1 Timoci 4 - Ai Vola Tabu (Vakadewa Makawa Vakavoutaki 2021)

Ko Ira na Dauvakatavuvuli Vakailasu

¹ Ia sa tukuna vakamacala na Yalo Tabu ni na vuki tani eso mai na vakabauta e na gauna e muri, ni ra vakarogoca eso na yalo e dauveivakacalai kei na nodra i vakavuvuli na tevoro;

² e na nodra dauveivakaisini era sa vosa lasu, sa tavuni na nodra lewa-e-loma me vaka e na kaukamea katakata;

³ era sa dau tarova na vakawati, a ra sa vakatabuya na kakana eso, sa cakava na Kalou me ra kania ka vakavinavinaka kina ko ira sa vakabauta ka kila nai vakavuvuli dina.

⁴ Ni sa vinaka na ka kecega sa cakava na Kalou, a sa sega na ka me beci, kevaka sa da vakavinavinaka kina ni da kania;

⁵ ni sa vakasavasavataki e na vosa ni Kalou kei na masu.

Na Dauveiqaravi Vinaka i Jisu Karisito

⁶ Kevaka ko sa vakananumi ira na veiwekani e na veika oqo, ko na qai dauveiqaravi vinaka i Karisito Jisu, sa vakatuburi cake e na vakabauta kei nai vakavuvuli vinaka ko ya ko sa dau muria.

⁷ Ia mo kakua ni goleva nai tukuni makawa dauveivakacalai kei na vosa lialia ni yalewa qase, ia mo dauvakaogai iko ga e na bula vakalou;

⁸ ni sa yaga vakalailai ga na vakaukauwa yago, ia na lotu sa yaga e na ka kecega, ni sa yalataki kina na ka ni bula oqo vata kei na ka ni bula talega ena muri mai.

⁹ Sa dina sara nai vosavosa oqo, ka sa yaga me vakabauti vakalevu.

¹⁰ Ni sai koya ga oqo keitou sa daucakacaka kina ka sa vakalialiai, ni keitou sa vakararavi ki na Kalou bula, nai Vakabula ni tamata kecega, ka sa nodra dina sara era sa vakabauta.

¹¹ A veika oqo mo vakarota ka vakatavuvulitaka.

¹² Me kakua ni beci iko e dua ni ko sa cauravou, ia mo yaco mo nodra i vakarau era sa vakabauta, e na vosa, e nai valavala, e na loloma, e na lomadina, e na yalosavasava.

¹³ Mo gumatua e na wili vola, e na dauveivakaroti, e nai vakavuvuli, ka yacova na noqu lako yani.

¹⁴ Kakua ni weletaka nai solisoli sa tu vei iko, o koya ka soli vei iko e na parofisai, kei na veitabaki ni ligadra nai talatala qase.

¹⁵ Mo dauvakananuma na veika oqo, me ra rawai iko sara, me rairai kina ni ko sa vuku cake mai e na ka kecega.

¹⁶ Vakaraici iko vinaka, kei nai vakavuvuli. Mo tudei kina, baleta ni kevaka ko sa kitaka vakaoqo, ko na vakabulai iko kei ira talega era sa rogoci iko.