इफिसुस 1 - Muria Far Western

पोलुसनिकेडाल धन्यवाद

¹ परमेस्वरना इच्चाते येसु मसिना खास चेला पोलुस, इफिसुसतिगा मन्वालोरक येसु मसिनिगा विस्वास किन्तोरक ओरक पवित्र लोकुरक साटि कोटिन्तोना।

² मावोर बाबो परमेस्वर अनि प्रबु येसु मसिनिकेडाल मिकुन दया अनि शान्ति पुटसोर मनि।

येसु मसिनिकेडाल मिकुन आत्मिक आशिष पुटता

³ स्वरगता सबोय प्रकारता आत्मिक आशिष मसिना द्वारा माकुन हितोर मावोर प्रबु येसु मसिनोर बाबो परमेस्वरिन धन्यवाद आयि।

⁴ अनि माक ओना मुने पवित्र अनि निरदोष मन्दान साटि दुनियाता उत्पत्ति आयानाता मुने येसु मसिना कारण माकुन मया किस आचतुर।

⁵ येसु मसिना कारण माकुन ओना मरक लेहका दत्तक कियाना साटि, ओना इच्चा अनि गिरदा अनुसार ओर माकुन पकाय पहलेय ठहरे कितुर,

⁶ ओन आपुना मायातोर मरिना द्वारा माकुन फुकोटते हिता ओना पकाय दयाता स्तुति आयि।

⁷ येसु मसिना द्वारा ओना बलिदानता कारण मावा पापताल पिसाना मन्ता मन्जे मावा अपरादता मापि मन्ता। ओद परमेस्वरना पकाय दयाता अनुसार मन्ता।

⁸ अनि ओद ओर मावा साटि सबोय ग्यान अनि समजेमायानातासंग माकुन हितुर।

⁹ परमेस्वर आपुना मन्दे इरस मता ओद रहसय योजनातुन येसु मसिना द्वारा आपुना गिरदाता अनुसार माकुन प्रगट कितुर।

¹⁰ अनि निश्चित बेरा वायार असके बारायि स्वरगतिगा अनि दरतितिगा मन्ता ओद सबोय येसु मसिना अदिकारतिगा उन्दि केविर इन्जोर परमेस्वरना इद योजना मता।

¹¹ आपुना इच्चाता अनुसार सबोय पोल्लोतुन पुरा किन्तोर ओर आपुना योजनाता अनुसार मसिनिगा माकुन पहलेटाले आचतुर।

¹² मुनेटाले मसिनिगा आशा इरस मता माक ओना पकाय हजोर महिमाता स्तुति आयान साटि इदाम कितुर।

¹³ मसिना द्वारा मिकुन वने मिया पिसाना साटिता सोबाता पोल्लो मन्जे परमेस्वरना खरोय पोल्लो निमाट केन्जुन ओनागा विस्वास किसुन,

¹⁴ परमेस्वर आपुना लोकुरा संपुर्ण पिसाना साटि मावा वारिसता बयाना मन्ता इन्जोर पवित्र आत्माता द्वारा ओर माकुन शिक्का किस मतोर। ओना महिमाता स्तुति आयि।

येसु मसि सबोयताल हजोर मन्तोर

¹⁵ इन्जोर प्रबु येसुनिगा मिया विस्वास अनि सबोय पवित्र लोकुरासंग मन्ता मिया मयाता बारेते नना वने केन्जुन,

¹⁶ ओद बेराताल नना प्रार्थनाते मिकुन आलहान्तोना अनि मिया साटि परमेस्वरिन धन्यवाद कियाना बसकेय हरचिवोन।

¹⁷ मावोर प्रबु येसु मसिना महिमातोर बाबो परमेस्वर मिकुन येसु मसिन बराबर पुन्दान साटि ग्यान अनि दिव्यदर्शनता आत्मा हेविर इन्जोर नना प्रार्थना किन्तोना।

¹⁸ अनि मिकुन ओर केयतोर असके मियागा हिता आशा बाताल मन्ता अनि ओना पवित्र लोकुरा वारिसता महिमाता धन बाताल मन्ता इन्जोर निमाट पुन्दान साटि मिया मन्दा कोन्डांग तरयिंग इन्जोर नना प्रार्थना किन्तोना।

¹⁹ अनि माक विस्वासि लोकुरक साटि बुतो किन्ता परमेस्वरना अतुलनिय रूपता लाव बचोन हजोर मन्ता इन्जोर मिकुन समजेमायाना साटि वने नना प्रार्थना किन्तोना।

²⁰ अनि ओद लाव परमेस्वर मसिनिगा किस ओन हातोरिगाडाल जिवेहकिस स्वरगतिगा आपुना तिन्दान बासा उदिहतुर,

²¹ अनि इद दुनियाते अनि वायवाल काळते वने सबोय प्रकारता राज, अदिकार, लाव, मुक्याह अनि सबोय पोरोयताल पोरो किस, परमेस्वर येसुन सबोयताल पोरो किसुन स्वरगतिगा आपुना तिन्दानबासा उपिहतुर।

²² अनि परमेस्वर सबोय पोल्लोतुन मसिना काल्कना अडिय किस ओर मसिहान मसिलोकुरा सभाता तला बनेहकितुर।

²³ अनि मसिलोकुरा सभा मसिहानोर मेन्दुल आन्दुर, अनि मसिलोकुरा सभाता द्वारा मसि सबोय लोकुरा हेरे अविन्तोर अनि ओरा सबोय पोल्लोतुन सबोय रितिते परिपूर्ण बनेहकिन्तोर।