1 Timoci 3 - Ai Vola Tabu (Vakadewa Makawa Vakavoutaki 2021)

Ko Ira me ra Veiliutaki ena Lotu

¹ Sa dina na vosa: Kevaka e dua sa gadreva na cakacaka vakaitalatala qase, sa gadreva na cakacaka vinaka.

² O koya sa kilikili kaya nai talatala qase me tawa cala, me dua bauga na watina, me yalomamakutu, me yalomatua, mei valavala dodonu, me daulomasoli, me vakatavuvuli vakavuku;

³ me kakua ni daugunu waini, me kakua ni dauveivala, me kakua ni daugarova nai yau vakasisila; ia me yalomalua, me kakua ni daucudrucudru, me kakua ni daukocova nai lavo.

⁴ Me lewai ira vinaka na nona lewe-ni-vuvale, ka me talairawarawa ko ira na luvena ka ia nai valavala sa kilikili—

⁵ ka kevaka sa dua na tamata sa sega ni lewai ira rawa na nona lewe-ni-vuvale, ena raica vakavinaka vakaevei nai soqosoqo lotu ni Kalou?

⁶ Me kakua ni dua ka se qai lotu vou, de viavialevu, ka cudruvi kina me vaka na tevoro.

⁷ A sa dodonu talega me rogo vinaka vei ira e taudaku, de bale ki na ka ena vosavakacacataki kina, kei nai cori ni tevoro.

Ko Ira me ra Dauveivuke ena Soqosoqo Lotu

⁸ Me yaloqaseqase ko ira talega na tuirara, me ra kakua ni veivakaisini e na vosa, me ra kakua ni guta vakalevu na waini, me ra kakua ni daugarova nai yau vakasisila;

⁹ me ra taura matua nai vakavuvuli ka vuni eliu era sa qai vakabauta, e na lewa-e-loma vinaka.

¹⁰ Ia me ra vakatovolei mada eliu ko ira talega oqo; me ra qai yaco me tuirara ni ra sa sega ni cala.

¹¹ Me yaloqaseqase ko ira talega na yalewa, me ra kakua ni daukakase, me ra yalomatua, ka lomadina e na ka kecega.

¹² Me sa yadua ga na watidra na tuirara, ia me ra lewai ira vinaka na luvedra, kei na nodra lewe-ni-vuvale.

¹³ Ia ko ira era sa kitaka vinaka na cakacaka ni tuirara, era sa rawata kina me ra tubu cake, a ra sa doudou talega me tukuna na vakabauti Karisito Jisu.

Nai Tukutuku Vuni ni Noda Lotu

¹⁴ A veika oqo ka'u sa vola vei iko, ia ka'u sa vakanuinui me'u lako kusarawa yani vei iko,

¹⁵ ia kevaka ka'u sa dede, mo kila nai valavala sa kilikili kei ira na tamata e na vale ni Kalou, oqori nai soqosoqo lotu ni Kalou bula, na duru kei na yavu ni vakavuvuli dina.

¹⁶ Ia na ka oqo sa sega ni veiletitaki ni sa ka levu na ka ni Kalou ka vuni tu e liu: Sa rairai vakatamata na Kalou, sa vakadinadina vei koya na Yalo Tabu, sa raici koya na agilosi eso, sa vunautaki ko koya vei ira na veimatanitu, sa vakabauti koya eso na kai vuravura, sa kau cake ki na vanua vakaiukuuku.