1 Pita 5 - Ai Vola Tabu (Vakadewa Makawa Vakavoutaki 2021)

Na Qele ni Sipi ni Kalou

¹ Au sa vakarota vei ira nai talatala qase era tiko vei kemudou, ni'u sa qase talega koi au, ka sa dautukutuku e na ka ka vosota na Karisito, ka sai taukei talega ni ukuuku ena vakaraitaki mai e na gauna mai muri:

² dou vakania na qele-ni-sipi ni Kalou era sa tiko vei kemudou, ka dou vakatawana, kakua ga e na loma e vosota, e na loma ga e vinakata—kakua ga e na vuku ni yau vakasisila, ia e na loma ga e rekitaka.

³ Dou kakua ni valavala vakaboso vei ira sa tiko e rukumu, ia mo dou vakaraitaki vinaka ga vei ira na qele ni sipi.

⁴ Ia ni na rairai mai nai Vakatawa liu, dou na rawata kina nai sala vakaiukuuku ena sega ni malai rawa.

⁵ Oi kemudou talega na cauravou, dou vakayalomalumalumutaki kemudou vei ira na qase. Io, dou dui vakayalomalumalumutaki kemudou vakai kemudou, ka dou vakaisulu e na yalomalumalumu, ni “Sa vorati ira na viavialevu na Kalou, ia sa solia nai solisoli loloma vei ira sa yalomalumalumu.”

⁶ O koya oqo mo dou qai vakayalomalumalumutaki kemudou e ruku ni liga kaukauwa ni Kalou, me vakalevulevui kemudou cake ko koya e na gauna sa lokuci.

⁷ Ka dou biuta vei koya na nomudou lomaocaoca kecega, ni sa daunanumi kemudou ko koya.

⁸ Dou yalomatua, dou vakatawa. Sa veilakoyaki voli na nomudou meca na tevoro, me vaka na laione sa tagi, ka sa vakasaqara eso me tiloma.

⁹ Dou vorati koya ni dou sa tudei e na vakabauta, ni dou sa kila sa vakayacori na ka rarawa vakakina vei ira na wekamudou era sa tiko voli e vuravura oqo.

¹⁰ Ia na Kalou sa dauia na loloma kecega, o koya sa kacivi kemudou ki na nona i ukuuku tawa mudu e na vuku i Karisito Jisu, ni dou sa vakararawataki mada e na gauna eso, ena qai vakavinakataki kemudou sara, mo dou vakataudeitaki, mo dou vakaukauwataki.

¹¹ Me nona na lewa e na gauna kece ka sega ni mudu. Emeni.

A Kena i Tinitini kei na Loloma

¹² Au sa vola vakalailai ka ia nai vakaro, a sa kauta vei kemudou ko Silivenusi, o koya ka'u sa nanuma sa wekada dina, ia ka'u sa vakadinadina ni sa loloma dina ni Kalou dou sa tudei kina.

¹³ Sa loloma yani vei kemudou nai soqosoqo lotu, mai Papiloni, era sa digitaki vata kei kemudou; sa vakakina ko Marika na luvequ.

¹⁴ Dou dui veireguci vakai kemudou e na loloma. Me tu ga na vakacegu vei kemudou kecega sa tu vata kei Karisito Jisu. Emeni.