1 Timoci 6 - Ai Vola Tabu (Vakadewa Makawa Vakavoutaki 2021)

Vakarokorokotaki Ira na Turaga

¹ Ko ira kecega na tamata era sa tiko bobula, me ra kilai ira na nodra turaga me ra vakarokorokotaki ira vakalevu, me kakua ni vosavakacacataki kina na yaca ni Kalou kei na lotu.

² Ia ko ira sa qarava na turaga era sa vakabauta, me ra kakua ni beci ira, ni ra sa veiwekani; ia me ra qaravi ira vakalevu cake, ni ra sa vakabauta ka ra lomani ko ira sa nodra na ka yaga. A veika oqo mo vakatavulica ka vakarota.

Nai Vakavuvuli Lasu kei na Vutuniyau Dina

³ Kevaka e dua sa vakavuvuli vakatani, ka sega ni vinakata na vosa vinaka, io na nona vosa na noda Turaga ko Jisu Karisito, kei nai vakavuvuli sa vakalotu;

⁴ sa viavia levu ko koya, ka sa sega na ka e kila, a sa dauvinakata na veileti kei na veibataka na vosa walega, sa tubu kina na vuvu, na veivala, na vosavakacaca, na daunanuma ca,

⁵ na nodra veileti tawa yaga na tamata lomaca ka sa takali kina nai vakavuvuli dina, era sa nanuma ni sa ka ni yau na lotu. Mo lako tani vei ira sa vakaoqo.

⁶ Ia sai yau levu na lotu kei na lomavinaka;

⁷ ni sa sega na ka eda sa kauta mai ki vuravura, ka sa dina sara ni sa sega na ka eda na kauta tani rawa.

⁸ Ia kevaka sa tu vei keda na kakana kei nai sulu, me da lomavinaka kina.

⁹ Ia ko ira era sa gadreva me ra vutuniyau, era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa.

¹⁰ Ni sa vu ni ka ca kecega na dau lomana nai lavo. Era sa daukocova eso ka ra sa vakacalai kina e na vakabauta, a ra sa cokai ira sara vakai ira e na yaluma vakavuqa.

Nai Vakaro vei Timoci

¹¹ Ia ko iko, na tamata ni Kalou, mo dro tani mai na veika oqo; mo muria na yalododonu, na lotu, na vakabauta, na loloma, na vosota, na yalomalua.

¹² Mo ia ga nai valu vinaka ni vakabauta. Taura na bula tawa mudu, o koya ko sa kacivi kina ka ko sa vakayacora talega kina na vakatusa vinaka e na matadra na dauvakadinadina era sa lewe vuqa.

¹³ Au sa vakarota vei iko e na mata ni Kalou, o koya sa vu ni bula kecega, kei Karisito Jisu, o koya ka vakayacora na vakatusa vinaka e na mata i Ponitio Pailato;

¹⁴ mo taura matua nai vakaro, mo kakua ni tauvi-duka, mo tawa cala, ka malua mada me rairai mai na noda Turaga ko Jisu Karisito,

¹⁵ o koya ena vakatakila e na nona gauna—na Turaga levu duaduaga ka daumaka, na nodra Tui na tui, kei na nodra Turaga na turaga.

¹⁶ O koya sa tu vei koya duaduaga na bula tawa mudu, sa tiko e na rarama sa sega ni torovi rawa, sa sega na tamata sa raica, se raica rawa; me nona ga na vakarokoroko kei na kaukauwa e sega ni mudu. Emeni.

¹⁷ Vakarota vei ira era sa vutuniyau e na gauna oqo me ra kakua ni dokadokai ira se vakararavi e nai yau sa sega ni tudei, ia ki vua ga na Kalou bula, o koya sa solia vakalevu vei keda na ka kecega eda marau kina.

¹⁸ Me ra caka vinaka, me ra vutu ni cakacaka e yaga, me ra lomasoli, me ra vakarau tu e na veivuke,

¹⁹ me ra binia tu me nodra na yavu ena yaga e na gauna e muri mai, me ra taura kina na bula sai koya na bula dina.

Nai Vakasala Vakatama kei na Masu

²⁰ I Timoci, mo taura matua na ka sa soli vei iko. Mo lako tani mai na dautalanoa ca ka sega ni yaga, kei nai vakavuvuli tani sa vakatokai vakailasu me vuku,

²¹ ni ra sa kaya eso era sa vakadinata, ka ra sa cala e na vakabauta. Me nomudou na loloma. Emeni.