Tobíi 1 - MAWUXÓWÉMA

Mɛ e Tobíi nyí é

¹ Tan Tobíi, ée nyí Tobiyɛ́li ví ɔ́ tɔn ɖíe: vǐvú Ananiyɛ́li tɔn wɛ; Ananiyɛ́li nyí Aduwɛ́li ví, bó nyí vǐvú Gabayɛ́li tɔn. Yě mɛ bǐ wɛ nyí Asiyɛ́li hwɛndo mɛ nu, ɖo akɔta Nɛfutalíi tɔn mɛ.

² Tobíi ɔ́, Nɛfutalíi tomɛ wɛ é nɔ́ nɔ, ɖo Galilée taligbé, ɖo toxo ɖaxó Tisubée tɔn mɛ, ɖo Kadɛ́si e ɖo totaligbé é, Asɔ́ɔ e ɖo gbadahwe jí é, kpódó Fogɔ́ɔ e ɖo tofɔligbé é kpán tɛ́ntin. Fínɛ́ wɛ è dɔn ɛ sín gǎnnugǎnnu wá yi Asilíi, hwenu e Salumanasáa nyí axɔ́sú to énɛ́ tɔn é.

Gbɛ e Tobíi zán é

³ Nyɛ Tobíi ɔ́, nǔgbó mɛ wɛ un zán gbɛ ce bǐ ɖe. Hwɛhwɛ ɔ́, un nɔ ná akwɛ́ nɔví ce Jwifu ɖěɖě kpó nyi kpó è dɔn gǎnnu wá yi Ninívu ɖo Asilíi lɛ́ɛ é.

⁴ Hwenu e un ɖo dɔ̌nkpɛvú mɛ, bó kpo ɖo to ce mɛ, Izlayɛ́li sín ayǐkúngban jí é ɔ́, akɔhɛ́nnu Nɛfutalíi tɔn e nyí tɔ́gbó ce ɔ́ bǐ klán éɖée sín axɔ́súhɛ́nnu Davídi tɔn kpó Jeluzalɛ́mu tɔn kpán wú. É ɖo mɔ̌ có to énɛ́ wɛ ká nyí to e Mawu kpɔ́n bó sɔ́ ɖo Izlayɛ́li, bónú akɔta lɛ́ɛ bǐ ná wá xwlé vɔ̌sánú ɖ'é mɛ é. Jeluzalɛ́mu wɛ è gbǎ Sinsɛnxɔ Mawu tɔn ɖó, bó sɔ́ ɖó Mawu kanta nú kúnkan e ná wá jɔ lɛ́ɛ é bǐ.

⁵ Ɖo Galilée só lɛ́ɛ bǐ jí ɔ́, hɛ̌nnu ce kpódó mɛ e ɖo akɔta Nɛfutalíi tɔ́gbó ce ɔ́ tɔn mɛ lɛ́ɛ é bǐ kpán nɔ́ xwlé vɔ̌sánú nú sikányibúví e Jelobowámu axɔ́sú Izlayɛ́li tɔn sɔ́ tun te ɖo tɛn mímɛ́ Dan tɔn mɛ é.

⁶ Hǔn nyɛ ɔ́, hwɛhwɛ ɔ́, nyi ɖokpónɔ nɔ́ yi Jeluzalɛ́mu ɖo xwe hwenu lɛ́ɛ, lě e Mɔyízisɛ́n ɔ́ kó zɔ́n Izlayɛ́li togun ɔ́ bǐ gbɔn nú tɛgbɛ é. Un nɔ sɔ́ gle jinukún ce nukɔntɔn lɛ́ɛ, kanlin e è ji jɛ nukɔn ɖo wutó ce lɛ́ɛ mɛ é, mǎɖówǒ kanlin ce lɛ́ɛ tɔn, kpó lɛ̌ngbɔ́ ce lɛ́ɛ sín fún nukɔntɔn kpó wá Sinsɛnxɔ ɔ́ mɛ.

⁷ Un nɔ bɛ́ nǔ énɛ́ lɛ́ɛ bǐ yi jó nú vɔ̌sánú-xwlémawutɔ́ Aalɔ́ɔn ví lɛ́ɛ, nú yě ná dó xwlé vɔ̌sísá lɛ́ɛ. Un nɔ lɛ́ hɛn jinukún e un dó lɛ́ɛ é kpó atínsínsɛ́n lɛ́ɛ kpó sín mǎɖówǒ wegɔ́ ɔ́ yi jó nú Levíi kúnkan e ɖo vɔ̌sánú-xwlémawutɔ́zɔ́ mɛ ɖo Jeluzalɛ́mu lɛ́ɛ é. Un nɔ lɛ́ sa nǔɖíɖó ce lɛ́ɛ sín mǎɖówǒ ée mǐ ɖó ná ná nú xwe ayizɛ́n ɖo tɛ́nwe jí é ɖěvo, bɔ un zán akwɛ́ e tɔ́n sín mɛ é akpáxwé ɖokpó ɖo Jeluzalɛ́mu xwewú xwewú tɛgbɛ.

⁸ Dó wá sú ta ná ɔ́, un nɔ má dɔkun ce lɛ́ɛ sín mǎɖówǒ atɔngɔ́ ɔ́ nú tɔ́cyɔvǐ nɔcyɔvǐ lɛ́ɛ, asúkúsi lɛ́ɛ kpó jǒnɔ e wá jɛ agban ɖó Izlayɛ́li ví lɛ́ɛ tɛ́ntin lɛ́ɛ é kpán. Xwe atɔn mɛ xwe atɔn mɛ wɛ un nɔ ná nǔ énɛ́ lɛ́ɛ nú mǐ ná dó alɔ kpɔ́ lě e Mɔyízisɛ́n ɔ́ zɔ́n gbɔn bɔ Debola nɔ ce tɔ́ ɔ́ kplɔ́n mǐ gbɔn é. Nǔgbó ɔ́, tɔ́cyɔvǐ wɛ un nyí, ɖó Ananiyɛ́li tɔ́ ce ɔ́ kó kú.

⁹ Ée un wá nyí mɛxó é ɔ́, un da asi ɖo akɔta e mɛ un jɔ ɖe é. É ji vǐ súnnu ɖokpó nú mì bɔ un sun nyǐ ɖɔ Tobiyási.

¹⁰ É lín xóó, bɔ è wǎ kplá mì gǎnnugǎnnu yi Asilíi, bɔ un wá sá xwé nyi Ninívu. To énɛ́ mɛ ɔ́, un mɔ hɛ̌nnu ce bǐ kpó akɔ ce lɛ́ɛ kpán, bɔ yě nɔ́ ɖu nǔɖuɖu ɖokpó ɔ́ xá mɛ e ma nyí Jwifu ǎ lɛ́ɛ.

¹¹ Lo ɔ́, nyɛ gbɛ́ ɖɔ un kún ná ɖu nǔ yě ɖɔhun ó.

¹² Un nɔ gbejí nú Mawu ce kpó ayi ce bǐ kpán.

¹³ Nǔ e wú Mawu Ajalɔ̌nlɔn ná alɔdómɛ tɔn mì é nɛ́. Un húzú axɔ́sú Salumanasáa tɔn, bó nyí mɛ e kpé nukún nǔ tɔn lɛ́ɛ wú.

¹⁴ Mɔ̌ wɛ un sɔ́ gankwɛ́ kilóo afɔɖé kanwe ko (300) dó ati mɛ, bó bɛ́ ɖ'ayǐ ɖo Gabayɛ́li, Gabli nɔví ɔ́ gɔ́n, ɖo to énɛ́ ɔ́ mɛ ɖo Hlagɛ́si é nɛ́.

¹⁵ Ée axɔ́sú Salumanasáa kú é ɔ́, vǐ tɔn Senakelíbu ɔ́ wɛ húzú axɔ́sú, bó jɛ tɛn tɔn mɛ. Mɛdi sín ali lɛ́ɛ wá húzú awǒvinú, bɔ un sɔ́ lɛ́ kɔ yi to énɛ́ ɔ́ mɛ ǎ.

¹⁶ Sín axɔ́sú Salumanasáa hwenu ɖokpóó ɔ́, un ko nɔ ná akwɛ́ nɔví ce Jwifu lɛ́ɛ hwɛhwɛ.

¹⁷ Un nɔ má nǔɖuɖu ce xá mɛ e ɖo xovɛ́ lɛ́ɛ, bó nɔ́ ná nǔzínzán mɛ e ɖo mɛ̌ lɛ́ɛ é. Nú un mɔ nɔví ce Jwifu lɛ́ɛ ɖě sín cyɔ bɔ è zě nyi gbě gbɔn Ninívudó ta ɔ́, un nɔ sɔ́ yi ɖi.

¹⁸ Un nɔ lɛ́ ɖi yě mɛ e Senakelíbu hu lɛ́ɛ é. Nya énɛ́ ɔ́ wɛ kó zun Mawu Axɔ́sú e ɖo jǐxwé é ɖo Judáa. Bó ná dó dɔn tó n'i ɔ́, Mawu hɛn ɛ, bɔ é hɔn sín to énɛ́ mɛ. Ée Senakelíbu lɛ́ kɔ wá Ninívu é ɔ́, é ɖo xomɛsin jí, bó zɔ́n ɖɔ è hu Izlayɛ́li ví gěgé. Amɔ̌, nyɛ ɔ́, un nɔ gbɔn nǔglɔ́, bó nɔ́ bɛ́ cyɔ yětɔn lɛ́ɛ bó nɔ́ yi ɖi. Senakelíbu nɔ zɔ́n ɖɔ yě ní ba yě bó mɔ, lo ɔ́, è ka sɔ́ nɔ́ mɔ yě ǎ.

¹⁹ Nya Ninívunu ɖokpó yi ɖɔ nú axɔ́sú ɔ́ ɖɔ: “Tobíi wɛ nɔ ɖi mɛkúkú lɛ́ɛ.” Bɔ un gbɔ bo hɔn hwlá. Axɔ́sú ɔ́ se nǔ e un nɔ wa nɛ́ lɛ́ɛ, bó zɔ́n ɖɔ è nǐ yi ba mì wá bó ná hu, bɔ un ɖi xɛsi bó hɔn.

²⁰ Nǔ e nyí ce lɛ́ɛ ɔ́, è ɖǒ alɔ bǐ jí, bɔ yě húzú axɔ́sú ɔ́ tɔn. Asi ce Ana ɔ́ kpó vǐ ce Tobiyási kpó kɛ́ɖɛ́ jɛ́n kpo nu mì.

²¹ Azǎn ná yi kanɖé (40) mɔ̌ jɛ́n wɛ axɔ́sú ɔ́ sín vǐ we yi hu axɔ́sú ɔ́, bó hɔn yi Alaláti sín sókan mɛ. Vǐ tɔn súnnu ɖěvo e nyí Asaladɔ́ɔn ɔ́ wá húzú axɔ́sú ɖo tɛn tɔn mɛ. Lě e é ná to axɔ́súɖuto tɔn gbɔn é kpó nǔ e kan akwɛ́xó é bǐ kpó ɔ́, Asaladɔ́ɔn sɔ́ dó alɔ mɛ nú nɔví ce Anayɛ́li sín vǐ súnnu Ayikáa.

²² Ayikáa ɖɔ xó ce nú axɔ́sú Asaladɔ́ɔn, bɔ un kpé wú bó lɛ́ kɔ wá Ninívu. Hwenu e Senakelíbu nyí axɔ́sú ɔ́, Ayikáa wɛ kpa acɛ dó axɔ́sú ɔ́ sín xwé nu, bó nɔ́ lɛ́ kpé nukún dó hwɛɖiɖɔ, akwɛ́gbá kpódó acɛkpikpa Asilíi tɔn ɔ́ bǐ kpán nu. Asaladɔ́ɔn lɛ́ bɛ́ azɔ̌ ɖokpó énɛ́ e é ko nɔ́ wa ɖ'ayǐ lɛ́ɛ dó alɔ mɛ n'i. Hú mɔ̌ ɔ́, Ayikálu ɔ́, hɛ̌nnumɔ ce wɛ; nɔví ce ví wɛ.