रोमि 10 - Muria Far Western

परमेस्वरना पोल्लोतिगा विस्वास कियाकिट ते पिसकिट

¹ हे बायि-दादालोरक, ओर सबोय इस्रायेल लोकुरा पिसाना आयि इन्जोर नावा पकाय इच्चा अनि ओरा साटि परमेस्वरतुन नावा प्रार्थना मन्ता।

² परमेस्वरतुन गिरदा कियाना ओरा पकाय इच्चा मन्ता मति परमेस्वरतुन खरोय रितिते बदाम गिरदा कियाना ओरक पुनोरक इन्जोर नना मिकुन खरोय इन्तोना।

³ परमेस्वर लोकुरकुन बदाम परमेस्वरना मुने येताना योग्य बनेकिन्तोर इन्जोर ओरक पुनोरक। अनि आपुना रितिते परमेस्वरना मुने येताना योग्य बनेमायाना कोसिस किन्तोरक इदाम किस ओरक परमेस्वरना अधिनते मन्ज ओन मानेमायोर आतुर।

⁴ अनि मूसाना नियमता द्वारा लोकुरक परमेस्वरना मुने येताना योग्य ठहरे मायाना मसिहा मारिहतुर बाक्याकि मसिनिगा विस्वास किस बोरायि परमेस्वरना मुने येताना योग्य बनेमाय परान्तोर।

सबोय लोकुरक साटि पिसाना

⁵ अनि मूसाना नियमता पालन किस परमेस्वरना मुने येताना योग्य बनेमायाना इच्चा किन्तोरक ओर लोकुरक साटि मूसाल इदाम कोटतोर: “बोरायि नियमता पालन पुरा रितिते किन्तोर ते परमेस्वर ओन जिवन हियानुर।”

⁶ मति विस्वासता द्वारा परमेस्वरना मुने येताना योग्य बनेमायाना बारेते परमेस्वरना पोल्लो इद इन्ता: “मसिहान दरतितिगा ततान साटि ‘बोर स्वरगतिगा दायनुर?’ ”

⁷ “या ‘हातोरिगाडाल जिवेकिहिस मसिन पोरो ततान साटि दरतिता अडिय बगा हातोर लोकुरक मन्तोरक अगा बोर दायनुर इदाम निमाट आपुना मन्दिगा विचार केमाट।’ ”

⁸ मति “परमेस्वरना पोल्लो निया हेरेय मन्ता अदेना बारेते निमाट वळकिन्तोरिट अनि इद निया मन्दिगा मन्ता” इन्जोर परमेस्वरना पोल्लो इन्ता। इदाम विस्वासता बारेते पोल्लो मन्ता ओद माक वेहान्तोरोम।

⁹ “येसुये प्रबु आन्दुर” इन्जोर निमा आपुना टोडिते स्विकार किस परमेस्वर ओन हातोरिगाडाल असा जिवेहकितोर इन्जोर निमा आपुना मन्दिगा विस्वास किन्तोन ते निया पिसाना आयार इन्जोर परमेस्वरना पोल्लो मन्ता।

¹⁰ बाक्याकि पुरा मन्दे बोर इद विस्वास किन्तोर ओने परमेस्वर आपुना मुने येताना योग्य ठहरे किन्तोर अनि बोर अदेन आपुना टोडिते स्विकार किन्तोर ओने पिसानुर।

¹¹ “बोर आयि ओनिगा विस्वास इरानुर ते ओर बसकेय लज्जा आयोर आयनुर” इन्जोर पवित्र पुस्तकतिगा वेहिन्ता।

¹² इद पोल्लो सबोय लोकुरक साटि मन्ता यहुदि अनि यहुदि आयोर लोकुरकनिगा बोदे भेद हिले बाक्याकि सबोय लोकुरा प्रबु वरोरे मन्तोर। अनि आपुना मदत साटि ओना पोरोयते प्रार्थना किन्तोर ओरकुन प्रबु पकाय आशिरवाद हिन्तोर।

¹³ बाक्याकि “बोर आयि प्रबुना पोरोय येतानुर ओर पिसानुर” इदाम वने पवित्र पुस्तकतिगा कोटता मन्ता।

येसु मसिना बारेते सोबाता पोल्लो वेहाना जरुरि

¹⁴ मति प्रबुनिगा विस्वास केवोरक ते ओरक बदाम प्रार्थना कियानुरक? अनि ओना बारेते बसकेय केन्जोरक ते ओरक ओनिगा बदाम विस्वास इरानुर? अनि ओना बारेते बोरे वेहोर ते ओरक बदाम ओना बारेते केन्जानुरक?

¹⁵ अनि बोरे ओरा हेरे बोने लोहोर ते बदाम बोरायि हन्जुन ओरकुन प्रचार कियानुर? “येसु मसिना बारेता सोबाता पोल्लो वेहान साटि लोहतोर लोकुरा वायाना बचोन गिरदाता पोल्लो मन्ता” इन्जोर पवित्र पुस्तकतिगा कोटता मन्ता।

¹⁶ मति सबोय इस्रायेल लोकुरक येसु मसिना बारेते सोबाता पोल्लोतुन स्विकार केवोरक बाक्याकि “हे प्रबु मावा वेहता येसु मसिना बारेते सोबाता पोल्लोतिगा बोर विस्वास कितुरक?” इन्जोर परमेस्वरना पोल्लो वेहवाल यशायाह इन्तोर।

¹⁷ इन्जोर विस्वास येसु मसिना बारेते केन्जानाते उत्पन्न आन्ता अनि बोरायि मसिना बारेते वेहान्तोरक असके लोकुरक मसिना बारेता सोबाता पोल्लो केन्जान्तोरक।

¹⁸ मति बाताल ओरक इस्रायेल लोकुरक येसु मसिना बारेते सोबाता पोल्लोतुन केन्जोरक इदाम नना पुच्चेमान्तोना। ओरक जरुर केन्जतोरक बाक्याकि “ओर वेहता पोल्लो सबोय दरतितिगा प्रचार कितोर। अनि ओरा पोल्लो दुनियाता नालुंग आस बासा फयलेमाता” इन्जोर पवित्र पुस्तकतिगा कोटता मन्ता।

¹⁹ बाताल ओरक इस्रायेल लोकुरक ओद पोल्लोतुन समजेमायोर आन्दुर इन्जोर नना असा पुच्चेमान्तोना। इंगो! ओरक जरुर समजेमान्दुरक बाक्याकि “नावोर लोकुरक आयोरक ओर लोकुरा द्वारा इस्रायेल लोकुरकुन हेवा आयहिनुर अनि बोर परमेस्वरना बारेते बारायि पुनोरक ओरा द्वारा इस्रायेल लोकुरक पकाय होंग आयहिनुरक” इन्जोर मूसाना पुस्तकतिगा परमेस्वर इन्तोर।

²⁰ अनि पजा, “नाकुन पळकोर आन्दुरक ओर लोकुरकुन नना मिलेमातान; अनि नाकुन पुचेवने मायोर आन्दुरक ओर लोकुरकुन नना प्रगट कितान” इन्जोर परमेस्वरना पोल्लो वेहवाल यशायाह पकाय हिमते इन्तोर।

²¹ मति “नावा आग्यातुन मानेमायोर अनि नावा विरोद किन्तोरक ओर लोकुरकुन स्विकार कियान साटि दरोज नना आपुना कयक मुने कितान” इन्जोर इस्रायेल लोकुरा बारेते परमेस्वरना पोल्लो इन्ता।