रोमि 7 - Muria Far Western

इदेक मावागा मूसाना नियमता बाताले अदिकार हिले

¹ हे बायि-दादालोरक, मूसाना नियमतुन पुनवालोरकुन नना इन्तोना: मानेय जिवित मन्तोर अचोवनाह ओनागा नियमता अदिकार मन्ता इन्जोर निमाट पुनविट?

² उदाहरणते: मरमिंग आता आळदा मुजो जिवित मन्तोर अचोवनाह ओद नियमता अनुसार आपुना मुजोनासंग दोहता मन्ता। मति अदेनोर मुजो हान्तोर ते मरमिंगना नियमताल ओद स्वतन्त्र आन्ता।

³ मुजो जिवित मन्दानपा ओद आळ बोरायि दुसरो मानेयनासंग संबन्द कियाकि ते अदेन व्यभिचारणि इन्तोरक। मति अदेनोर मुजो हान्तोर ते मरमिंगना बारेता मूसाना नियम अदेन लागु आयो अनि इन्जोर साटि ओद दुसरो मानेयना मुत्ते आन्ता ते वने ओद व्यभिचारणि आयो।

⁴ इन्जोर हे बायि-दादालोरक, मसिना मेन्दुलता द्वारा मूसाना नियमता संबन्दताल निमाट वने हातोरिट। इदेनते निमाट दुसरोनासंग संबन्द आयकिट इन्जोर इदाम आतु। ओर दुसरोर हातोरिगाडाल जिवेमातोर ओर येसु मसि मन्तोर, इदेना द्वारा माक वने परमेस्वर साटि सोबाय बुतोता फसलकिया परकाट इन्जोर मन्ता।

⁵ माक मानेयना पापि स्वभावते जिवेमान्दोम असके बाताल केमाट इन्जोर नियमतिगा आग्या हिस मता ओव पोल्लोंग कियान साटि पकाय इच्चा वासोर मता; ओद इच्चाते माक आपुना मेन्दुलते पाप किसोर मतोम। इदाम पाप कियानाता कारण परमेस्वरताल लक हन्ज हायानाता दन्डता योग्य आतोम।

⁶ मति इदेक माकुन उन्दि बेरा बन्दि बनेकिस मता ओद नियमतुन मावागा बाराय अदिकार हिले। बाक्याकि माक येसु मसिनासंग हातोम अनि इदेक जुनाल कोटता नियमताल आयो मति आत्माता पुनाल रितिते माक आपुनोर स्वामि परमेस्वरना सेवा किन्तोरोम इन्जोर माकुन नियमताल लेहचितुर।

मूसाना नियम मावा पापतुन तोहान्ता।

⁷ ते मूसाना नियम पाप मन्ता इन्जोर बाताल माक इन परकाट बहे? बसकेय आयो! नियम हिले आस मनवार ते पाप बाताल मन्ता इन्जोर नना पुनोन आस मनेना। लालुच केमा इन्जोर नियम इनो आस मनवार ते नना लालुचतुन पुनोन आस मनेना।

⁸ अनि लालुच केमा ओद नियमता कारण सबोय प्रकारता लालुच नावा मन्दे उत्पन्न आयाना सन्दि आत। मति नियम हिले ते पाप हातोर मानेयना लेहका मन्ता मन्जे नियम हिले ते माक पाप किन्दोम इदाम पुनोम।

⁹ उन्दि काळदे नना नियमतुन समजेमायोर आस जिवित मन्दान मति बसके नियमता आग्या करियतान ते पापता अदिकार नावा जिवनते वात। अनि नना परमेस्वरना मुनेटाल लक हतान।

¹⁰ इदाम जिवन साटि हिता नियमता द्वारा हायानाता दन्ड साटि नना योग्य आतान इन्जोर नना समजेमातान।

¹¹ बाक्याकि पाप मूसाना नियमता द्वारा सन्दि पुटतु अनि ओद सन्दिते नाकुन पापकियान साटि इच्चा हिसुन दोखा हिन्ता। इदाम नियमता द्वारा हायाना दन्ड साटि योग्य आतान।

¹² इन्जोर मूसाना नियम पवित्र मन्ता अनि ओद नियमता आग्या पवित्र, बराबर अनि सोबाय मन्ता।

¹³ ते पजा परमेस्वरना सोबाता नियम नावा हायानाता कारण बनेमातु इन्जोर बाताल इदेना अर्थ मन्ता? बसकेय आयो! मति पाप ओद परमेस्वरना सोबाता नियमता द्वारा नावा साटि हायानाता दन्ड पुटाना कारण बनेमातु। बाक्याकि नियमता आग्याता द्वारा पापतुन बराबर पुन्ज पाप पकाय खराब मन्ता इन्जोर समजेमायिलाय पहाजे।

पापता अदिकार मानेयनिगा बुतो किन्ता।

¹⁴ इन्जोर मूसाना नियम आत्मिक मन्ता मति पाप नावागा अदिकार किस नाकुन पापता दास बनेहकिता इन्जोर नना आत्मिक मानेय हिलेन।

¹⁵ नना बाताल कियाला आतोना इन्जोर नना पुनोन बाक्याकि नना बोद कियाला इच्चा किन्तोना ओद खरोय पोल्लोतुन केवोन मति नना बोद कियाला विरोद किन्तोना ओदेय गलति पोल्लोंग कियाला लागान्ता।

¹⁶ अनि नना बोद पोलो कियाना इच्चा केवोन ओदे गलति पोल्लो किन्तोना ते नियम सोबाय मन्ता इन्जोर नना मानेमान्तोना।

¹⁷ इन्जोर नना पापता बुतो किन्तोना ते ओद केवल आपुना मन्दे केवोन बाक्याकि नना अदेन कियाना इच्चा केवोन। मति नावा लोपा उदिता पाप ओद गलति पोल्लोंग किन्ता।

¹⁸ नावागा बाताले सोबाता पोल्लोंग हिलेंग इन्जोर नना पुन्तोना। नना पाप स्वभावतोर मानेय मन्तोना। नना सोबाय पोल्लोंग कियाना इच्चा किन्तोना मति ओद सोबाय बुतो कियाला परोन।

¹⁹ बाक्याकि नना कियाना इच्चा किन्तोना ओद सोबाय बुतो केवोन। मति नना कियाला इच्चा केवोन ओद खराब बुतो नना किसोर मन्तोना।

²⁰ मति नना बोद बुतो कियाना इच्चा केवोन ओद किन्तोना ते ओद बुतो कियाना केवाल नना आयोन मति नावागा उदिता पाप मन्ता।

²¹ इन्जोर नना सोबाय बुतो कियाना इच्चा किन्तोना ते वने नना खराब बुतो किन्तोना इदाम उन्दि अनुभव नावागा बुतो किसोर मन्ता इन्जोर नना समजेमातान।

²² अनि नावा मन्दे परमेस्वरना नियम पालन कियान साटि पकाय गिरदा मन्ता।

²³ मति आपुना मेन्दुलतिगा नना उन्दि दुसरोय अनुभव बुतो कियानपा हुळान्तोना, इद मूसाना नियमता विरुद लळायि किन्ता। अनि ओद अनुभव नाकुन पापता दास बनेकियान साटि नावा मेन्दुलतिगा बुतो किसोर मन्ता।

²⁴ ओ! खरोय नना पकाय कम नशिबतोर मानेय मन्तोना! पापता द्वारा हायानाता दन्ड पुटान साटि योग्य मन्ता इद मेन्दुलताल बोर नाकुन पिसाहानुर?

²⁵ मावोर प्रबु येसु मसिना द्वारा परमेस्वरना नना धन्यवाद किन्तोना; इदाम आपुना मन्दे परमेस्वरना नियमता पालन किसोर मन्तोना ते वने आपुना पापि स्वभावता मेन्दुलते नना पापता नियमता गुलाम मन्तोना।