२ कुरिन्थुस 10 - Muria Far Western

परमेस्वरताल पुटता पोलुसना अदिकार

¹ मियासंग मन्दानपा नम्र स्वभावतोर मन्तोर अनि मियाताल लक मन्दानपा हिमतवाले मन्तोर इन्जोर निमाट इन्तोरिट ओर नना पोलुस मसिना नम्रता अनि दयाता पोरोयते मिकुन विनन्ति किन्तोना।

² माक सन्सारतोर मानेय लेहका चाल चलन किन्तोरोम इन्जोर हुचुलोर लोकुरक समजेमान्तोरक। ओर लोकुरासंग नना हिमते वळकाना इच्चा कितोना। मिया लोकुरा हेरे वायानपा ओदे स्वभाव मिया पोरो तोहिला सन्दि आयमाकि इन्जोर नना इदाम विनन्ति किन्तोना।

³ बाक्याकि माक वने इद दुनियातिगा मन्तोरोम मति माक परमेस्वरतुन पुनोर ओर लोकुरक बोव पोल्लोंग साटि वाहचान्तोरक ओव पोल्लोंग साटि माक वाहचोम।

⁴ बाक्याकि मावा लळायिता हतयार दुनियातोर लोकुरक वापरे किन्तोर ओद हतयार आयो मति मावा विरोदि लोकुरा किल्ला लेहका मन्ता अळचनतुन नाश कियान साटि परमेस्वरताल पुटता लाव मन्ता।

⁵ इन्जोर माक परमेस्वरना ग्यानता विरोद आन्ता ओद गमन्डता सबोय पकायि हजोर पोल्लोनुंग अनि सबोय विचारतुन नाश किस मन्दा सबोय विचारतुन मसि साटि कयदि किस मसिना आग्या मानेमायवाल बने किन्तोरोम।

⁶ निमाट सबोय रितिते मसिना आग्या मानेमायिला पहाजे इन्जोर माक विचार किन्तोरोम। निमाट सबोय रितिते आग्या मानेमायकिट असके पजा बोरे मसिना आग्या मानेमायोर ते ओन दन्ड हियान साटि वने माक तयार मन्तोरोम।

⁷ निमाट आपुना कोन्डा मुनेटा खरोय पोल्लोनुंग हुळाट। नना मसिनोर आन्दान इन्जोर बोने पका विस्वास मन्ता ते ओना लेहका माक वने मसिनोर आन्दोम इन्जोर ओर पुन्दिला पहाजे।

⁸ अनि प्रबु माकुन हितोर अदिकारता बारेते नना असा बाताले हजोरपण कियाका ते नना लज्जा आयोन आयिका। बाक्याकि मिया नाश कियान साटि आयो मति मिया आत्मिक जिवन बनेहकियान साटि प्रबु माकुन अदिकार हितोर।

⁹ नना नावा पत्रते निमाट लोकुरकुन वराहान्तोना इदाम निमाट समजेमायमाट।

¹⁰ बाक्याकि “पोलुसना पत्र पकायि गंभिर अनि प्रभाव वाले मन्ता मति ओन हुळान्तोरोम असके ओर कमजोर अनि वळकाना रितितिगा बोदे लाव हिले इदाम दिसान्तोर” इन्जोर हुचुलोर विरोद केवालोर नावा बारेते वळकान्तोरक।

¹¹ माक मियागडाल लक मन्दानपा आपुना पत्रता द्वारा बाताल इन्तोरोम ओदेय पोल्लो मन्ता माक मिया संगे मन्दानपा वने किन्तोरोम इन्जोर इदाम नावा विरोद वळकवाल लोकुरक समजेमायिला पहाजे।

¹² बाक्याकि आपुनतुन पकायि महत्वतोर समजेमास हजोरपण किन्तोरक ओर लोकुरासंग आयान इच्चा या ओरासंग तुलना कियाना कोसिस वने माक केवोम मति ओरक आपुनतुन वरोन दुसरोनासंग तुलना किस आपुना मुर्खता तोहान्तोरक!

¹³ मति परमेस्वर माकुन हिता बुतोता सिवाता बाहरो माक बसकेय आपुना हजोरपण केवोम। प्रबु मियागा किता ओद बुतो वने ओद सिवाते वायार इन्जोर मियागा माक किता ओद बुतोता बारेते हजोरपण किन्तोरोम।

¹⁴ बाक्याकि माक आपुना सिवाता बाहरो आपुनतुन विळहाना इच्चा केवोम। माक मिया हेरे वायोम आस मनेरोम ते माक मावा बारेते पकायि हजोरपण वेहच मनेरोम। मति माक मसिना सोबाता पोल्लो वेहचुन मिया हेरे वातोम।

¹⁵ अनि माक आपुना बुतोता सिवाते आपुना हजोरपण कियाकोम। मति दुसरोना मेहनता कायांग आपुना लेहका पयस अदेना पोरो हजोरपण केवोम। बदाम मिया विस्वास विळसोर दायार अदेना द्वारा मिया नडुम माक कियालातोम ओद बुतो वने मिया मदते असा वने विळसोर दाकोम इन्जोर माक आशा किन्तोरोम।

¹⁶ असके माक दुसरो लोकुरक सेवा किता ओद प्रदेशतिगा दुसरो लोकुरक किता सेवाता बारेते माक हजोरपण कियाना विचार केवोर आस मिया सहेरता बाहरो दुसरो प्रदेशतिगा येसुना सोबाता पोल्लो वेहाना इच्चा किन्तोरोम।

¹⁷ मति “हजोरपण केवालोरक प्रबुनिगा हजोरपण किम्ट।”

¹⁸ बाक्याकि आपुना हजोरपण किन्तोर ओर आयो मति प्रबु बोना हजोरपण किन्तोर ओरे परमेस्वरना येताना योग्य मन्तोर।