१ कुरिन्थुस 7 - Muria Far Western

मरमिंगना बारेता उपदेश

¹ निमाट मिया पत्रते “वरोर मानेय परमेस्वरना गिरदा कियान साटि मरमिंग केवाय मन्दाना सोबाय मन्ता” इन्जोर कोटस नाकुन पुच्चेमाता ओद प्रश्नतुन नना इदेक उत्तर हियाका।

² पकाय लोकुरक व्यभिचार कियिला आतोर इद कारणते वरोर वरोर मानेयतुन ओना उन्दि मुत्ते मन्दिला पहाजे। अनि उन्दि उन्दि आळदुन अदेनोर वरोर मुजो मन्दिला पहाजे इन्जोर नना मिकुन वेहान्तोना।

³ मुजो आपुना मुत्तेन साटि बाताल बाताल पोल्लोंग कियाला पहाजे ओद पुरा अदेन साटि कियाला पहाजे। अनि मुत्ते आपुना मुजोना साटि बाताल बाताल पोल्लोंग कियाला पहाजे ओद सबोय आपुना मुजो साटि कियाला पहाजे।

⁴ मुत्तेन आपुना मेन्दुल पोरो अदिकार हिले मति अदेना मेन्दुल पोरोता अदिकार आपुना मुजोन मन्ता। इदे रितिते मुजोना वने आपुना मेन्दुल पोरो अदिकार हिले मति मुजोना मेन्दुल पोरो आपुना मुत्तेना अदिकार मन्ता।

⁵ निमाट आळिवुर वरोर दुसरोताल अलग मनमाट। हुडुक बेरावनाह वरोर दुसरोना परवांगिते प्रार्थना कियान साटि अलग आतेक बाराय आयो। मति निमाट मिया मन्दुन नियत्रणते इरवि आयकिट इद कारणते सयतान मिया परिक्षा केमाकिर इन्जोर प्रार्थना आतपा निमाट असा मिलेमास संग मन्ट।

⁶ अनि नना वेहिला आतोना इद पोल्लो परवांगि आन्दु मति आग्या आयो।

⁷ सबोय मानेयक नावा लेहका मन्दिला पहाजे इदाम नावा इच्चा मन्ता। मति परमेस्वर वरोन वरोन अलग अलग रितिते जिवन ताकहाना वरदान हितोर। बोने मरमिंग केवाय जिवन ताकहाना वरदान हितोर अनि दुसरो बोने मरमिंग किस जिवन ताकहाना वरदान हितोर।

⁸ मति आपुना मुत्ते हातेक असा मरमिंग केवोर मानेयकुन अनि रान्डिह आळदुन नना इन्तोना निमाट नावा लेहका मरमिंग केवाय मन्दाना ओरकुन सोबाय आयार।

⁹ मति ओरक मन्दुन नियत्रणते इरिला परोर ते ओरक मरमिंग केविरक। मरमिंग कियाना पकाय इच्चातासंग मन्दानाताल ओरकुन मरमिंग कियाना सोबाय मन्ता।

¹⁰ मरमिंग कितोर ओरकुन नावा आयो मति प्रबु आग्या हिन्तोर: मुत्ते आपुना मुजोनताल बसकेय अलग आयमाकि।

¹¹ अनि मुत्ते अलग आयार ते अदेन दुसरो मरमिंग केवायि मन्दिला पहाजे या आपुना मुजोनसंग असा मिलेमायिला पाहाजे, मुजो वने आपुना मुत्तेन बसकेय तासिमाकिर।

मरमिंगना बारेते विस्वासि लोकुरक साटि पोलुसना व्यक्तिगत सल्ला

¹² अनि दुसरो लोकुरकुन प्रबुना आग्या आयो मति ननाय वेहान्तोना: वरोर विस्वासि तमोना मुत्ते विस्वासि हिले ते ओद आपुना मुजोनासंग मन्दान साटि तयार मन्दार ते ओर मुजो आपुना मुत्तेन बसकेय तासिमाकिर।

¹³ अनि बोदे मुत्तेन वरोर अविस्वासि मुजो मन्तोर ते ओन आपुना मुतेसंग जिवेमायाना इच्चा मन्ता ते ओद आपुना मुजोन बसकेय तासिमाकि।

¹⁴ बाक्याकि मसिनिगा विस्वास केवोर ओर मुजो आपुना मुत्तेना कारणते परमेस्वरना येताना योग्य बनेमायनुर। अदामे अविस्वासि मुत्ते आपुना विस्वासि मुजोना कारणते परेमेस्वरता मुने येताना योग्य बनेमायार। आयोते मिया बालक परमेस्वरना मुने येताना योग्य आयो आकिट। मति इदेक ते मिया बालक परमेस्वरना मुने येताना योग्य मन्तोरक।

¹⁵ मति मसिनिगा विस्वास केवोर बोरे मानेय आपुना मुतेताल अलग आयनुर ते ओन अलग आयिला हिम्ट। इदाम परिस्थितिते बोरे मसि तमो या मसि हेलान आपुना अविस्वासि मुजो या मुतेनसंग मन्दिला पहाजे इदाम जबरदस्ति हिले। मति मुत्ते अनि मुजो मिलेमास शान्तिते मन्दान साटि परमेस्वर माकुन केयतुर।

¹⁶ इन्जोर हे विस्वासि मुत्ते, निमा निया मुजोन पापता दन्डताल पिसिहानाता कारण आयिकि इदाम बाताल पुनवि बहे? अनि हे विस्वासि तमो, निमा निया मुत्तेन अदेना पापता दन्डताल पिसहानाता कारण आयकि इदाम बाताल निमा पुनवि बहे?

परमेस्वरना केयानाता अनुसार निमाट जिवेमाम्ट

¹⁷ मति प्रबु येसु मसि माक लोकुरकनिकेडाल वरोर वरोरतुन अलग अलग परिस्थितिते आपुना पोरो विस्वास किस जिवन जिवेमायान साटि आचतुर इन्जोर वरोर वरोन मुने बोद परिस्थितिते केयस मतोर ओदे परिस्थितिते मन्ज जिवन जिवेमाम्ट। अनि इदाम नना मसिलोकुरा सभाता सबोय विस्वासि लोकुरकुन इद आग्या करहान्तोना।

¹⁸ वरोर मानेयतुन परमेस्वर आचतोर असके ओना कतना मुने आता ते ओर अदामे मन्दिला पहाजे। अनि वरोर मानेय कतना आयवाय परमेस्वर आचतुर ते ओर कतना केमाकिर।

¹⁹ कतना कियाना या कतना कियाना आयो इदेना बाताले महत्वता हिले मति परमेस्वरना आग्यातुन मानेमायानाय महत्वता मन्ता।

²⁰ परमेस्वर सबोय मानेयकुन आचतोर असके ओर बोद परिस्थितिते मन्जोर मतोर ओर ओदे परिस्थितिते मनिर।

²¹ निकुन परमेस्वर आचतपा निमा वरोर गुलाम मन्तोन ते निमा इदेना बारेते दुःख केमा। मति निक स्वतंन्र आयाना सन्दि पुटि ते ओद सन्दितुन सोबाय उपयोग किम।

²² बाक्याकि प्रबु आचतोर असके वरोर मानेय गुलामि मन्तोर ते ओर खरोय प्रबुना स्वतन्त्र मानेय मन्तोर। अदामे प्रबु आचतोर असके ओर स्वतन्त्र मानेय मन्तोर ते ओर खरोय मसिना गुलाम मन्तोर।

²³ परमेस्वर मिकुन पकाय किमत हिस असतोर ओद कारणते निमाट बोरे मानेयकना गुलाम बनेमायमाट।

²⁴ इन्जोर प्रिय बायि-दादालोरक परमेस्वर मिकुन वरोन वरोन केयान बेरा बोद परिस्थितिते मन्जोर मतोरिट ओदे परिस्थितिते परमेस्वरना मुने मन्ट।

मरमिंग केवोरक ओर लोकुरा बारेते पोलुसना सल्ला

²⁵ “मरमिंग केवोर आस मन्तोरक लोकुरा” बारेते निमाट पत्रतिगा कोटस पुच्चेमाता ओद प्रश्नता बारेते प्रबुनिकेडाल नाकुन बोदे आग्या पुटो, मति इमानदार मानेय लेहका मन्दान साटि प्रबु नाकुन दया कितुर इन्जोर नावा विचार मिकुन वेहान्तोना।

²⁶ इदेक इद दुनियातिगा विस्वासि लोकुरकुन पकायि तकलिप आयिला आता इद कारणते निमाट इदेक मन्दाना ओदे परिस्थितिते मन्दाना सोबाय मन्ता इदाम नावा विचार मन्ता।

²⁷ मिया मरमिंग आतुंग ते निमाट मुत्तेन तासियाना विचार केमाट। मिकुन मुत्ते हिले ते मरमिंग कियाना इच्चा केमाट।

²⁸ मति निमाट मरमिंग कियाकिट ते अद बोदे पाप हिले। इदाम मरमिंग केवाय मन्तांग कुवारि लयाह मरमिंग किन्तांग अद वने सोबाय मन्ता अव बोदे पाप केवोंग। मति इद बेरा मरमिंग कितोरक ओर लोकुरा दरोजता जिवनते तकलिप आन्ता अनि निमाट इद रितिता तकलिपताल पिस मन्ट इन्जोर नावा इच्चा मन्ता।

²⁹ हे बायि-दादालोरक, इद दुनियातिगा मावा साटि पकाय कमि बेरा मन्ता। इन्जोर नना इदाम वेहान्तोना: मन्जे माक केवल आपुना मुत्ते अनि आपुना लोतोरा बारेते पकाय चिन्ता किस प्रबुन साटि सोबाय बुतो कियान साटि पुटता सन्दितुन उपयोग केवोर आस मनमाकिर इन्जोर मुत्ते मन्वाल मानेय ओन मुत्ते हिलेर मानेय लेहका मन्दिला पहाजे।

³⁰ अनि किलवाल मानेय किलवाप लेहका मन्दिला पहाजे, गिरदा केवाल मानेय गिरदा केवोर मानेय लेहका मन्दिला पहाजे अनि किमत हिस अस ततवाल मानेय बाराय असोन इदाम समजेमास मन्दिला पहाजे।

³¹ अनि इद दुनियाता चिजतुन उपयोग किस अदेना बारेते पकायि चिन्ता केवाल मानेय ओद चिजतुन सबोय बेरा उपयोग केवोर लेहका समजेमास मन्दिला पहाजे, बाक्याकि इद दुनियाता रिति अनि व्यवहार दरोज साटि आयो मति ओद मारिला आता।

³² इन्जोर निमाट बोदे पोल्लोता बारेते चिन्ता केवाय मन्दिला पहाजे इदाम नना इच्चा किन्तोना। बोना मरमिंग आयोंग ओर प्रबुन बदाम गिरदा कियाका इदाम विचार किस प्रबुना पोल्लोता चिन्ता किसोर मन्तोरक।

³³ मति बोना मरमिंग आता ओर मानेय आपुना मुत्तेन बदाम गिरदा कियाका इदाम विचार किस सन्सारता पोल्लोता बारेते चिन्ता किसोर मन्तोर।

³⁴ बोना मरमिंग आता ओर मानेयना विचार रन्ड बासा मन्ता। ओना विचार उन्दि प्रबुनिके अनि उन्दि मुतेनिके मन्ता। इदामे बोदेना मरमिंग आयो ओद आळ या कुवारि नावा मेन्दुल अनि आत्मा पवित्र मन्दान साटि प्रबुना कयदे हियाका इदाम प्रबुना बारेता चिन्ताते मन्ता। मति मरमिंग आता आळ सन्सारता पोल्लोता चिन्ताते मन्ता बाक्याकि नना बदाम आपुना मुजोन गिरदा कियाका इदाम ओद विचार किन्ता।

³⁵ नना इद पोल्लो मिया स्वतन्त्रतुन बन्दन कियान साटि आयो मति निमाट सोबाय अनि सबोय मन्दे अनि जिवा लावेकिस प्रबुना सेवा किसोर मन्ट इन्जोर मिया भलायि साटि वेहान्तोना।

आपुना पेकिहना मरमिंग कियाना या कियाना आयो इदेना बारेते पोलुसना सल्ला

³⁶ अनि इदेक मियागा “मरमिंग आयोंग पेकिहना” बारेते निमाट पत्रते कोटस पुच्चेमातोरिट अदेना बारेते नावा विचार इदाम मन्ता: वरोर बाबोन उन्दि पेडि मन्ता अनि अदेना हेयना मंगळिंग आत। अनि अदेना बाबाल अदेना मरमिंग केवोर। अनि पजा ओर आपुना पेडिना मरमिंग कियाना वय पकाय आयिला आता मति नना अदेना मरमिंग कियाना बारेते बाताले विचार केवोन इदाम अदेना बाबो चिन्ता किन्तोर ते ओना पेडिना मरमिंग आयिला पहाजे। इद पोल्लोतिगा बोदे पाप हिले।

³⁷ मति वरोर मानेय दुसरोना जबरदस्तिते आयो मति आपुना मन्दे पका किस आपुना पेडिना मरमिंग केवोर आयनुर ते सोबाय मन्ता। पजा ओन आपुना इच्चा लेहका कियाना अदिकार मन्ता। अनि ओर ओना पेडि मरमिंग केमाकि इन्जोर आपुना मन पका कियानुर ते ओर परमेस्वरना मुने सोबाय कियाला आतोर।

³⁸ इन्जोर आपुना पेडिना मरमिंग किहिवाल सोबाय कियाला आतोर अनि बोर आपुना पेडिना मरमिंग किहिवोर ओर इदेनताल वने सोबाय कियाला आतोरक।

रान्डि आसकना बारेते

³⁹ अनि बोदे आळ आपुना मुजो जितो मन्तोर अचोवनाह ओनासंग जुळेमास मन्ता। मति पजा अदेना मुजो हातुर ते बोनायसंग मरमिंग किया परान्ता मति प्रबुना विस्वासते बोर मन्तोर ओनायसंग मरमिंग कियाला पहाजे।

⁴⁰ ओद आळ मरमिंग केवो आयार ते पकाय सोबाय मन्ता इन्जोर नावा विचार मन्ता। अनि परमेस्वरना आत्मा नावा लोपाडाल इदाम वळकिन्तोर इदाम नना समजेमान्तोना।