1 Tui 10 - Ai Vola Tabu (Vakadewa Makawa Vakavoutaki 2021)

Veisiko na Ranadi ni Sipa vei Solomoni

¹ Ia ni sa rogoca ko koya na ranadi ni Sipa na kenai rogorogo kei Solomoni e na vuku ni yaca i Jiova, sa lako me vakatovolei koya e na vosa vakaibalebale vuni.

² A sa lako ko koya ki Jerusalemi kei na nona lewe-ni-sala era lewe vuqa sara, kei na kameli eso sa vakavodoki kina na ka boi vinaka, kei na koula na ka levu sara, kei na vatu talei. Ia ni sa yaco ko koya vei Solomoni, erau sa veivosaki kaya e na ka kecega sa tu e na lomana.

³ A sa tukuna vua ko Solomoni na ka kecega sa taroga ko koya; sa sega e dua na ka sa vuni vua na tui, me sega ni tukuna vua ko koya.

⁴ Ia ni sa raica oti ko koya na ranadi ni Sipa na vuku kecega i Solomoni, kei na vale sa tara oti ko koya,

⁵ kei na kakana mai na nona tepeli, kei na nodra tiko na nona tamata, kei na nodra tu era sa qaravi koya, kei na nodra i sulu, kei ira era dautu na mena, kei na nona i cabecabe sa cabe kina ko koya ki na vale i Jiova, sa yali na nona lomadei.

⁶ A sa kaya ko koya vua na tui, “Sai rogorogo dina ka'u a rogoca e na noqu vanua, e na vuku ni nomu i valavala kei na nomu vuku,

⁷ ia ka'u a sega ga ni vakadinata na vosa, ka'u a qai lako mai, ka sa raica na mataqu, ka'u sa qai vakadinata. Ka raica, sa ka lailai sa tukuni vei au, ka levu na ka sa sega ni tukuni. Sa uasivi cake na nomu vuku kei na nomu tiko sautu e na ka ka'u a rogoca.

⁸ Sa kalougata ko ira na nomu tamata, sa kalougata ko ira oqo era dauqaravi iko, ka tu e matamu e na veisiga, ka rogoca na nomu vuku.

⁹ Me vakavinavinakataki ko Jiova na nomu Kalou, o koya sa vinakati iko, ka vakatikori iko e nai tikotiko vakaturaga ni Isireli! Ni sa lomani ira na Isireli tikoga ko Jiova, sa lesi iko kina mo tui, me ia na lewa kei na ka e dodonu.”

¹⁰ A sa qai solia ko koya vua na tui e dua na drau ka ruasagavulu na taledi koula, kei na ka boi vinaka na ka levu sara, kei na vatu talei eso. Sa sega tale ni kau e muri na ka boi vinaka me tautauvata na kena levu kei na ka ko ya ka solia na ranadi ni Sipa kivei Solomoni na tui.

¹¹ Ia na veiwaqa i Irami ka usa mai na koula mai Oferi, sa kauta na kau talei na ka levu, kei na vatu talei.

¹² A sa cakava ko koya na tui e na kau talei nai tatakuri ni cabecabe ki na vale i Jiova kei na vale-ni-tui, na api talega kei na soliteri vei ira na dau-ni-sere. Sa sega na kau talei me tautauvata kaya sa kau kina, se raici, ka yacova na siga oqo.

¹³ A sa solia vua na ranadi ni Sipa ko Solomoni na tui na ka kecega sa gadreva ko koya, na ka kecega sa kerea, kei na ka talega sa via solia vakaturaga vua ko Solomoni. A sa lesu ko koya, ka lako ki na nona vanua, ko koya kei ira era qaravi koya.

Nai Yau nei Solomoni

¹⁴ Ia na kena bibi na koula sa kau vei Solomoni e na dua na yabaki, sa ono na drau ka onosagavulu ka ono na taledi koula,

¹⁵ kei na kenai kuri mai vei ira na tamata dauveivoli era veilakoyaki tu, kei ira na tamata dauveivoli e na ka boi vinaka, mai vei ira talega na tui Arapea kecega, kei ira na kovana sa lewa na vanua.

¹⁶ A sa cakava ko Solomoni na tui e rua na drau nai sasabai e na koula sa lautuki; sa caka e dua nai sasabai e na koula e ono na drau na sikeli.

¹⁷ Kei nai sasabai lalai e tolu na drau e na koula sa lautuki; sa caka e dua nai sasabai e na koula e tolu na paudi. A sa virikotora ko koya na tui ki na vale ni veikau mai Lepanoni.

¹⁸ A sa cakava ko koya na tui a dua nai tikotiko levu sara ka vakaturaga, e na ivori, ka botana e na koula dina.

¹⁹ Sa ono nai tagede e nai cabecabe ni tikotiko vakaturaga, ia nai tikotiko vakaturaga e cake sa leleci na dakuna. A sa vakaisobesobe na yasa ruarua ni dabedabe, a sa tu voleka ki nai sobesobe e rua na laione,

²⁰ a sa tinikarua na laione sa tu mai kea, e ono e na yasa ni tagede e dua, ka ono e na yasa ni tagede kadua. Sa sega na ka e vakakina sa caka e na dua na matanitu tani.

²¹ Na bilo ni gunu kecega i Solomoni na tui sa koula, ka sa koula talei na bilo kecega mai na vale ni veikau mai Lepanoni. Sa sega e dua sa siliva—ni sa sega ni okati me ka taleitaki e na gauna i Solomoni.

²² Ni sa tiko mai na wasawasa mai Tasisi na nona veiwaqa na tui, kei na veiwaqa i Irami. A sa dautale vakadua mai e na veiyabaki tolu na veiwaqa ni Tasisi, ka usana mai na koula, kei na siliva, na ivori, ka so na maqe, ka so na pikoki.

²³ A sa uasivi cake ko Solomoni na tui vei ira kecega na tui kei vuravura e nai yau kei na vuku.

²⁴ A sa via raici Solomoni ko ira kecega na kai vuravura, me ra rogoca na nona vuku sa vakayacora ki na yalona ko koya na Kalou.

²⁵ A ra sa kauta na tamata yadua na nona i loloma, eso nai yaya siliva, ka so nai yaya koula, kei nai sulu, kei nai sulu ni valu, kei na ka boi vinaka, eso na ose, ka so na meule, na nodra i tavi yadua e na veiyabaki.

²⁶ A sa vakasoqona vata ko Solomoni na qiqi-ni-valu, kei ira na tamata dauvodo ose. A sa dua na udolu ka va na drau na nona qiqi-ni-valu ka le tinikarua na udolu na tamata dauvodo ose, a sa lesi ira me ra tiko e na veikoro ni qiqi-ni-valu, ka vei koya na tui mai Jerusalemi.

²⁷ A sa vakatautauvatataka ko koya na tui na siliva kei na vatu mai Jerusalemi, kei na veisitari me vaka na veilolo sa tu e na vanua buca ni sa ka levu.

²⁸ A sa kau tiko mai kivei Solomoni na ose eso mai Ijipita, ka sa taura na qele ni ose ko ira na nona tamata dauveivoli na tui, e na kedrai voli na qele yadua.

²⁹ A sa rawa ni voli e dua na qiqi-ni-valu mai Ijipita ka kenai sau e ono na drau na siliva, ka kenai sau e dua na ose e dua na drau ka limasagavulu, ka ra sa ia kina na nona tamata dauveivoli na tui me ra vakauta vei ira kecega na nodra tui na Itaiti kei ira na tui Siria.