NA SAME 33 - Vakavakadewa Makawa

E dodonu me da vakavinavinaka vua na Kalou e na vuku ni nona loloma, kei na nona kaukauwa, kei na nona lewa; me da vakararavi talega vua.

¹ Dou rekitaki Jiova, koi kemudou sa yalododonu; Ni sa kilikili kei ira na yalodina na vakavinavinaka.

² Vakavinavinaka vei Jiova e na api; Sere vua e na soliteri e tini na kena wa.

³ Seretaka vua na sere vou; Qiriqiri vakavinaka ka me rogo levu.

⁴ Ni sa dodonu na vosa i Jiova; Sa dinadina kecega na nona cakacaka.

⁵ Sa vinakata ko koya nai valavala dodonu kei na lewa dodonu; Sa roboti vuravura na loloma i Jiova.

⁶ Sa caka na lomalagi e na vosa i Jiova; Kei na lewena kecega e nai cegu ni gusuna.

⁷ Sa binia vata ko koya na wai ni wasa liwa mei binibini; Sa maroroya na wai titobu e na lololo.

⁸ Me rerevaki Jiova ko vuravura kecega; Me rerevaki koya ko ira kece sa tiko e vuravura.

⁹ Ni sa kaya ko Koya, ka sa yaco; Sa vakarota ko Koya, ka sa tu dei.

¹⁰ Sa vukica ko Jiova na nodra bose na veimatanitu me ka wale; Sa cakava na nodra vakanananu na tamata me sega ni yaga.

¹¹ Ena tu ga ka sega ni mudu na bose i Jiova, Kei na nanuma ni yalona ki na veitabatamata kecega.

¹² Sa kalougata na matanitu sa nodra Kalou ko Jiova; Kei na mataqali sa digitaka ko koya me nonai votavota.

¹³ Sa rai sobu mai lomalagi ko Jiova; Sa raici ira kecega na luve ni tamata.

¹⁴ Mai na tikina sa tiko kina ko koya sa vakararai Vei ira kecega era sa tiko e vuravura.

¹⁵ Sa cakava kecega na yalodra ko koya; Sa vakananuma kecega na nodra i valavala.

¹⁶ Sa sega e dua na tui sa bula e na vuku ni mataivalu levu; Sa sega na qaqa me vakabulai e na nona kaukauwa levu.

¹⁷ A ka wale na ose me bula kina; Sa na sega ni vakabula e dua e na nona kaukauwa levu.

¹⁸ Raica, na mata i Jiova sa wanonovi ira era sa rerevaki koya, Ko ira era sa nuitaka na nona loloma;

¹⁹ Me vakabula na yalodra mai na mate, Me maroroya na nodra bula e na dausiga.

²⁰ Sa waraki Jiova na yaloda; A nodai vukevuke kei na nodai sasabai ko koya.

²¹ Ni na rekitaki koya na yaloda, Ni da sa vakararavi e na yacana tabu.

²² I Jiova, me tu ga vei keimami na nomuni loloma, Me vaka ni keimami sa nuinui vei kemuni.