1 Jǎan 1 - MAWUXÓWÉMA

Xó e nɔ ná gbɛ mɛ é

¹ Nǔ e kan xó e nɔ na gbɛ mɛ ɔ́ ɖɔ sɛ́ dó mi wɛ mǐ ɖe. Xó énɛ́ ko ɖe sín bǐbɛ́mɛ nǔ lɛ́ɛ bǐ tɔn; é ɖɔ xó bɔ mǐ se, bó mɔ ɖó nukún mǐtɔn lɛ́ɛ wú; mǐ kpɔ́n bó ɖ'alɔ wú.

² Hwenu e gbɛ énɛ́ wá ɔ́, mǐ mɔ ɛ. Énɛ́ ɔ́ wútu wɛ mǐ ɖo xó tɔn ɖɔ nú mi wɛ, bó ɖo gbɛ mavɔ mavɔ e ko ɖo Tɔ́ ɔ́ gɔ́n, bɔ è ɖe xlɛ́ mǐ ɔ́ sín kúnnu ɖe nú mi wɛ, bó ɖo xó tɔn ɖɔ nú mi wɛ.

³ Nǔ e mǐ mɔ lobo se ɔ́, mǐ ɖo ɖiɖɔ nú mi lɔmɔ̌ wɛ, bónú mi ná nɔ bǔ xá mǐ ɖo kɔnɖókpɔ́ e mǐ ɖó xá Tɔ́ ɔ́ kpódó Vǐ tɔn Jezu Klísu ɔ́ kpó ɔ́ gbla mɛ.

⁴ Mǐ ɖo nǔ énɛ́ lɛ́ɛ wlán sɛ́ dó mi wɛ, bónú awǎjijɛ mǐtɔn ná nyí awǎjijɛ kpíkpé.

Mawu nyí wěziza

⁵ Wɛn e mǐ se ɖo Jezu Klísu nu, bó ɖo dǐdó mi wɛ ɔ́ wɛ nyí ɖɔ Mawu nyí wěziza, bɔ zǐnflú ɖěbǔ ɖo wǔ tɔn ǎ.

⁶ Ényí mǐ ɖɔ mǐ ɖo kɔnɖókpɔ́ mɛ xá Mawu, bó ka lɛ́ kpo ɖo gbɛ zán wɛ ɖo zǐnflú mɛ hǔn, adingban ɖó wɛ mǐ ɖe ɖo xó ɖiɖɔ mɛ, kpó nǔwiwa mǐtɔn lɛ́ɛ kpó mɛ.

⁷ Lo ɔ́, ényí mǐ ɖo gbɛ zán wɛ ɖo wěziza mɛ lě e Mawu ɖésúnɔ ɖo wěziza mɛ gbɔn ɔ́, hǔn mǐ ɖo kɔnɖókpɔ́ mɛ xá mǐɖée, bɔ vǐ tɔn Jezu sín hun nɔ lɛ mǐ wé sín hwɛ mǐtɔn lɛ́ɛ bǐ mɛ.

⁸ Ényí mǐ ɖɔ hwɛ ɖě kún ɖo kɔ nú mǐ ó hǔn, mǐɖée blɛ́ wɛ mǐ ɖe, bɔ nǔgbó ɔ́ ɖo mǐ mɛ ǎ.

⁹ Ényí mǐ ka ɖɔ hwɛ mǐtɔn lɛ́ɛ nú Mawu ɔ́, mǐ hɛn ɔ́, mǐ ná ɖeji dó wǔ tɔn, ɖó nǔ jlɔ́jlɔ́ wɛ é nɔ wa; é ná sɔ́ hwɛ mǐtɔn lɛ́ɛ kɛ mǐ, bó ná lɛ mǐ wé sín nǔ nyanya e mǐ wa lɛ́ɛ bǐ mɛ.

¹⁰ Ényí mǐ ɖɔ mǐ kún hu hwɛ ó hǔn, Mawu ylɔ́ ɖɔ adingbannɔ wɛ mǐ ɖe nɛ́, bɔ xó tɔn ɖo ayi mǐtɔn mɛ ǎ.