Luki 1 - MAWUXÓWÉMA

Nǔ e wú è wlǎn wěma élɔ́ é

¹ Teofílu! Mɛ gěgé tɛ́nkpɔ́n bó kpi nǔ e jɛ ɖo tɛ́ntin mǐtɔn lɛ́ɛ é sín tan dó wěma mɛ.

² Yě ɖɔ nǔ lɛ́ɛ lě e mawuxójlátɔ́ e mɔ nǔ e jɛ lɛ́ɛ sín bǐbɛ́mɛ ɔ́ ɖɔ nú mǐ gbɔn é.

³ Énɛ́ wú wɛ un yi ba do nú nǔ énɛ́ lɛ́ɛ bǐ céɖécéɖé sín bǐbɛ́mɛ yětɔn, bó nywɛ́ ɖɔ má wlán nǔ e jɛ nɛ́ lɛ́ɛ ɖě jɛ ɖě gúdo sɛ́ dó we,

⁴ bónú a nǎ dó tunwun nǔgbó e ɖo nǔ e è kplɔ́n we lɛ́ɛ mɛ é.

Wɛnsagun Mawu tɔn wá dó wɛn Zakalíi

⁵ Hwenu e Elódu ɖo axɔ́sú ɖu wɛ ɖo Jwifu lɛ́ɛ sín tomɛ ɔ́, vɔ̌sánú-xwlémawutɔ́ ɖokpó ɖo fínɛ́, bɔ è nɔ ylɔ́ ɛ ɖɔ Zakalíi, bɔ é ɖo vɔ̌sánú-xwlémawutɔ́ Abiya sín gbɛ̌ta mɛ. Asi tɔn nɔ nyí Elizabɛ́ti, bó jɔ ɖo vɔ̌sánú-xwlémawutɔ́ ɖaxó Aalɔ́ɔn sín kúnkan mɛ.

⁶ Yě mɛ we lɛ́ɛ bǐ wɛ nɔ wa jlǒ Mawu tɔn, bó nɔ́ nyi Aklúnɔ sɛ́n lɛ́ɛ, bɔ nǔ bǐ vɔ ɖ'é wú.

⁷ Yě ká ji vǐ ǎ, ɖó wɛnsinɔ wɛ nú Elizabɛ́ti, bɔ yě mɛ we lɛ́ɛ bǐ sín xwe ka ko sɛ yi.

⁸ É wá su gbe ɖokpó, bɔ Zakalíi ɖo vɔ̌sánú-xwlémawutɔ́ sín azɔ̌ tɔn lɛ́ɛ wa wɛ ɖo Mawu nukɔn, ɖó gbɛ̌ta e mɛ é ɖe ɔ́ jí wɛ sinsɛnxɔmɛzɔ́ jɛ hwe énɛ́ nu.

⁹ È ka wá nyi akɔ, bó zé Zakalíi lě e walɔ vɔ̌sánú-xwlémawutɔ́ lɛ́ɛ tɔn zɔ́n gbɔn é, nú é ná byɔ́ tɛn mímɛ́ Aklúnɔ tɔn mɛ, bó ná dó zǎlínkpɔ́n zo, bó xwlé Mawu.

¹⁰ Togun ɔ́ bǐ kplé ɖo hɛnkɛ́n, bó ɖo ɖɛ xo wɛ hwenu e Zakalíi ɖo zǎlínkpɔ́n dó zo wɛ é.

¹¹ Wɛnsagun Mawu tɔn ɖokpó ká tɔ́n dó Zakalíi jí, bó ɖo te ɖo ɖisíxwé nú vɔ̌sákpe e jí è nɔ dó zǎlínkpɔ́n zo ɖe é.

¹² Ée Zakalíi mɔ ɛ lě ɔ́, ayi tɔn bǐ gbadó, bɔ xɛsi jɛ jǐ tɔn.

¹³ Wɛnsagun ɔ́ ka ɖɔ n'i ɖɔ: “Zakalíi, ma ɖi xɛsi ó; ɖó Mawu yí gbe nú nǔ e a byɔ́ ɛ é. Asi towe Elizabɛ́ti ná ji vǐ súnnu ɖokpó nú we, bɔ a nǎ sun nyǐ i ɖɔ Jǎan.

¹⁴ É ná víví nú we, bɔ a nǎ j'awǎ tɔn, bɔ xomɛ ná hun mɛ gěgé ɖó jiji tɔn wú.

¹⁵ Đó é ná nyí gbɛtɔ́ nukúnɖéjí ɖokpó ɖo Aklúnɔ nukún mɛ. Vɛ̌ɛn kpódó ahan syɛ́nsyɛ́n kpó ɖěbǔ ná jɛ nu tɔn ǎ. Yɛsinsɛn ná kó gɔ́ ayi mɛ n'i sín nɔ tɔn xomɛ.

¹⁶ É ná bló bɔ Izlayɛ́li ví gěgé ná lɛ́ kɔ wá Aklúnɔ Mawu yětɔn gɔ́n.

¹⁷ Mawu ná ná ɛ Yɛ e é ná Elíi é, bó ná lɛ́ ná ɛ hlɔ̌nhlɔ́n e é ná Elíi é, bɔ é ná wá jɛ nukɔn nú Aklúnɔ bó ná dó hwɛ gbɔ nú tɔ́ kpódó vǐ kpó. É ná bló bɔ mɛ e ma nɔ se tónú nú Mawu ǎ lɛ́ɛ ná jɛ jlǒ Mawu tɔn wa jí, bó ná dó sixú bló togun Mawu tɔn ɖó ɖ'ayǐ nú Aklúnɔ.”

¹⁸ Zakalíi ka kanbyɔ́ wɛnsagun ɔ́ ɖɔ: “Ani wɛ ná xlɛ́ mì ɖɔ nǔ mɔ̌hunkɔ ná jɛ? Nyɛ ɖíe kó kpo e, bɔ asi ce lɔ sín xwe ka ko sɛ yi.”

¹⁹ Wɛnsagun ɔ́ yí gbe n'i ɖɔ: “Nyɛ wɛ nyí Gabliyɛ́li, bó nɔ́ nɔ te ɖo Mawu nukɔn. É wɛ sɛ́ mì dó, nú má ɖɔ xó nú we, lobo dó Wɛn Ɖagbe énɛ́ we.

²⁰ Xó e un ɖɔ nú we ɔ́ ná jɛ ɖo hwe tɔn nu. Lo ɔ́, ɖěe a ma ɖi nǔ nú mì ǎ ɔ́, ɖɛ̌ towe ná kú, bɔ xó ɖiɖɔ ná gló we, káká jɛ hwenu e nǔ lɛ́ɛ bǐ ná jɛ dó é.”

²¹ Hwenu e nǔ énɛ́ lɛ́ɛ ɖo jijɛ wɛ ɔ́, togun ɔ́ ka ɖo te kpɔ́n Zakalíi, bɔ lě e é lin sɔ ɖo sinsɛnxɔ ɔ́ mɛ ɔ́ nyí nǔ, bó hu ado nú yě.

²² Ée é wá tɔ́n ɔ́, é sɔ́ sixú ɖɔ xó nú yě ǎ, bɔ yě mɔ nukúnnú jɛ wú ɖɔ nǔ wɛ é mɔ ɖo sinsɛnxɔ ɔ́ mɛ, bɔ é gbɔ bó nɔ́ sɔ́ alɔ dó ɖɔ xó nú yě, lobɔ ɖɛ̌ tɔn nɔ kúkú mɔ̌.

²³ Ée azǎn nabí e Zakalíi ɖó ná wa azɔ̌ ɔ́ ná ɖo sinsɛnxɔ ɔ́ mɛ ɔ́ fó ɔ́, é yi xwé.

²⁴ Azǎn ɖé jɛ ǎ, bɔ asi tɔn Elizabɛ́ti mɔ xo; é sɔ́ nɔ́ tɔ́n sín xwé tɔn gbe ǎ káká xɔ sun atɔ́ɔ́n, bó nɔ́ ɖɔ jí:

²⁵ “Aklúnɔ sín nǔwiwa ɖíe; é lɛ́ kɔ kpɔ́n mì, lobo ɖe winnyá nú mì ɖo gbɛtɔ́ lɛ́ɛ nukɔn.”

Wɛnsagun Gabliyɛ́li wá dó wɛn Mali

^26-27 Ée Elizabɛ́ti sín adɔgo ɖó sun ayizɛ́n ɔ́, Mawu sɛ́ wɛnsagun Gabliyɛ́li dó Galilée sín toxo e è nɔ ylɔ́ ɖɔ Nazalɛ́ti é mɛ, nú é ná yi dó wɛn ɖyɔ̌vǐ ɖé. Đyɔ̌vǐ énɛ́ ɔ́, è nɔ ylɔ́ ɛ ɖɔ Mali, bɔ é nyí asixɔ́ntɔn nú Jozɛ́fu e jɔ ɖo axɔ́sú Davídi hɛ́nnu mɛ é.

²⁸ Wɛnsagun ɔ́ yi Mali gɔ́n, ɖo xwé tɔn gbe, bó dó gbe e ɖɔ: “Mali, fífá ní nɔ kpɔ́ xá we. Mawu jɔwǔ we; Aklúnɔ ɖo kpɔ́ xá we.”

²⁹ Ée Mali se mɔ̌ ɔ́, ayi tɔn gbadó, bɔ é ɖo kinkanbyɔ́ éɖée wɛ ɖɔ: “Gbedómɛ alɔkpa tɛ́ ká ɖíe?”

³⁰ Wɛnsagun ɔ́ ká ɖɔ n'i ɖɔ: “Mali, ma ɖi xɛsi ó; ɖó Mawu jɔwǔ we;

³¹ bo tunwun ɖɔ a nǎ mɔ xo, bó ná ji vǐ súnnu ɖokpó, bó ná sun nyǐ i ɖɔ Jezu.

³² É ná nyí mɛ nukúnɖéjí ɖé, bɔ è nǎ nɔ́ ylɔ́ ɛ ɖɔ Mawu Ajalɔ̌nlɔn ví. Aklúnɔ Mawu ná sɔ́ ɛ ɖó tɔ́ tɔn Davídi sín axɔ́súzinkpo jí.

³³ É ná ɖu axɔ́sú ɖo Izlayɛ́li ví lɛ́ɛ nu káká sɔ́yi, bɔ axɔ́súɖuɖu tɔn ná vɔ gbeɖé ǎ.”

³⁴ Mali ká kanbyɔ́ wɛnsagun ɔ́ ɖɔ: “Nɛ̌ wɛ nǔ ká sixú nyí mɔ̌ gbɔn? Nyi ɖíe ma tunwun súnnu kpɔ́n ǎ e.”

³⁵ Wɛnsagun ɔ́ ká yí gbe n'i ɖɔ: “Yɛsinsɛn ná wá jǐ towe, bó ná ɖe hlɔ̌nhlɔ́n Mawu tɔn xlɛ́; énɛ́ ɔ́ wú wɛ vǐ e a nǎ ji ɔ́, è nǎ nɔ́ ylɔ́ ɛ ɖɔ mɛɖeɖóvo Mawu tɔn, bó ná nɔ́ ylɔ́ ɛ ɖɔ Mawu ví.

³⁶ Éɖíe! Elizabɛ́ti hɛ̌nnumɔ towe e nyí wɛnsinɔ ɔ́ lɔmɔ̌ mɔ xo ɖo kpikpo tɔn mɛ, bɔ adɔgo tɔn ko ɖó sun ayizɛ́n.

³⁷ Đó nǔ ɖěbǔ gló Mawu ǎ.”

³⁸ Mali yí gbe ɖɔ: “Aklúnɔ sín mɛsɛntɔ́ wɛ un nyí; lě e a ɖɔ gbɔn ɔ́, ní bó nyí mɔ̌ nú mì.” Wɛnsagun ɔ́ ká gosín gɔ̌n tɔn.

Mali yi ba dadá tɔn Elizabɛ́ti kpɔ́n

³⁹ Azǎn ɖé jɛ ǎ, bɔ Mali jɛ ali, bó hwlɛ́ndó, bó yi Judáa sín toxo ɖé mɛ, ɖo sókan mɛ.

⁴⁰ É byɔ́ Zakalíi xwé gbe, bó dó gbe Elizabɛ́ti.

⁴¹ Ée Elizabɛ́ti se gbedómɛ Mali tɔn lě ɔ́, vǐ e ɖo xo tɔn mɛ é dán wǔ, bɔ Yɛsinsɛn gɔ́ ayi mɛ nú Elizabɛ́ti,

⁴² bɔ é zé gbe yi jǐ, bó ɖɔ: “Mawu xo ɖɛ dó jǐ we hú nyɔ̌nu lɛ́ɛ bǐ, bó xo ɖɛ dó vǐ e ɖo xo towe mɛ é lɔmɔ̌ jí.

⁴³ Étɛ́ un ka nyí, bɔ Aklúnɔ ce sín nɔ wá ba jǒnɔ mì!

⁴⁴ Ée un se gbedómɛ towe lě ɔ́, é víví nú vǐ e ɖo xo ce mɛ é, bɔ é dán wǔ.

⁴⁵ Nǔ nyɔ́ nú we, ɖó a ɖi nǔ ɖɔ akpá e Aklúnɔ dó nú émí ɔ́ ná jɛ.”

Mali ji han mlá Mawu

⁴⁶ Mali ɖɔ: “Un ɖo susu kpa nú Aklúnɔ ce wɛ,

⁴⁷ bɔ xomɛ hun mì tlala dó Mawu Mɛhwlɛ́ngántɔ́ ce wu;

⁴⁸ ɖó é nyi kɔ kpɔ́n nyɛ mɛsɛntɔ́ tɔn masɔatɛ́n ɔ́. Bɛ́ sín din ɔ́, gbɛtɔ́ lɛ́ɛ bǐ ná nɔ́ ylɔ́ mì ɖɔ nǔnyɔ́nánɔ,

⁴⁹ ɖó Nǔbǐwúkpétɔ́ ɔ́ wa nǔ ɖaxó ɖaxó nú mì. Nyǐkɔ tɔn ɔ́, nǔ mímɛ́ wɛ é nyí.

⁵⁰ É ná kú nǔbláwǔ nú mɛ e nɔ sí i lɛ́ɛ bǐ hwebǐnu.

⁵¹ É jlɛ́ nǔ ɖaxó ɖaxó lɛ́ɛ; é gba goyítɔ́ lɛ́ɛ dó.

⁵² É ɖe axɔ́sú lɛ́ɛ sín zinkpo yětɔn lɛ́ɛ jí, bó sɔ́ mɛ e nɔ sɔ́ yěɖée hwe lɛ́ɛ su.

⁵³ É ná nǔ bǐ mɛ e xovɛ́ sin lɛ́ɛ, bó nya dɔkunnɔ lɛ́ɛ asígbá alɔgbá.

^54-55 É wá dó alɔ togun tɔn Izlayɛ́li mɛsɛntɔ́ tɔn; é kú nǔbláwǔ nú Ablaxámu kpódó vǐ tɔn lɛ́ɛ kpó káká sɔ́yi, lě e é kó dó akpá tɔn nú tɔ́gbó mǐtɔn lɛ́ɛ gbɔn é.”

⁵⁶ Mali xɔ sun atɔn mɔ̌ ɖo Elizabɛ́ti gɔ́n, lobo wá yi xwé.

Elizabɛ́ti ji Jǎan Yɛhwesinlɛnúmɛtɔ́

⁵⁷ Hwenu e Elizabɛ́ti ɖó ná ji vǐ dó é wá su, bɔ é ji vǐ súnnu ɖokpó.

⁵⁸ Mɛ e ɖo xwé tɔn kpá lɛ́ɛ kpódó hɛ̌nnumɔ tɔn lɛ́ɛ kpán se ɖɔ Aklúnɔ ɖe nǔbláwǔkúnúmɛ tɔn xlɛ́ ɛ, bɔ yě j'awǎ xá ɛ.

⁵⁹ Azǎn tɔn tántɔn gbe ɔ́, yě wá ja ada gbo nú vǐ ɔ́ gbé, bó jló ná sun nyǐ i ɖɔ Zakalíi tɔ́ ɔ́ ɖɔhun.

⁶⁰ Nɔ ɔ́ ká kɛ nu, bó ɖɔ: “Éeǒ! Jǎan wɛ é ɖó ná nyí.”

⁶¹ Yě ká ɖɔ n'i ɖɔ: “Mɛ ɖé má ká nyí mɔ̌ ɖo hɛ̌n ɔ́ nu nɛ́!”

⁶² Yě sɔ́ alɔ dó ɖɔ xó nú tɔ́ tɔn, bó kanbyɔ́ ɛ ɖɔ nɛ̌ é ká jló ɖɔ vǐ ɔ́ ní nyí a jí,

⁶³ bɔ é byɔ́ nǔ e jí è nɔ wlán nǔ dó é ɖokpó, bó wlán ɖɔ: “Jǎan wɛ nyǐkɔ tɔn nyí.” Bɔ é kpácá yě bǐ.

⁶⁴ Azɔn ɖokpó ɔ́, ɖɛ̌ tɔn tún kan, bɔ é hun nu, bó jɛ xó ɖɔ jí, bó jɛ susu kpa nú Mawu jí.

⁶⁵ Xɛsi jɛ mɛ e ɖo xwé yětɔn kpá lɛ́ɛ bǐ jí. Mɛ bǐ nɔ́ ɖo nǔ e jɛ nɛ́ lɛ́ɛ sín xó ɖɔ wɛ ɖo Judée toxo e ɖo sókan ɔ́ mɛ lɛ́ɛ bǐ mɛ.

⁶⁶ Mɛ e se lɛ́ɛ ká nɔ́ hɛn dó ayi mɛ, bó nɔ́ ɖo ɖiɖɔ wɛ ɖɔ: “Ani nyí gbé wɛ vǐ élɔ́ ká ja?” Nǔgbó nǔgbó ɔ́, Aklúnɔ sín hlɔ̌nhlɔ́n ɖo kpɔ́ xá ɛ.

Zakalíi kpa susu nú Mawu

⁶⁷ Yɛsinsɛn gɔ́ ayi mɛ nú tɔ́ tɔn Zakalíi, bɔ é jɛ Mawuxó ɖɔ jí ɖɔ:

⁶⁸ “È nǐ kpa susu nú Aklúnɔ, Mawu Izlayɛ́li tɔn, ɖó é wá ba togun tɔn kpɔ́n, lobo hwlɛ́n ɛ gán.

⁶⁹ É sɛ́ Mɛhwlɛ́ngántɔ́ hlɔ̌nhlɔ́nnɔ ɖé dó mǐ. Mɛhwlɛ́ngántɔ́ énɛ́ jɔ ɖo mɛsɛntɔ́ tɔn axɔ́sú Davídi hɛ́nnu mɛ.

⁷⁰ Nǔ e é ko ɖɔ ɖ'ayǐ xóxó, gbɔn gbeyíɖɔ mímɛ́ tɔn lɛ́ɛ jí é nɛ́.

⁷¹ É dó akpá, ɖɔ émí ná hwlɛ́n mǐ gán ɖo kɛntɔ́ mǐtɔn lɛ́ɛ sí, bó ná ɖe mǐ sín mɛ e gbɛ́ wǎn nú mǐ lɛ́ɛ sín acɛ mɛ.

⁷² É ná ɖe nǔbláwǔkúnúmɛ tɔn xlɛ́ tɔ́gbó mǐtɔn lɛ́ɛ, bó ná flín akɔjijɛ tɔn ma ɖó blɔ̌ ɖo wǔ ɔ́.

⁷³ Đó Mawu dó akpá nú tɔ́gbó mǐtɔn Ablaxámu,

⁷⁴ ɖɔ émí ná bló, bɔ mǐ ná gló kɛntɔ́ mǐtɔn lɛ́ɛ, bó ná gbó adɔ, bó wa azɔ̌ nú émí;

⁷⁵ bɔ mǐ ná ɖó ayi mímɛ́ kpódó ayijlɔ́jlɔ́ kpán, ɖo nukɔn émítɔn, káká yi jɛ kúzán gbe mǐtɔn.

⁷⁶ Vǐ ce, hwɛ ɔ́, è nǎ ylɔ́ we ɖɔ gbeyíɖɔ Mawu Ajalɔ̌nlɔn tɔn, ɖó a nǎ jɛ nukɔn nú Aklúnɔ, bó ná bló ali tɔn lɛ́ɛ ɖó n'i.

⁷⁷ É ná sɔ́ togun tɔn sín hwɛ lɛ́ɛ kɛ ɛ, bó ná ɖe xlɛ́ ɛ ɖɔ émí hwlɛ́n ɛ gán.

⁷⁸ Đó Mawu mǐtɔn ɔ́, nǔbláwǔkúnúmɛtɔ́ wɛ, bó ká lɛ́ fá xomɛ; é ná bló bɔ hwlɛngán sín wěziza ɔ́ ná hɔ́n dó mǐ jí sín jǐxwé hwesivɔ́ ɖɔhun;

⁷⁹ wěziza énɛ́ ɔ́ ná hɔ́n dó mɛ e jínjɔ́n zǐnflú mɛ, bó ɖo kúyɛmɛ lɛ́ɛ jí, bó ná kplá mǐ gbɔn fífá li jí.”

⁸⁰ Vǐ ɔ́ ɖo susu wɛ, bɔ nǔ e é nyí ɔ́ ɖo wěxo jɛ wɛ. É yi cí gbětótló mɛ káká jɛ gbe e gbe é wá ɖe éɖée xlɛ́ Izlayɛ́li togun ɔ́ é.