NA SAME 14 - Ai Vola Tabu Ena Vakavakadewa Vou

Na Nodra Ca na Tamata

Vua na i liuliu ni sere. A nei Tevita.

¹ Era sa kaya ki lomadra na tamata lialia, “Sa sega na Kalou!” Era sa ca kece sara, Era sa cakava na veika vakarerevaki; Sa sega ni bau dua e cakava na ka dodonu.

² Sa raici ira sobu mai na tamata ko Jiova mai lomalagi, Me raica se bau dua beka e vuku, Ka me qaravi koya.

³ Ia, era sa cala kecega; Sa tautauvata na nodra i tovo ca kecega; Sa sega ni bau dua e cakava na ka dodonu, E sega sara ni dua mada ga.

⁴ A sa taroga ko Jiova, “E sega beka ni ra kila?” “Era sa lecaika kece li na tamata ca oqo? O ira oqo era sa bula voli ga ni ra sa butako mai vei ira na noqu tamata, Era sa sega talega ni masuti au.”

⁵ Ia, era na vakarerei ga, Ni sa tiko na Kalou kei ira sa rerevaki koya.

⁶ Era sa vakacala na nodra i tuvatuva na dravudravua Ia, sa nodra i drodro ga ko Jiova.

⁷ Ena yaco mai na veivakabulai o ya ki Isireli mai Saioni, Ni sa vakalougatataki ira tale na nona tamata ko Jiova, Era na marau na kawa i Jekope ka ra na reki na Isireli.