Roma 6 - AI VOLA TABU

Era sa sega ni valavala ca tiko ko ira na tamata era sa veivinakati tale kei na Kalou; eda sa via muri koya ga e na vuku ni nona loloma vei keda, 1-23.

¹ A CAVA me da qai kaya? eda na valavala ca tiko li, me tubu vakalevu kina na loloma?

² E segai sara. Oi keda sa mate ki nai valavala ca, eda na valavala vakakina vakaevei?

³ Dou sa sega beka ni kila, ni koi keda kece sa papitaisotaki vei Jisu Karisito, eda sa papitaisotaki ki na nona mate?

⁴ O koya eda sa bulu vata kaya kina, ni da sa papitaisotaki ki na nona mate: me vaka ni sa vakaturi cake tale mai na mate ko Karisito e na kaukauwa nei Tamana, me da valavala vaka talega kina e na bula vou.

⁵ Ia kevaka eda sa tei vata me da vakataki koya e na nona mate, eda na vakataka talega e na tu cake tale mai:

⁶ ni da sa kila o qo, ni rau sa lauvako vata kaya ki na kauveilatai na noda tamata makawa, me takali kina na yago ni valavala ca, me da kakua tale ni qarava nai valavala ca.

⁷ Ni sa sereki mai nai valavala ca ko koya sa mate tu.

⁸ Ia kevaka eda sa mate vata kei Karisito, eda vakadinata ni da na bula vata kaya talega:

⁹ ni da sa kila ni na sega ni mate tale ko Karisito, o koya sa vakaturi cake tale mai na mate; sa sega tale ni veitaliataki koya na mate.

¹⁰ Ni sa mate ko koya, sa mate vakadua e na vuku ni valavala ca; ia na bula vua na Kalou na nona bula.

¹¹ Mo dou vaka talega kina ni dou sa vakasami kemudou ni dou sa mate sara ki nai valavala ca, ka bula vua na Kalou e na vuku i Jisu Karisito na noda Turaga.

¹² O koya me qai kakua ni gumatua nai valavala ca e na yagomudou sa mate rawa, mo dou muria na kena gadreva ca.

¹³ Kakua talega ni solia na veitikimudou ki nai valavala ca me caka kina na ka ca: dou soli kemudou ga vua na Kalou, me vaka dou sa bula mai na mate, kei na veitikimudou vua na Kalou me caka kina na ka e dodonu.

¹⁴ Ni na sega ni veitaliataki kemudou nai valavala ca: ni dou sa sega ni lewai e na vunau, e na loloma ga.

¹⁵ Ia ka vakaevei? me da valavala ca tiko li, ni da sa sega ni lewai e na vunau, e na loloma ga? E segai sara.

¹⁶ Dou sa sega beka ni kila, o koya yadua dou sa soli kemudou me nona tamata mo dou talairawarawa vua, dou sa nona tamata ga dou sa talairawarawa kina; se ki na caka cala mo dou mate kina, se ki na caka dodonu mo dou vakadonui kina?

¹⁷ Ia me ia na vakavinavinaka vua na Kalou, ni dou sa muria, mai na vu ni yalomudou, koi kemudou kai talatala ni valavala ca, nai vakarau ni vakavuvuli dou sa vakatavulici kina.

¹⁸ Ia ni dou sa qai sereki mai nai valavala ca, dou sa yaco mei talatala ni valavala dodonu.

¹⁹ Au sa vosa me vaka na tamata, e na vuku ni sa malumalumu na yagomudou: ia me vaka dou a solia eliu na veitikimudou me ra qarava na ka dukadukali, kei nai valavala ca me levu kina na ca; mo dou qai solia vakakina na veitikimudou me ra qarava na ka dodonu me caka kina na ka savasava.

²⁰ Ni dou a bobula tiko ki nai valavala ca, dou a yawa tu ki nai valavala dodonu.

²¹ Ia ka cava na vua dou sa rawata, e na gauna ko ya, mai na veika dou sa qai madua kina? ni sa kenai otioti ni veika o qori na mate.

²² Ia ni dou sa qai sereki mai nai valavala ca, ka yaco me tamata ni Kalou, dou sa qai rawata na vua e nai valavala savasava; kei nai otioti, na bula tawa mudu.

²³ Ni sa kenai sau ni valavala ca na mate: ia sai solisoli walega ni Kalou na bula tawa mudu, e na vuku i Jisu Karisito na noda Turaga.