Aisea 47 - Vakavakadewa Makawa

Era na cudruvi ko ira na kai Papiloni kei na kai Kalitia ni ra sai valavala vakaukauwa; ni ra viavialevu ka via qaqa; ni ra dauvakararavi ki nai valavala vakatevoro, 1-15.

¹ Lako sobu mai, ka mani dabe e na kuvu-ni-soso, ko iko na goneyalewa ni Papiloni; mo tiko e na qele, sa sega nai tikotiko vakaturaga, ko iko na goneyalewa ni kai Kalitia: ni ko na sega ni vakatokai tiko na yalewa vakamarama.

² Taura na vatu i qaqi, ka mani qaqi sila; biuta na nomu pulou; toroya cake na nomu i sulu; luvata nai sulu ni yavamu, qalo-kosova na uciwai.

³ Ena vakavotui na nomu luvawale; io, ena rairai na nomu veivakamaduataki: ka'u na ia na veicudruvi, ka'u na sega ni vakamasuti.

⁴ A neimami Vakabula! ko Jiova ni lewe vuqa na yacana, ko Koya na Yalosavasava ni Isireli.

⁵ Mo tiko lo, ka mani lako ki na butobuto, ko iko na goneyalewa ni kai Kalitia: ni ko na sega ni vakatokai tiko Na Ranadi ni veimatanitu.

⁶ Au a cudruvi ira na noqu tamata; au a vakacacana na noqu i votavota, ka soli ira ki na ligamu: ko sa sega ni yalololoma vei ira; ia ko sa vakabibitaka vakalevu na nomu i vua vei ira na qase.

⁷ Ia ko a kaya, Ka'u na Ranadi tikoga ka sega ni mudu; ko sa sega kina ni vakasara ki lomamu na ka oqo, se vakananuma na kenai tinitini.

⁸ Ia mo qai rogoca na ka oqo, ko iko sa daumamarau, ka sa dautiko vakacegu wale, ka sa kaya e lomamu, Koi au ga, ka sa sega tale e dua, koi au ga; ka'u na sega ni tiko vakayada, ena sega talega ni yali vei au na luvequ:

⁹ Ia na ka ruarua oqo ena yaco vakidacala ga vei iko e na dua ga na siga, na mate ni luvemu kei na tiko vakayada; ena yaco vakatani sara vei iko, ni sa daulevu na nomu caka mana lasu, ka levu na nomu daucakaisausau.

¹⁰ Ia ko a vakararavi ki na nomu i valavala ca: ko a kaya, Sa sega e raici au. A nomu vuku kei na nomu daukila ka, oqori sa vakauti iko vakatani; ia ko a kaya e lomamu, Koi au, ka sa sega tale e dua, koi au ga.

¹¹ Ia ena yacovi iko na ca, ko na sega ni kila se sa tubu maivei; ena yacovi iko na rusa, ko na sega ni vakadaroya rawa; ena yacovi iko vakidacala na veivakarusai, ko na sega ni kila.

¹² Mo tu dei mada e na nomu daucakaisausau, kei na levu ni nomu daucaka mana lasu, ko sa dauoca kina ni ko sa gone ka yacova na gauna oqo; de yaga beka ga vei iko, de ko na gumatua kina.

¹³ Ko sa oca e na levu ni nomu daubose. Ia ko ira era dauvakarai mata ki lomalagi, kei ira era dau vakarai kalokalo, kei ira era dauwili vula, me ra tu mada mai ka vakabulai iko mai na ka ena yacovi iko.

¹⁴ Raica, era na vaka na vu-ni-sila; ena vakamai ira na bukawaqa, era na sega ni vakabulai ira rawa vakataki ira mai na kaukauwa ni yameyame ni bukawaqa; ena sega na qilaiso waqa me ia kina na tatalai, se na bukawaqa me tiko voleka kina.

¹⁵ Ena vakakina vei iko ko ira ko a dauoca e na vukudra, era dauveivoli kei iko ni ko sa gone ka yacova na gauna oqo: era na dui lako sese yadua ki nodratou; ena sega e dua me vakabulai iko.