बुतोंग 14 - Muria Far Western

इकुनिया सहेरतिगा पोलुस अनि बरनबास

¹ इकुनिया सहेरतिगा पोलुस अनि बरनाबास यहुदिलोरा समाज मन्डलितिगा हतुरक, यहुदिलोरक अनि युनानिलोरक येर इवुरासनिगाडाल पकाय लोकुरक विस्वास कितुरक अचोन सोबाय ओरक परमेस्वरना पोल्लो वळकतुरक।

² मति विस्वास केवोरक यहुदि आयोर लोकुरक मसि विस्वासि लोकुरा विरोदते यहुदि आयोर लोकुरकुन भळकेह किस ओरा मन्दुन होंगते निहचितुरक।

³ मति ओरक पकाय दियांगवनाह अगा मन्जुन प्रबुन साटि हिमतते वेहिन्दुरक। अनि ओरा कयदे चिन्ह अनि चमत्कारता बुतोंग किहिस प्रबु येसु आपुना दयाता पोल्लोता सबुतता हिसोर मतोरक।

⁴ मति सहेरता लोकुरकनिगा फुट अरस मता, हुचुलोर लोकुरक यहुदिलोरा बासा अनि दुसरो हुचुलोर लोकुरक येसुना खास चेला लोकुरा बासा हतुरक।

⁵ मति ओरा अपमान किस ओरकुन कलदे हियान साटि यहुदि आयोर लोकुरक अनि यहुदिलोकुरक आपुना अदिकारि लोकुरासंग ओरा परके वितितुरक।

⁶ ते पोलुस अनि बरनाबास इद पोल्लोतुन पुतुरक अनि लुकावुनिया प्रदेशता लुस्त्रा अनि दिरबे सहेरतिगा अनि हेरे-गुरेटा प्रदेशतिगा वितितुरक।

⁷ अनि अगा सुसमाचार केन्जिहला लागतुरक।

लुस्त्रा अनि दिरबे सहेरतिगा

⁸ लुस्त्रातिगा काल्क कमजोर मतांग वरोर मानेय मतोर। ओर जनमताले लंगळाल मतोर, ओर बसकेय ताकोर आसि।

⁹ ओर पोलुस वळकानपा केन्जसोर मतोर। अनि पोलुस ओनाके टकलावेकिस हुळतुर; ओन बेस आयाना विस्वास मन्ता इन्जोर पोलुस हुळस ओर लंगळाल मानेयतुन,

¹⁰ “आपुना काल्कने सिदो निता” इन्जोर जोरदे इतुर; असके ओर डेयस वलियला लागतुर।

¹¹ पोलुस किता इद बुतोतुन लोकुरक हुळस लुकावुनियाता बोलिते जोरदे इतुरक, “पेन मानेयता रुपते आस मावा हेरे रयस वातोर।”

¹² ओरक बरनबासतुन जेयुस अनि पोलुसतुन मुक्या वळकवाल मतोर इन्जोर हिरमेस इदाम पोरोय इतुर।

¹³ नगरता बाहरो बनेमाता जेयुसना मन्दिरतोर वरोर याजक लुस्त्रा सहेरता दरवाज मुने कोन्दा अनि पुंगारता हार तचुन लोकुरासंग बलिदान हियाना विचार किन्दुर।

¹⁴ मति येसुना खास चेलालोरक बरनबास अनि पोलुस इद केन्जुन दुःखते आपुनांग सन्दरांग हरिहतुरक अनि ओरक लोकुरा भीळतिगा हन्जुन जोरदे इन्दिला लागतुरक:

¹⁵ “हे लोकुरक, निमाट बाताल किन्तोरिट? माक वने मिया लेहका सुख-दुःखवाले मानेय मन्तोरोम, अनि निमाट इव बेकार पोल्लोताल अलग आस स्वरग अनि दरति अनि समुद्र अनि अगा सबोय बनेहकितोर जिवित परमेस्वरनिके मलाट इन्जोर ओद सुसमाचार माक मिकुन वेहान्तोरोम।

¹⁶ होनेटा काळदे परमेस्वर सबोय जातितुन आपुना आपुना हरिते ताकिला हितुर।

¹⁷ ते वने ओर आबारताल पिरता अनि कायावाले सीजनक मिकुन हिस, जेवन अनि गिरदा हिसोर मिया मन्दुन निहचोर मतोर। इदाम परमेस्वर सोबाय पोल्लो किस आपुना बारेता गवाहि हिसोर मतोर” इन्जोर इतुर।

¹⁸ पोलुस अनि बरनाबास इदाम इन्जुन ओरा साटि लुस्त्रा सहेरता लोकुरक बलिदान केमाकिर इन्जोर पकाय तकलिपते लोकुरकुन रोके कितुरक।

¹⁹ मति अन्ताकिया अनि इकुनियाताल हुचुलोर यहुदिलोरक वास लोकुरकुन आपुना बासा कितुरक, अनि पोलुसतुन कलदे हितुरक, अनि ओर हातुर इदाम समजेमास ओन सहेरता बाहरो पिळिंगसोर ओतुरक।

²⁰ मति चेलालोरक ओना नालुंगास बासा वास नितितुरक असके ओर तेदच लुस्त्रा सहेरतिगा हतुर अनि दुसरो दिया बरनबासनासंग दिरबे सहेरतिगा हतुर।

पोलुस अनि बरनाबास पिसिदिया प्रदेशता अन्ताकियातिगा असा मलस वान्तोरक

²¹ पोलुस अनि बरनाबास दिरबे सहेरतिगा लोकुरकुन सोबाता पोल्लो वेहिच पकाय चेलाह बनेहकितुर अनि पजा ओरक लुस्त्रा सहेरतिगा मलस हतुरक। अनि लुस्त्राताल इकुनिया सहेर हन्जुन पिसिदिया प्रदेशता अन्ताकियातिगा असा मलस वातुरक।

²² “विस्वासते बनेमास मन्ट अनि माकुन पकाय तकलिप ताहच परमेस्वरना राज्यतिगा हन्दा लागार” इदाम उपदेश किस येसुना चेलालोरा मन्दुन स्थिर किसोर मतोरक।

²³ अनि पोलुस अनि बरनाबास मसिलोकुरा सबोय दल साटि मुक्याल लोकुरकुन ठहरे कितुरक, अनि उपास अनि प्रार्थनातासंग ओरक विस्वास किस मतोरक प्रबुना कयदे ओरकुन सोपे कितुरक।

सिरिया प्रदेशता अन्ताकियातिगा मलस वान्तोरक

²⁴ असके पोलुस अनि बरनाबास पिसिदिया प्रदेशताल आसोर ओरक पंफुलिया प्रदेशतिगा अवतुरक।

²⁵ पजा पिरगा सहेरतिगा येसुना सोबाता पोल्लो वेहिच समुद्र हेरेटा टका मता अत्तलिया सहेरतिगा वातुरक,

²⁶ अनि अगडाल ओरक जहाजते सिरिया प्रदेशता अन्ताकियातिगा मलस हतुरक।, ओरक पुरा कितोर ओद बुतो साटि परमेस्वरना दयातिगा ओरकुन सोपे कितोरक ओद सहेरतिगाडाले मन्ता।

²⁷ ओरक अगा अवतुरक अनि पजा मसिलोकुरा सभातुन उन्दि जागा केयस जमा कितुरक अनि परमेस्वर ओरासंगे मन्जोर बदाम हजो-हजोह बुतो किस यहुदि आयोर लोकुरक साटि विस्वासता कवाळ तरियतुर इन्जोर ओरा मुने वेहतुरक।

²⁸ अनि ओरक चेला लोकुरासंग पकाय दियांगवनाह अगा मतोरक।