१ युहनाल 1 - Muria Far Western

जिवनता पोल्लो

¹ सबोय बनेमायानाता मुने जिवन हेवाल पोल्लो मता, ओद जिवन हेवाल पोल्लोतुन माक केन्जतोम अनि ओदेन माक आपुना कोन्डाते हुळस ओदेन मावांग कयकने इटस बेस हुळतोम इन्जोर ओद जिवन हेवाल पोल्लोता बारेते माक मिकुन कोटान्तोरोम।

² इद जिवन हेवाल पोल्लो प्रगट आत; अनि माक ओदेन हुळतोम अनि ओद मिकुन अनन्त जिवन हिन्ता। अनि बाबोनासंग मता मावागा प्रगट आत ओद जिवन हेवाल पोल्लोता बारेते माक मिकुन वेहान्तोरोम।

³ बाताल आयि माक हुळतोम अनि केन्जान्तोरोम ओदेना बारेते माक मिकुन वने वेहतोम बाक्याकि निमाट वने मावासंग संगवारि आम्ट। अनि मावा संबन्दते बाबोना अनि ओनोर मरि येसु मसिना संग मन्ता।

⁴ अनि मावा गिरदा पुरा आयान साटि माक इद पोल्लो मिकुन कोटान्तोरोम।

निमाट वेळिचितिगा हन्दाना

⁵ अनि परमेस्वर ज्योति आन्दुर अनि ओनागा बाराय आन्दार हिले। इद पोल्लो माक येसु मसिनिकेडाल केन्जतोम अनि मिया साटि इद पोल्लो माक वेहिन्तोरोम।

⁶ अनि ओनासंग मावा सहभागतिगा मन्ता इन्जोर माक इन्दिला आतोरोम अनि पजा दरोज गलति किस अन्दकारतिगा हन्दानुरक ते माक खोटाल मन्तोरोम अनि खरोयता अनुसार जिवेमायोम।

⁷ मति बदाम परमेस्वर वेळिचितिगा मन्तोर अदामे माक वने वेळिचितिगा ताकिकाट ते वरोर दुसरोनसंग संबन्द मन्ता अनि ओनोर मरि येसुना नतुर माकुन सबोय पापताल शुद्ध किन्ता।

⁸ अनि माक मावागा बाताले पाप हिले इदाम इन्दाकाट ते आपुनतुन दोखा हिन्तोरोम अनि मावागा बाताले खरोय हिले।

⁹ अनि माक आपुना पापतुन कबुलकियाकाट ते ओर मावा पापतुन मापि कियानुर अनि माकुन सबोय खराब बुतोंगताल शुद्ध कियान साटि ओर विस्वासयोग्य अनि दरमि मन्तोर।

¹⁰ अनि माक पाप केवोम इन्जोर इन्काट ते माक परमेस्वरतुन खोटाल बनेकिन्तोरोम अनि परमेस्वर मावा बारेते बाताल वेहतुर अदेना विरोद किन्तोरोम।