ligaqu.” A sa vakamasuti Jiova na tamata ni Kalou, ka sa lokia rawa tale na ligana na tui, ka sa vinaka tale me vaka eliu.

⁷ A sa kaya na tui vua na tamata ni Kalou, “Daru lako ki vale, mo vakacegu kina, ia ka'u na solia vei iko e dua na ka-ni-loloma.”

⁸ Ia sa kaya vua na tui ko koya na tamata ni Kalou, “Kevaka mada ga ko ni na solia vei au e veimama na nomuni matanitu, au na sega ga lako vata kei kemuni, se kania na kakana se gunu wai e na tikina oqo,

⁹ ni'u sa vakaroti vakakina e na vosa i Jiova, ka vaka, ‘Mo kakua ni kania na kakana se gunu wai, se lesu tale yani e na sala ko a lako kina.’ ”

¹⁰ A sa mani lako yani ko koya e na sala tani, ka sega ni lesu tale e na sala ka lako kina ki Peceli.

¹¹ A sa bula voli mai Peceli e dua na parofita qase. Sa qai lako mai ko iratou na luvena ka tukuna vua na cakacaka kecega ka cakava mai Peceli na tamata ni Kalou e na siga ko ya. Eratou sa tukuna talega vua na tamadratou na vosa sa tukuna ko koya vua na tui.

¹² A sa kaya vei iratou na tamadratou, “A sala cava sa lako kina ko koya?” A ratou vakaraitaka sara vua ko iratou na luvena na sala ka lako kina na tamata ni Kalou, o koya ka lako mai Juta.

¹³ Sa qai kaya vei iratou na luvena, “Dou vauca mada nai vodovodo ki na asa me'u vodo kina.” A ra sa vauca nai vodovodo ki na asa, ka sa vodoka ko koya.

¹⁴ A sa vakamuria na tamata ni Kalou, ka kunei koya ni sa tiko e na dua na ruku ni vuni oki. A sa kaya vua, “O iko beka na tamata ni Kalou ka lako mai Juta?” A sa kaya ko koya, “Koi au oqo.”

¹⁵ A sa kaya vua, “Me daru lako ki noqu vale ka kania mada eso na kakana.”

¹⁶ A sa kaya, “E tabu me'u lesu vata kei iko, se lako vata kei iko; au na sega talega ni kania na kakana se gunu wai kei iko e na tikina oqo,

¹⁷ ni sa vakaroti vei au e na vosa i Jiova, ‘Mo kakua ni kania na kakana se gunu wai mai kea, se lesu tale mo lako e na sala ko a lako mai kina.’ ”

¹⁸ A sa kaya vua, “Au sa parofita talega koi au me vakataki iko, ka sa vosa vei au e dua na agilosi e na vosa i Jiova, ka kaya, ‘Mo vakalesui koya mai vei iko ki na nomu vale, me kania na kakana ka gunu wai.’ ” Ia sa lasu ga vua ko koya.

¹⁹ Sa qai lesu vata kaya, ka kania na kakana ka gunu wai, e na nona vale.

²⁰ A sa yaco ni rau sa tiko vata mai na tepeli, sa lako mai na vosa i Jiova vua na parofita ka kauti koya mai.

²¹ Ka sa kaci ko koya vua na tamata ni Kalou ka lako mai Juta, ka kaya, “Sa vosa vakaoqo ko Jiova: Ni ko a talaidredre ki na vosa i Jiova, ka sega ni talairawarawa ki nai vakaro ka vakarota vei iko ko Jiova na nomu Kalou,

²² ia sa lesu ga mai, ka kania na kakana ka gunu wai ena tikina ka vakaroti kina vei iko, ‘Mo kakua ni kania na kakana se gunu wai,’ ena sega kina ni bulu na yagomu e na nodra i bulubulu na nomu qase.”

²³ Ia ni sa kana oti ka gunu oti ko koya, sa vauca ko koya nai vodovodo ki na asa me vodo kina na parofita ka kauta tale mai.

²⁴ Ia ni sa lako tu ko koya, sa donui koya e na sala e dua na laione, ka vakamatei koya. A sa biu tu e na sala na yagona, ka sa tu voleka kina na asa; sa tu voleka talega ki na yagona na laione.

²⁵ Ka raica, era sa veilakoyaki na tamata, ka raica ni sa koto no e na sala na yagona, ka tu voleka ki na yagona na laione. A ra sa la'ki tukuna e na koro sa tiko kina na parofita qase.

²⁶ Ia ni sa rogoca na parofita ka vakalesui koya mai na sala, sa kaya ko koya, “Ko ya na tamata ni Kalou, o koya ka talaidredre ki na gusu i Jiova; a sa soli koya kina ko Jiova ki na laione, o koya sa basuraki koya, ka vakamatea, me vaka na vosa i Jiova ka vosataka vua.”

²⁷ Sa qai kaya vei iratou na luvena, “Dou vauca mada nai vodovodo ki na asa e na vukuqu.” A ratou sa vauca.

²⁸ A sa lako ko koya, ka kunea na yagona sa biu no e na sala, kei na asa kei na laione erau sa tu voleka ki na yagona. Sa sega ni kania na yagona na laione, se basuraka na asa.

²⁹ A sa laveta na yago ni tamata ni Kalou ko koya na parofita, ka vakavodoka ki na asa, ka kauta lesu tale mai. A sa lesu ki na koro na parofita qase, me tagi, ka me buluti koya.

³⁰ A sa vakotora na yagona e nona i bulubulu, ka ratou sa tagicaki koya, ka vaka, “Isa, na taciqu!”

³¹ Ia ni sa buluta oti ko koya, sa vosa vei iratou na luvena, ka kaya, “Ni'u sa mate, dou buluti au e nai bulubulu sa bulu kina na tamata ni Kalou; dou vakotora vata na suiqu kei na suina.

³² Ni na yaco vakaidina na vosa ka kacivaka ko koya e na vosa i Jiova e na vuku ni cabocabo-ni-soro mai Peceli, kei na veivale kecega e na veitikina cecere mai na veikoro vaka-Samaria.”

³³ Ni sa oti na ka oqo sa sega ni biuta tani ko Jeropoama na nona i valavala ca, ka sa lesia tale me ra bete ni veitikina cecere na tamata wale. O koya sa vinakata, sa bulia ko koya me bete ni veitikina cecere.

³⁴ Ia na ka oqo sa vu ni ca ki na vale i Jeropoama, ka me muduki tani kina, ka me vakarusai tani mai na dela i vuravura.