Naxúmu 1 - MAWUXÓWÉMA

¹ Xó e Mawu ɖɔ dó Ninívu toxo ɔ́ wú, bó ɖe xlɛ́ Naxúmu Elikɔcinu ɔ́ bɔ é wlán ɔ́ ɖíe:

Mawu Mavɔmavɔ ɔ́, Mawu wɛ é nyí, bó dó xɛsi, bó ká nyɔ́

² Mawu Mavɔmavɔ ɔ́, Mawu wɛ é nyí; é nɔ́ ba gbeɖé ɖɔ è nǐ sɛn nǔ ɖěvo zɛ émí ɖokpónɔ wú ǎ. É nɔ ba hlɔn. Mawu Mavɔmavɔ nɔ ba hlɔn; xomɛsin tɔn syɛ́n. Mawu Mavɔmavɔ nɔ ba hlɔn kɛntɔ́ tɔn lɛ́ɛ wú, é nɔ́ wɔn nǔ nyanya e yě nɔ́ wa lɛ́ɛ é ǎ.

³ Mawu Mavɔmavɔ nɔ yá wǔ sin xomɛ ǎ. Hlɔ̌nhlɔ́n tɔn dó agba. É nɔ́ gɔn tó dɔn nú nǔnyanyawatɔ́ lɛ́ɛ ǎ. Mawu Mavɔmavɔ ɖo yiyi wɛ ɔ́, jɔhɔn ɖaxó ɖé mɛ wɛ é nɔ zɔn. É nɔ́ zɔn axásáxásá jɔhɔn mɛ. É ɖo yiyi wɛ ɔ́, afúntúntún e afɔ tɔn nɔ vun é wɛ nyí akpɔ́kpɔ́.

⁴ É nɔ́ wa adǎn dó xu bɔ é nɔ́ mɛ. É nɔ́ ɖe gbe bɔ tɔ lɛ́ɛ nɔ xú, bɔ gběhan e ɖo Basáni é kpó éé ɖo Kaamɛ́li só ɔ́ jí é kpó bǐ nɔ fyɔ́, bɔ folówa Libáan tɔn lɛ́ɛ nɔ mlú.

⁵ Só ɖaxó ɖaxó lɛ́ɛ nɔ húnhún ɖo nukɔn tɔn, bɔ só kpɛví kpɛví lɛ́ɛ nɔ sínsín. Ayǐkúngban nɔ dán wǔ ɖo nukɔn tɔn. Gbɛ ɔ́ kpó mɛ e ɖo gbɛ ɔ́ mɛ lɛ́ɛ kpó nɔ́ sísɔ́.

⁶ Mɛ̌ ká sixú nɔ te ɖo adǎn e jí Mawu Mavɔmavɔ ɖe ɔ́ nukɔn? Mɛ̌ ká sixú gán ɖo xomɛsin tɔn nukɔn? Xomɛsin tɔn nɔ gba kpé myɔ ɖɔhun, bɔ só lɛ́ɛ nɔ gba hánnyá ɖo nukɔn tɔn.

⁷ Mawu Mavɔmavɔ nyɔ́, bibɛtɛn wɛ é nyí ɖo adǎngbomɛ hwenu. É tunwun mɛ e nɔ sɔ́ yěɖée dó así n'i lɛ́ɛ.

⁸ Amɔ̌, é ná sɛ́ nǔgbomɛ dó kɛntɔ́ tɔn lɛ́ɛ, bɔ é ná wá gba yě tɔ ɖɔhun, bó ná vívá toxo ɔ́ sín kún, bó ná nya yě káká yi dó zǐnflú mɛ.

Mawu dó wɛn ɖě jɛ ɖě gúdo sɛ́ dó Ninívunu lɛ́ɛ kpódó Judáanu lɛ́ɛ kpó

⁹ Étɛ́ gbé blá dó Mawu Mavɔmavɔ wú wɛ mi ɖe? É ná sú kún mitɔn dó; mɛ ɖé nɔ́ fɔ́n gǔ dó jǐ tɔn azɔn we ǎ.

¹⁰ Yě hízí wunkan ɖɔhun, yě cí mɛ e nɔ nu ahan mú é ɖɔhun. Yě ná ji kɛn sɛníyɔ ɖɔhun.

¹¹ Ninívu to, hwi gɔ́n wɛ mɛ e nɔ lin nyanya Mawu Mavɔmavɔ tɔn, bó nɔ blá gbě tɔn ɔ́ gosín .

¹² Mawu Mavɔmavɔ ɖɔ nú Judáanu lɛ́ɛ ɖɔ: “Lě e kɛntɔ́ mitɔn lɛ́ɛ sukpɔ́ bó syɛ́n sɔ ɔ́ nɛ́, có yě bǐ ká ná kɛn xwe, bɔ é sɔ́ ná kpo mɛɖé ǎ. Un sɔ́ mi hwe káká jɛ din, amɔ̌, un sɔ́ ná sɔ́ mi hwe ɖě ǎ.

¹³ Din ɔ́, agban e kɛntɔ́ ɖíɖá mi ɔ́, un ná zlɔ́n mi, lobo ná wɛ́n gɛdɛ e è dǒ mi é.”

¹⁴ Gbeta e Mawu Mavɔmavɔ ɖe tɔ́n dó mi Ninívunu lɛ́ɛ wú ɔ́ ɖíe: “Mi sɔ́ ná ɖó vǐ ɖě bɔ é ná hɛn nyǐkɔ mitɔn ɖó te ǎ. Un ná ɖe bǒcyɔ e è kpa lɛ́ɛ, kpó ée è kɔn lɛ́ɛ kpó sín vodún mitɔn lɛ́ɛ xwé. Un ná kun yɔdo mitɔn ɖ'ayǐ, ɖó mi nyí nǔɖé ɖo nukɔn ce ǎ.”