1 Joni 4 - Ai Vola Tabu (Vakadewa Makawa Vakavoutaki 2021)

Vakatovolei Ira na Veimataqali Yalo

¹ Oi kemudou sa lomani, kakua ni vakadinata na yalo kecega, ia dou vakatovolei ira na yalo se ra yalo mai vua na Kalou, se segai; ni ra sa lewe vuqa na parofita vakailasu era sa lako voli yani e vuravura.

² O koya oqo dou sa kila kina na yalo sa mai vua na Kalou: a yalo kecega sa vakatusa ni sa liatamata mai ko Jisu Karisito, sa mai vua na Kalou,

³ ia na yalo kecega sa sega ni vakatusa ni sa liatamata mai ko Jisu Karisito, sa sega ni mai vua na Kalou. Ia oqo sai koya na meca i Karisito, oqori dou a rogoca ni na lako mai, a sa tu e vuravura edaidai.

⁴ Oi kemudou na luvequ lomani, dou sa mai vua na Kalou, ia dou sa rawai ira, ni sa levu ko koya sa tiko e na lomamudou, ka lailai ko koya sa tiko e vuravura.

⁵ O ira era sa tamata vakavuravura; a ra sa vosataka kina na veika vakavuravura, ka sa vakarogoci ira ko ira na kai vuravura.

⁶ Oi keda, eda sa tamata ni Kalou. Sa vakarogoci keda ko koya sa kila na Kalou, ka sa sega ni vakarogoci keda ko koya sa sega ni tamata ni Kalou. E na ka oqo eda sa kila kina na yalo sa dina kei na yalo sa dauveivakacalai.

Sa Loloma na Kalou

⁷ Oi kemudou sa lomani, me da veilomani; ni sa mai vua na Kalou na loloma; ia ko koya yadua sa dauloloma, sa vakasucumi koya na Kalou, a sa kila na Kalou ko koya.

⁸ O koya sa sega ni dauloloma sa sega ni kila na Kalou; ni sa loloma na Kalou.

⁹ E na ka oqo sa vakaraitaki kina na loloma ni Kalou vei keda, ni sa tala ki vuravura na Luvena e dua bauga na Kalou, o koya ka vakatubura ko koya, me da bula e na vukuna.

¹⁰ E na ka oqo sa rairai kina na loloma, sa segai ni da a lomani koya na Kalou, ia ni sa lomani keda ko koya, a sa tala na Luvena mei bulubulu ni noda i valavala ca.

¹¹ Oi kemudou sa lomani, kevaka sa lomani keda vakaoqo na Kalou, sa dodonu me da veilomani vakai keda.

¹² Sa sega na tamata sa raica na Kalou e na dua na gauna. Kevaka eda sa veilomani, sa tiko e na lomada na Kalou, a sa levu sara na loloma vua e na lomada.

¹³ E na ka ga oqo eda sa kila ni da sa tiko sara vua, ia sa tiko ko koya e na lomada, e na vuku ni sa solia vei keda ko koya mai vua na Yalona.

¹⁴ Ia eda sa raica ka tukuna tiko ni sa tala na Luvena ko Tamada mei Vakabula kei vuravura.

¹⁵ O koya yadua sa vakatusa ni sa Luve ni Kalou ko Jisu, sa tiko sara na Kalou vei koya, ka sa tiko ko koya vua na Kalou.

¹⁶ Ia eda sa kila ka vakadinata na loloma ni Kalou vei keda. Sa loloma na Kalou; ia ko koya sa dautiko kei na loloma sa dautiko vata kei na Kalou, a sa tiko na Kalou e lomana.

¹⁷ E na ka oqo sa yaco kina me vakataucokotaki na loloma vei keda: ni da sa tautauvata kaya, ni da sa tiko e vuravura oqo, me da doudou kina e na siga ni lewa.

¹⁸ Sa sega ni tu vata na rere kei na loloma, ia sa biuta tani na rere na loloma sa vinaka sara; ni sa semati vata na rere kei na veicudruvi, ia ko koya sa rere sa sega ni se yacova na veivakataucokotaki e na loloma.

¹⁹ Eda sa lomani koya, e na vuku ni sa taumada na nona loloma vei keda.

²⁰ Kevaka sa kaya e dua, “Au sa lomana na Kalou,” ia sa cata na wekana, sa lasulasu ko koya. Kevaka sa sega ni lomana na wekana sa raica tiko ko koya, ena lomana vakaevei na Kalou ni sa sega ni raica?

²¹ Ia nai vunau oqo eda sa rawata mai vei koya: Me lomana talega na wekana ko koya sa lomana na Kalou.