1 Samuela 5 - Ai Vola Tabu (Vakadewa Makawa Vakavoutaki 2021)

Na Kato ni Kalou kei Ira na kai Filisitia

¹ Ia era sa taura na kato ni Kalou ko ira na kai Filisitia, ka kauta tani mai Epenisa ki Asitoti.

² Ia ni ra sa kauta na kato i Jiova na kai Filisitia, era sa kauta mai ki na burekalou i Tekoni, ka vakatikora voleka vei Tekoni.

³ Ia ni ra sa sou e na mataka na kai Asitoti, raica, sa bale vakatoboicu ki na qele ko Tekoni, e na mata ni kato i Jiova. A ra sa kauti Tekoni, ka vakatura tale e na nona i tutu.

⁴ Ia ni ra sa sou e na mataka e nai karua ni siga, raica, sa bale vakatoboicu ki na qele ko Tekoni e na mata ni kato i Jiova, a sa muduki tu e nai lago na ulu i Tekoni kei na qeteqete ni ligana ruarua; sa vo walega vua na yago i Tekoni.

⁵ O koya oqo era sa sega ni daubutuka kina nai lago ni burekalou i Tekoni mai Asitoti, ko ira na bete i Tekoni kei ira kecega sa curu ki na burekalou i Tekoni, ka yacova na gauna oqo.

⁶ A sa bikai ira sara na kai Asitoti na liga i Jiova, a sa vakacacani ira, ka dewavi ira na mate vuce, io, ko Asitoti kei na kena veiyasana.

⁷ Ia ni ra sa raica na kai Asitoti ni sa vakaoqo, era sa kaya, “Me kakua ni tiko vei keda na kato ni Kalou ni Isireli; ni sa bikai keda vakararawa na ligana, kei Tekoni talega na noda kalou.”

⁸ A ra sa talaki kina ka vakasoqona vata na nodra turaga kecega na kai Filisitia, ka ra kaya, “A cava me da kitaka e na vuku ni kato ni Kalou ni Isireli?” A ra sa kaya, “Me kau yani ki Kaca na kato ni Kalou ni Isireli.” A ra sa mani kauta yani na kato ni Kalou ni Isireli.

⁹ Ia ni sa oti na nodra kauta yani, sa qai vakacacana vakalevu sara na koro ko ya na liga i Jiova; a sa yaviti ira ko koya na lewe ni koro, ko ira na lelevu kei ira na lalai, a sa veidewavi vei ira na mate vuce.

¹⁰ Era sa mani vakauta yani kina na kato ni Kalou ki Ekironi. Ia ni sa yaco na kato ni Kalou ki Ekironi, era sa qoqolou na kai Ekironi, ka kaya, “Era sa kauta voli mai oqo vei keda na kato ni Kalou ni Isireli me vakamatei keda kei ira na kai noda.”

¹¹ A ra sa talaki ka vakasoqona vata kina na nodra turaga kecega na kai Filisitia, ka ra kaya, “Dou kauta tani na kato ni Kalou ni Isireli, ka me lesu tale ki na kena tikina, ia me kakua ni vakamatei keda kei ira na kai noda.” Ni sa dua na veivakacacani levu e na koro taucoko. Sa tau bibi sara mai kea na liga i Jiova.

¹² Ia ko ira na tamata ka sega ni mate sa dewavi ira na mate vuce, ka sa rogo cake ki lomalagi na nodra qoqolou na lewe ni koro.