NA SAME 119 - Vakavakadewa Makawa

Sa tu e na same oqo e vuqa na masu, kei na vakavinavinaka, ka sa tukuna talega na talairawarawa, 1-176. ALEFA

¹ Sa kalougata ko ira era sa dodonu sara e na sala, Era muria na vunau i Jiova.

² Sa kalougata ko ira era vakabauta na nona vosa, Era qarai koya e na lomadra taucoko.

³ Era sa sega talega ni caka cala: Era lako ga e na nona sala.

⁴ O ni sa vakaroti keimami Me keimami vakabauta sara na nomuni vakaro.

⁵ Me vakadodonutaki mada na noqu sala Me'u vakabauta na ka ko ni a lesia me caka!

⁶ Au na qai sega ni madua, Ni'u sa qarava na nomuni vakaro kecega.

⁷ Au na vakavinavinaka vei kemuni e na yalododonu, Ni'u sa vulica oti na nomuni lewa dodonu.

⁸ Au na vakabauta na nomuni lesilesi: Mo ni kakua ni biuti au laivi yani.

PECA

⁹ Ena vakasavasavataka vakaevei na nonai valavala na cauravou? Ni sa qarauna ga me vaka na nomuni vosa.

¹⁰ E na yaloqu taucoko ka'u sa qarai kemuni. Me'u kakua mada ni lako sese tani mai na nomuni vakaro.

¹¹ Au sa tugana oti na nomuni vosa ki lomaqu, Me'u kakua kina ni cala vei kemuni.

¹² O ni sa kalougata, Jiova: Mo ni vakavulica vei au na nomuni lesilesi.

¹³ Au sa tukuna oti e na tebenigusuqu Na ka kecega sa lewa na gusumuni.

¹⁴ Au sa reki e nai valavala ni nomuni tukutuku, Me vaka e nai yau kecega.

¹⁵ Au na vakanananu ki na nomuni vakaro, Ka goleva tiko na nomuni sala.

¹⁶ Au na reki sara e na vuku ni nomuni vunau: Au na sega ni guilecava na nomuni vosa.

KIMELA

¹⁷ Mo ni caka vinaka vua na nomuni tamata, me'u bula, Ka vakabauta na nomuni vosa.

¹⁸ Mo ni vakamataraitaki au, me'u kunea Na ka e veivakurabuitaki e na nomuni vunau.

¹⁹ Au sa vulagi e vuravura: Mo ni kakua ni vunia vei au na nomuni vakaro.

²⁰ Sa ramusu na yaloqu ni'u sa gadreva E na veisiga kecega na nomuni lewa.

²¹ O ni sa vunauci ira na viavialevu era sa cudruvi, Ko ira era sa lako sese tani mai na nomuni vunau.

²² Mo ni kauta tani vei au na veivakalialiai kei na veibeci; Ni'u sa qarava oti na nomuni tukutuku.

²³ Era tiko talega na turaga, ka vosacataki au: Ia na nomuni tamata, sa vakanananu tiko ki na nomuni lesilesi.

²⁴ A nomuni tukutuku talega na ka ka'u sa marautaka, Ka sa noqu i vakavuvuli.

TELECA

²⁵ Sa kabita na kuvu ni soso na yaloqu: Mo ni vakabulabulataki au me vaka na nomuni vosa.

²⁶ Au a tukuna na noqu i valavala, ia ko ni a vakarorogo vei au: Mo ni vakavulica vei au na nomuni lesilesi.

²⁷ Mo ni vakavukui au me'u kila nai valavala ni nomuni vunau: Au na tukuna kina na nomuni cakacaka e veivakurabuitaki.

²⁸ Sa waicala yani na yaloqu ni sa bitaki: Mo ni vakaukauwataki au me vaka na nomuni vosa.

²⁹ Mo ni kauta tani vei au nai tovo lasulasu: Ka solia ga vei au na nomuni vunau.

³⁰ Au sa digitaka oti nai valavala dina: Au sa tauca e mataqu na nomuni lewa.

³¹ Au sa kabita na nomuni vosa: Mo ni kakua ni laivi au, Jiova, me'u vakamaduataki.

³² Au na cici e na sala ni nomuni vakaro, Ni kemuni na vakalevutaka na yaloqu.

AI

³³ Mo ni vakavulica vei au, Jiova, nai valavala ni nomuni lesilesi; Ka'u na qai vakabauta ka yacova nai vakataotioti.

³⁴ Mo ni vakavukui au kina, ka'u na qai cakava na nomuni vunau; Io, ka'u na vakabauta e na lomaqu taucoko.

³⁵ Mo ni kauti au e na sala ni nomuni vakaro; Ni'u sa rekitaka.

³⁶ Mo ni vaqara na lomaqu ki na nomuni tukutuku, Ia me kakua ki nai yau.

³⁷ Mo ni tarova na mataqu me'u kakua ni raica na ka lasu; Mo ni vagumatuataki au e na nomuni sala.

³⁸ Mo ni vakayacora na nomuni vosa vua na nomuni tamata, O koya sa rerevaki kemuni tikoga.

³⁹ Mo ni kauta tani na noqu i rogorogo ca, ko ya ka'u sa rerevaka: Ni sa vinaka na ka ko ni sa lewa.

⁴⁰ Raica, ka'u sa daugadreva na nomuni vunau: Mo ni vakabulabulataki au e na nomuni yalododonu.

VAU

⁴¹ Kemuni Jiova, me yacovi au na nomuni yalololoma; Na bula ko ni sa solia, me vaka na nomuni vosa.

⁴² Ena qai dua na vosa me'u saumi koya kina sa vosacataki au: Ni ka'u sa vakararavi ki na nomuni vosa.

⁴³ Ia mo ni kakua ni kauta laivi na vosa dina mai na gusuqu; Ni'u a nuitaka tiko na nomuni lewa.

⁴⁴ Ia ka'u na vakabauta tikoga kina na nomuni vunau Ka sega ni mudu.

⁴⁵ Au na lako lalaga voli: Ni'u sa qarava na nomuni vunau.

⁴⁶ Ia ka'u na vosataka talega na nomuni tukutuku e matadra na tui, Ia ka'u na sega ni madua kina,

⁴⁷ Ia ka'u na vakamarautaki au e na nomuni vakaro, O koya ka'u sa daulomana.

⁴⁸ Ia ka'u na dulaka talega na ligaqu ki na nomuni vakaro, O koya ka'u sa daulomana; Ia ka'u na vakanananu ki na nomuni lesilesi.

SAYINI

⁴⁹ Mo ni nanuma na vosa vua na nomuni tamata, Ko ni sa vakavuna na noqu nuitaka.

⁵⁰ Oqo na ka ka'u sa vakacegu kina e na noqu rarawa: Ni sa vakaukauwataki au na nomuni vosa.

⁵¹ Era sa vakalialiai au vakalevu na viavialevu: Ia ka'u sa sega ni gole tani mai na nomuni vunau.

⁵² Au sa nanuma na nomuni lewa eliu, Jiova; Ka'u sa vakacegui au kina.

⁵³ Sa tauvi au na rise ni kete, E na vukudra nai valavala ca era sa biuta na nomuni vunau.

⁵⁴ A nomuni lesilesi na ka ka'u sa seretaka tiko, E na noqu vale ka'u vulagi kina.

⁵⁵ Au sa daunanuma na yacamuni, Jiova, e na bogi, Ia ka'u sa vakabauta na nomuni vunau.

⁵⁶ Ia sa noqu ga oqo. Ni'u a cakava na nomuni vakaro.

KECA

⁵⁷ Oi kemuni na noqu i votavota, Jiova: Au sa kaya oti ni'u na vakabauta na nomuni vosa.

⁵⁸ Au a kerea na nomuni loloma e na yaloqu taucoko: Mo ni lomani au me vaka na nomuni vosa.

⁵⁹ Au a vakanananu ki na noqu i valavala, Ka vakalesuya na yavaqu ki na nomuni vosa.

⁶⁰ Au a vakusakusa, ka sega ni vakaberabera Me'u vakabauta na nomuni vunau.

⁶¹ A nodra i vau nai valavala ca sa voliti au: Ia ka'u sa sega ni guilecava na nomuni vunau.

⁶² E na lomaloma ni bogi ka'u na tu cake ka ia na vakavinavinaka vei kemuni, E na vuku ni nomuni lewa dodonu.

⁶³ Au sa nodra i tokani ko ira kecega era sa rerevaki kemuni, Kei ira era sa vakabauta na nomuni vakaro.

⁶⁴ Sa roboti vuravura, Jiova, na nomuni yalololoma: Mo ni vakavulica vei au na nomuni lesilesi.

TECA

⁶⁵ O ni sa caka vinaka, Jiova, vua na nomuni tamata, Me vaka na nomuni vosa.

⁶⁶ Mo ni vakavulici au e na lewa vinaka kei na kila ka: Ni'u sa vakabauta na nomuni vunau.

⁶⁷ Eliu, ni'u a sega ni tauvi mate, ka'u a lako sese: Ia oqo, ka'u sa qai vakabauta na nomuni vosa.

⁶⁸ Ko ni sa yalovinaka, ka caka vinaka; Mo ni vakavulica vei au na nomuni lesilesi.

⁶⁹ O ira na viavialevu, era sa tulia na lasu vei au: Ia ka'u na cakava ga na nomuni vakaro e na lomaqu taucoko.

⁷⁰ Sa vaka dina na uro na yalodra; Ia koi au ka'u sa rekitaka na nomuni vunau.

⁷¹ Sa yaga vei au ni'u a tauvi mate; Me'u vulica kina na nomuni lesilesi.

⁷² Sa vinaka vei au na vunau ni gusumuni Ka ca na tiki ni siliva kei na koula e vakaudolu.

YOTA

⁷³ Sa cakavi au na ligamuni, ka buli au: Mo ni vakavukui au me'u vulica na nomuni vunau.

⁷⁴ O ira sa rerevaki kemuni era na reki ni ra raici au; Ni'u sa nuitaka me yaco na nomuni vosa.

⁷⁵ Au sa kila, Jiova, ni sa dodonu na nomuni lewa, Ni kemuni a caka dina talega ni kemuni a vakararawataki au.

⁷⁶ Me vakacegui au na nomuni yalololoma, Me vaka na nomuni vosa vua na nomuni tamata.

⁷⁷ Me yacovi au na nomuni loloma levu, me'u bula kina: Ni sa noqu vu ni reki na nomuni vunau.

⁷⁸ Me ra vakamaduataki ko ira na viavialevu; ni ra sa cakacaka vakailasu walega vei au: Ia koi au ka'u na vakanananu tiko ki na nomuni vunau.

⁷⁹ Me ra lesu mai vei au ko ira era rerevaki kemuni, Kei ira talega era sa kila na nomuni vosa.

⁸⁰ Me dodonu sara na lomaqu e na nomuni lesilesi; Me'u kakua ni madua kina. KAFA

⁸¹ Sa ceguoca na yaloqu mo ni vakabulai au: Ia ka'u na nuitaka ga na nomuni vosa me yaco.

⁸² Sa oca na mataqu ni'u sa waraka na nomuni vosa, Ka kaya, Evei na siga ko ni na vakacegui au kina?

⁸³ Ni'u sa vaka na tavaya kuli-ni-manumanu e na kubou; Ia ka'u sa sega ga ni guilecava na nomuni lesilesi.

⁸⁴ E vica beka na nona siga na nomuni tamata? O ni na cudruvi ira ninaica era sa vakacacani au?

⁸⁵ Era kelia nai keli me'u lutu kina ko ira na viavialevu, Ko ira era sa sega ni vaka na nomuni vunau.

⁸⁶ Sa ka dina na nomuni vakaro kecega: Era sa vakacacani au vakatawadodonu; mo ni vukei au.

⁸⁷ Sa vo e lailai me ra vakaotia na noqu bula e vuravura; Ia koi au ka'u a sega ni biuta na nomuni vunau.

⁸⁸ Mo ni vakaukauwataki au me vaka na nomuni yalololoma; Au na vakabauta tiko kina na vosa ni gusumuni.

LAMETA

⁸⁹ I Jiova na nomuni vosa sa vakataudeitaki mai lomalagi Me sega ni oti rawa.

⁹⁰ A nomuni lomadina sa yacova nai tabatamata kecega: O ni a vakataudeitaki vuravura, ka sa tu ga:

⁹¹ Sa tu ga edaidai me vaka na nomuni lewa; Ni sa qaravi kemuni na ka kecega.

⁹² Kevaka ka'u a sega ni rekitaka na nomuni vunau, Ka'u a rusa sara e na noqu rarawa.

⁹³ Au na sega sara ni guilecava na nomuni vakaro: Ni kemuni sa vakaukauwataki au kina.

⁹⁴ Ka'u sa nomuni, mo ni vakabulai au; Ni'u sa qara na nomuni vunau.

⁹⁵ Era waraki au nai valavala ca me ra vakarusai au; Ia ka'u na vakanananu ki na nomuni vosa.

⁹⁶ Au sa raica nai otioti ni ka talei kecega; Ia na nomuni vakaro ga sa rabailevu sara.

MEMI

⁹⁷ A ka vakaidina na noqu loloma ki na nomuni vunau! Au sa vakanananu kina e na siga taucoko ka bogi.

⁹⁸ Na nomuni vakaro sa vakavukui au cake vei ira na noqu meca: Ni ra sa tikotiko ga vei au.

⁹⁹ Au sa vuku cake vei ira kecega era vakavulici au: Ni'u sa vakanananu ki na nomuni tukutuku.

¹⁰⁰ Au sa vuku cake vei ira na qase, Ni'u sa muria na nomuni vunau.

¹⁰¹ Au sa dauvakadaroya na yavaqu mai na sala ca kecega, Me'u vakabauta kina na nomuni vosa.

¹⁰² Au sa sega ni gole tani mai na ka ko ni a lewa: Ni kemuni sa vakavulici au.

¹⁰³ A kena kamikamica na nomuni vosa ki na gusuqu! Io, na oni sa sega ni kamikamica e na gusuqu!

¹⁰⁴ E na vuku ni nomuni vunau ka'u sa vuku mai: O koya ka'u sa cata kina nai valavala vakailasu kecega.

NUNI

¹⁰⁵ A nomuni vosa na cina ki na yavaqu, Kei na rarama ki na noqu sala.

¹⁰⁶ Au sa bubului oti, ka'u na vakayacora talega, Ka me'u vakabauta na nomuni lewa dodonu.

¹⁰⁷ Au sa rarawa vakalevu sara: Mo ni vakaukauwataki au, Jiova, me vaka na nomuni vosa.

¹⁰⁸ Mo ni vakadonuya mada, Jiova, nai madrali ni gusuqu ka'u sa cabora, Ka vakavulica vei au na nomuni lewa.

¹⁰⁹ Sa tutu ga e ligaqu na noqu bula: Ia ka'u sa sega ni guilecava na nomuni vunau.

¹¹⁰ Era sa birika vei au na dai ko ira nai valavala ca: Ia ka'u a sega ni lako sese mai na nomuni vunau.

¹¹¹ Au sa taura na nomuni tukutuku me noqu i votavota ka sega ni mudu: Ni ra sa ka ni reki ki na lomaqu.

¹¹² Au sa vaqara na lomaqu me'u cakava tiko na nomuni lesilesi, Ka yacova nai vakataotioti.

SAMEKI

¹¹³ Au sa cati ira era sa lomaloma rua: Ia ka'u sa lomana na nomuni vunau.

¹¹⁴ O i kemuni na noqu i vunivuni kei na noqu i sasabai: Au sa vakararavi ki na nomuni vosa.

¹¹⁵ Dou lako tani vei au, koi kemudou nai valavala ca: Ni ka'u na vakabauta na vunau ni noqu Kalou.

¹¹⁶ Mo ni tokoni au me vaka na nomuni vosa, me'u bula: Ia me'u kakua ni vakamaduataki e na noqu i nuinui.

¹¹⁷ Mo ni tauri au tiko, ka'u na qai vinaka: Ia ka'u na vakabauta tikoga na nomuni lesilesi.

¹¹⁸ O ni sa buturaki ira kecega era sa lako sese mai na nomuni lesilesi: Ni sa ka lasu na nodra dauveivakaisini.

¹¹⁹ O ni sa biuti ira tani nai valavala ca kecega e vuravura me vaka na de ni kaukamea: O koya ka'u sa lomana kina na nomuni tukutuku.

¹²⁰ Sa sautaninini na lewequ ni'u rere vei kemuni; Ka'u sa rerevaka na nomuni lewa.

AYINI

¹²¹ Au sa ia na lewa dodonu kei na cakacaka dodonu: Mo ni kakua ni laivi au vei ira era vakasaurarataki au.

¹²² Mo ni totaki koya na nomuni tamata me'u vinaka: Me ra kakua ni vakasaurarataki au ko ira na viavialevu.

¹²³ Sa oca na mataqu ni'u sa waraka na bula sa maivei kemuni: Kei na vosa ni nomuni caka dodonu.

¹²⁴ Mo ni cakacaka vua na nomuni tamata me vaka na nomuni yalololoma, Ka vakavulica vei au na nomuni lesilesi.

¹²⁵ Ka'u sa nomuni tamata; mo ni vakavukui au Me'u kila na nomuni tukutuku.

¹²⁶ Sa kena gauna oqo, Jiova, e dodonu mo ni cakacaka kina: Ni ra sa vakacataka na nomuni vunau.

¹²⁷ O koya ka'u sa lomana kina na nomuni vakaro Ka cata na koula; io, na koula dina sara.

¹²⁸ Ni'u sa vakadonuya na nomuni vunau kecega e na vuku ni ka kecega; Ia ka'u sa cata nai valavala lasu kecega.

PE

¹²⁹ A ka vakurabui na nomuni tukutuku, O koya sa vakabauta kina na yaloqu.

¹³⁰ Ni sa vakamacalataki na nomuni vosa sa qai rarama mai; Sa vakavukui kina ko ira era sega ni vuku.

¹³¹ Au a dalaga sara, ka'u sa ceguoca: Ni'u a gadreva na nomuni vakaro.

¹³² Mo ni golevi au mai, ka lomani au; Me vaka ko ni sa daucakava vei ira era daulomana na yacamuni.

¹³³ Mo ni vakarautaka na noqu i lakolako e na nomuni vosa: Ia me kakua ni gumatua vei au e dua nai valavala ca.

¹³⁴ Mo ni vakabulai au mai nai valavala kaukauwa ni tamata: Au na vakabauta kina na nomuni vunau.

¹³⁵ Me cilavi koya na nomuni tamata na matamuni; Ka vakavulica vei au na nomuni lesilesi.

¹³⁶ Na uciwai sa dave mai na mataqu, Ni ra sa sega ni vakabauta na nomuni vunau.

SATI

¹³⁷ O ni sa yalododonu, Jiova, Ka sa dodonu na nomuni lewa.

¹³⁸ A vunau ko ni sa vakarota sa dodonu Ka dinadina sara.

¹³⁹ Sa kani au na noqu lomakatakata, Ni ra sa guilecava na nomuni vosa ko ira na noqu meca.

¹⁴⁰ Sa savasava sara na nomuni vosa: O koya sa lomana kina na nomuni tamata.

¹⁴¹ Au sa ka lailai ka beci: Ia ka'u sa sega ni guilecava na nomuni vunau.

¹⁴² A nomuni yalododonu sa sega ni mudu, Ia na nomuni vunau na ka dina.

¹⁴³ Sa kani au na rarawa kei na yaluma: Ia ka'u sa rekitaka ga na nomuni vakaro.

¹⁴⁴ A kena dodonu na nomuni vosa sa sega ni mudu rawa: Mo ni vakavukui au, ka'u na bula kina.

KOFA

¹⁴⁵ Au a tagi e na yaloqu taucoko; mo ni rogoci au, Jiova: Au na vakabauta na nomuni lesilesi.

¹⁴⁶ Au a tagi vei kemuni; mo ni vakabulai au, Ka'u na vakabauta kina na nomuni vosa.

¹⁴⁷ Au sa tagi vei kemuni ni sa bera ni kida na mataka: Au a nuitaka na nomuni vosa.

¹⁴⁸ Na mataqu sa taumadaka na veitiki ni bogi ni veivuke yadra Me'u vakanananu ki na nomuni vosa.

¹⁴⁹ Mo ni rogoca na domoqu, me vaka na nomuni yalololoma: I Jiova, mo ni vakaukauwataki au me vaka na nomuni lewa.

¹⁵⁰ Era toro voleka mai ko ira era muria nai lawaki ca: Era sa yawa ki na nomuni vunau.

¹⁵¹ Ko ni sa voleka, Jiova; Ka sa dina na nomuni vakaro kecega.

¹⁵² E na vuku ni nomuni vunau, au sa kila makawa Ko ni a vakataudeitaka me sega ni oti rawa.

RESI

¹⁵³ Mo ni raica na noqu rarawa, ka vakabulai au; Ni'u sa sega ni guilecava na nomuni vunau.

¹⁵⁴ Mo ni vosa e na vukuqu, ka vakabulai au: Mo ni vakabulabulataki au me vaka na nomuni vosa.

¹⁵⁵ Sa yawa vei ira nai valavala ca na bula: Ni ra sa sega ni qara na nomuni lesilesi.

¹⁵⁶ Sa vuqa na nomuni valavala loloma, Jiova: Mo ni vakaukauwataki au me vaka na nomuni lewa.

¹⁵⁷ Era lewe vuqa era sa vakacacani au, ka ra sa noqu meca; Ia ka'u sa sega ni gole tani mai na nomuni vosa.

¹⁵⁸ Au a raici ira na caka cala, ia ka'u sa rarawa; Ni ra sa sega ni vakabauta na nomuni vosa.

¹⁵⁹ Mo ni raica na noqu loloma ki na nomuni vunau: Mo ni vakaukauwataki au, Jiova, me vaka na nomuni yalololoma.

¹⁶⁰ Sa ka dina mailiu sara na nomuni vosa: Ka sa sega ni mudu rawa e dua na nomuni lewa dodonu.

SINI

¹⁶¹ Era sa vakacacani au walega na turaga: Ia sa rerevaka na nomuni vosa na lomaqu.

¹⁶² Ka'u sa rekitaka na nomuni vosa, Me vaka e dua sa kunea nai yau levu.

¹⁶³ Au sa cata ka vakasisilataka na lasu: Ia na nomuni vunau ka'u sa lomana.

¹⁶⁴ Au sa vakavinavinaka vei kemuni vakavitu e na veisiga E na vuku ni nomuni lewa dodonu.

¹⁶⁵ A ka levu na nodra vakacegu era lomana na nomuni vunau: Ka sa sega na ka me ra bale kina.

¹⁶⁶ I Jiova, ka'u sa nuitaka na bula maivei kemuni, Ka sa daucakava na nomuni vakaro.

¹⁶⁷ Sa vakabauta na nomuni vosa na yaloqu; Ia ka'u sa lomana vakalevu.

¹⁶⁸ Au sa dauvakabauta na nomuni vunau kei na nomuni tukutuku: Ni sa macala vei kemuni na noqu i valavala kecega.

TAU

¹⁶⁹ Me yaco kivei kemuni na noqu tagi, Jiova: Mo ni vakavukui au me vaka na nomuni vosa.

¹⁷⁰ Me lako cake kivei kemuni na noqu vakamamasu: Mo ni vakabulai au me vaka na nomuni vosa.

¹⁷¹ Ena cavuta na vakavinavinaka na tebenigusuqu, Ni kemuni sa vakavulici au e na nomuni lesilesi.

¹⁷² Ena vosataka na nomuni vosa na yamequ: Ni sa dodonu na nomuni vakaro kecega.

¹⁷³ Me vukei au na ligamuni; Ni'u sa digitaka oti na nomuni vunau.

¹⁷⁴ Au sa daugadreva na bula maivei kemuni, Jiova; Au sa rekitaka talega na nomuni vunau.

¹⁷⁵ Me bula na yaloqu, ena qai vakavinavinaka vei kemuni; Ia me vukei au na nomuni lewa.

¹⁷⁶ Au sa daulako sese me vaka na sipi sa yali; mo ni qara na nomuni tamata; Ni'u sa sega ni guilecava na nomuni vakaro.