बुतोंग 28 - Muria Far Western

समुद्र नडुमता माल्टा पोरोयता टापुतिगा पोलुस

¹ माक पिसियस समुद्र टकातिगा अवतोम असके ओद टापुता पोरोय माल्टा इन्जोर माक पुतोम।

² ओद टापुतिगा मन्वालोर लोकुरक दयाते पकाय पाहुन्चार कितुरक, बाक्याकि पिरता अनि पिनिता मोवसम मता इन्जोर ओरक किस पयटेकिस माक सबोयलोरकुन मन्दिला हितुरक।

³ पोलुस कटियांगना मोरि तचुन किसतिगा इरतुर असके उन्दि पकाय जेहेरवाला तरास किसताल पसियस ओना कयदुन कसकुन वळंगस कित।

⁴ असके अगा मन्वालोरक लोकुरक तरास ओना कयदुन कसकुन वळंगाना हुळस आपसते इतुरक: “खरोय येर मानेय हव्कवाल मन्तोर, येर समुद्रताल पिसतुर ते वने न्यायदेवता जितो मन्दिला हेवो।”

⁵ असके पोलुस तरासतुन किसतिगा झटके किसितुर अनि ओन बाराय नुकसान आयो आतु।

⁶ मति ओर तोयनुर या हुरहायने अरस हायनुर इन्जोर ओरक विचार किस पकाय बेरावनाह हुळसोर मतोरक मति ओना बाराय बिगळेमायो इन्जोर हुळतुरक असके आपुना विचार बदलेह किस इतुरक: “येर ते बोरे पेन आन्दुर।”

⁷ ओद जागाता हेरे-गुरे ओद टापुतोर मुक्याल अदिकारि पुबलियोसना डन्ड मता। ओर माकुन आपुना लोन ओस मून्ड दियांग गोतियाल लेहका पाहुणचार कितुर।

⁸ पुबलियुसनोर बाबो पिनि अनि गुला पोटा रेयाना बिमारिते मतोर। पोलुस ओना हेरे हन्जुन प्रार्थना कितुर अनि ओनागा कय इरस ओन सुदरे कितुर।

⁹ इदाम आतु असके ओद टापुतोर पिसतोर बिमार लोकुरक वने वातुरक अनि पोलुस ओरकुन वने सुदरे किसोर मतोर।

¹⁰ ओरक माकुन पकाय सम्मान हिस माकुन आदर कितुरक, अनि माक जहाजते हन्दिला साटि पसियतोम असके मावा साटि जरुरि मता सबोय चिज जहाजतिगा इरसितुरक।

पोलुस रोमि सहेरतिगा

¹¹ मून्ड महिनाना पजा पिनिमेन्ड रोमस मता उन्दि सिकन्दरिया सहेरता जहाजतिगा अन्ज माल्टा टापुताल पसियतोम। अनि ओद जहाजतिगा जेयुस पोरोयता पेनता मरकना चिन्हा मता।

¹² पजा माक सुरकुस सहेरतिगा अवतोम अगा माक मून्ड दियांग मतोम।

¹³ अगडाल माक वलियस रेगियुस सहेरतिगा वातोम, अनि उन्दि दियाता पजा दक्षिण भागता वळिय वातु इन्जोर माक दुसरो दिया पुतियुलितिगा वातोम।

¹⁴ अगा माकुन हुचुलोरक मसि तमोलोरक मिलेमास माक ओरागा सात दियांगवनाह मनकोम इन्जोर विनन्ति कितुरक। अनि पजा माक अगडाल रोमि सहेरतिके हतोम।

¹⁵ माक अगा अवतोम इन्जोर रोमि सहेरता तमोलोरक केन्जतुरक अनि ओरक अप्पियुस नगरता हाटुम अनि मून्डटावान पोरोयता नगारवनाह माकुन मिलेमायान साटि रोमि सहेरताल पसियस वातुरक, ओरकुन हुळस पोलुस परमेस्वरना धन्यवाद किस हिमत पुटतु।

¹⁶ माक रोमि सहेरतिगा अवतोम असके पोलुसिन केपसोर मतोर वरोर सयनिकनासंग बोदे लोतिगा मन्दिला परवांगि पुटतु।

रोमि सहेरता यहुदि अदिकारि लोकुरासंग पोलुस

¹⁷ मून्ड दियाना पजा पोलुस यहुदितोर मुक्याल लोकुरकुन केयतुर। अनि ओरक जमा आतुर असके ओर इतुर: “हे तमोहलोरक, नना आपुना यहुदि लोकुरा या आजि-दादि लोकुरा व्यवहारता विरोदते बाताले केवोन, ते वने हुचुलोर यहुदिलोकुरक नाकुन बन्दि बनेहकिस येरुसलेमताल रोमिलोरा कयदे सोपे कितुरक।

¹⁸ ओरक नावा चवकसि किस नावागा हायानाता योग्य बोदे दोष हिले आसि इन्जोर नाकुन तासियाना इच्चा कितुरक।

¹⁹ मति यहुदिलोकुरक इदेना विरोद कितुरक इन्जोर नाकुन आपुना लोकुरकनिगा बोदे दोष लावे कियाना हिले आसि ते वने नना हजोर राजानिके न्याय तलकिला लागतान।

²⁰ इद कारणते मिकुन मिलेमास वळकिका इन्जोर नना मिकुन केयतोना। बाक्याकि इस्रायेलना आशा मसिना विस्वासता कारणते नाकुन बन्दि बेनेहकितुरक।”

²¹ ओरक ओन इतुर: “माकुन निया बारेते यहुदिताल चिटिंग पुटोंग, अनि तमोहनिगाडाल बोरे वासुन निया बारेते बाताले दोष वेहोर अनि बाताले खराब इनोर।

²² मति इद अलग दरमता बारेते सबोय जागातिगा विरोदते लोकुरक वळकान्तोरक इन्जोर माक पुन्तोरोम इन्जोर निया विचार बाताल मन्ता अदेना बारेते माक नियाकेडाल केन्जाना इच्चा किन्तोरोम।”

²³ असके यहुदिलोकुरक उन्दि दिया ठहरे किस पकाय लोकुरक ओना लोन जमा आतुरक; अनि ओर परमेस्वरना राज्यता गवाहि हिसोर अनि मूसाना नियम अनि परमेस्वरना पोल्लो वेहवालोरा पुस्तकताल येसुना बारेते कोटतोर पोल्लो समजेह किस सकारताल नुलपेह बेरावनाह वर्णन किसोर मतोर।

²⁴ असके हुचुलोर लोकुरक ओव पोल्लोनुंग मानेमातुरक, अनि हुचुलोर लोकुरक विस्वास केवोर आतुरक।

²⁵ ओरक आपसते सहमत आयोर आस तेदचुन हन्दिला लागतुर, असके पोलुस ओरकुन उन्दि पोल्लो वेहतुर,

²⁶ “पवित्र आत्मा परमेस्वरना पोल्लो वेहवाल यशायाहना द्वारा मिवोर बाबो-दादिलोरकुन बराबर इतोर, ‘निमाट कविते केन्जकिट मति समजेमायो आयकिट, अनि कोन्डांगते हुळसोर मनकिट मति मिकुन दिसो आयार। ओरक बसकेय कोन्डाते हुळिर अनि कविते केन्जिर अनि मन्दे समजेमास पस्तेमायिर,

²⁷ अनि नना ओरकुन सुदरे किया परोन इन्जोर येर लोकुरा मन कटिन अनि ओरांग कविंग पुहतांग मन्ता; अनि ओरा कोन्डांग बन्द कितोरक इदाम ओरा हेरे हन्ज वेहा’।

²⁸ इन्जोर परमेस्वर पिसानाता इद पोल्लो यहुदि आयोर लोकुरा हेरे लोहतोर; अनि ओरक केन्जानुरक इन्जोर निमाट पुन्ट।”

²⁹ पोलुस इद इतुर असके यहुदिलोकुरक पकाय होंग किस अगडाल हतुरक।

³⁰ पोलुस पुरा रन्ड वरसांग आपुना किरायाता लोतिगा मतोर। अनि पकाय लोकुरक ओना हेरे वान्दुरक अनि ओना हेरे वातोरक सबोय लोकुरासंग ओर मिलेमासोर मतोर।

³¹ अनि पकाय हिमतते ओर परमेस्वरना राज्यता पोल्लोंग वेहचोर अनि प्रबु येसु मसिना पोल्लोंग करिहसोर मतोर। अनि बोरे ओन तकलिप केवोर आतुरक।