Ozée 6 - MAWUXÓWÉMA

¹ Mawu Mavɔmavɔ ɖɔ: “Énɛ́ ɔ́, mi ná ɖɔ: Mi wá nú mǐ ná lɛ́ kɔ yi Mawu Mavɔmavɔ gɔ́n, ɖó é wɛ gblé wǔ mǐ, é ká ná gbɔ azɔn nú mǐ. É wɛ vúnvún mǐ, é jɛ́n ká ná kpé nukún dó mǐ wú.

² É ná sɔ́ azǎn we ɖó te, bó ná dó vɔ́ gbɛ ná mǐ, bɔ azǎn atɔngɔ́ ɔ́ gbe ɔ́, é ná zé mǐ sí te, bɔ mǐ ná nɔ gbɛ ɖo gɔ̌n tɔn.

³ Mǐ ní tunwun Mawu Mavɔmavɔ, mǐ ní dó gǎn bó ná tunwun i. Wǐwá tɔn ɖó gblǎ ǎ, lě e ayǐtéhɔ̌nnu má nɔ gɔn susu ǎ é ɖɔhun. É ná wá gɔ̌n mǐtɔn jǐ ɖɔhun, é ná wá lě e xwejí nɔ ja, bó nɔ́ hú sin nú ayǐkúngban é ɖɔhun.”

⁴ Eflayímu e, nɛ̌ un ná wa nǔ towe gbɔn? Judáa e, nɛ̌ un ná wa nǔ towe gbɔn? Sísí e mi ɖó nú mì ɔ́ cí akpɔ́kpɔ́ zǎnzǎn tɔn ɖɔhun. É cí amǔ e sú, bɔ zaanɖé din ɔ́, é ná kɛn ɔ́ ɖɔhun.

⁵ Énɛ́ ɔ́ wú wɛ un zé xó e un ɖɔ gbɔn gbeyíɖɔ ce lɛ́ɛ jí ɔ́ dó dɔn tó nú yě. Un zé xó e nɔ́ tɔ́n sín nu ce mɛ lɛ́ɛ dó hu yě. Hwɛ e un ɖó nú yě lɛ́ɛ gba kpé wěziza ɖɔhun.

⁶ Nǔ e un yí wǎn ná ɔ́ wɛ nyí ɖɔ è nǐ nɔ gbejí nú mì, bó yí wǎn nú mì nǔgbó. É nyí vɔ̌sísá lɛ́ɛ wɛ un yí wǎn ná ǎ. Nú è tunwun ɖɔ nyɛ wɛ nyí Mawu ɔ́, un yí wǎn nú énɛ́ ɔ́ hú è nǐ dǒ vɔ̌ zo nú mì ɖo vɔ̌sákpe jí.

Nǔ baɖabaɖa ná jɛ

⁷ “Yě gba akɔ e un jɛ xá yě ɔ́, gbɛtɔ́ lɛ́ɛ ɖɔhun. Nǔ e yě wa bó dó jɛ do nú mì é nɛ́.

⁸ Nǔ nyanyawatɔ́ lɛ́ɛ sín toxo wɛ nyí Galadi toxo ɔ́. Yě gbɔn fí ɖěbǔ dín ɖo toxo ɔ́ mɛ ɔ́, hun jɛ́n nɔ kɔn nyi ayǐ.

⁹ Vɔ̌sánú-xwlémawutɔ́ lɛ́ɛ tɔwu ɖo Sikɛ́mu sín ali jí ajotɔ́ axánsúnxó ɖɔhun, bó ɖo mɛ hu wɛ. Heelúnú e dó sin wɛ yě ɖe lɛ́ɛ nɛ́.

¹⁰ Un mɔ nǔɖé lɛ́ɛ ɖo akɔta Izlayɛ́li tɔn ɔ́ mɛ, nǔ lɛ́ɛ dó xɛsi: Eflayímu ɖo aga lɛ wɛ ɖo fínɛ́, Izlayɛ́li ɖo su ɖu wɛ.

¹¹ Judáa e, un ɖo nǔ sɔ́ wɛ, bó ná ya hwi lɔmɔ̌ nǔkún ɖɔhun, hwenu e un ná kplá mɛ e nyí kannumɔ ɖo togun ce mɛ lɛ́ɛ wá é.”