Roma 16 - AI VOLA TABU

Sa tukuni ira e so na tamata lotu dina ko Paula, 1-16. Sa cavu na loloma, 17-24. Sa tinia na nonai vola, 25-27.

¹ IA kaʼu sa vosavakavinakataki Fipi na ganeda, o koya sa vada ni vavakoso lewe ni soro mai Kenikiria:

² mo dou vakacegui koya e na vuku ni Turaga, me vaka sa kilikili kei ira era sa lotu, ka mo dou vukei koya e na cakacaka kecega dou na yaga kina vua: ni sa nodrai vukevuke na lewe vuqa ko koya, kei na noqu talega.

³ Me cavu mada na loloma vei rau ko Pirisila kei Akuila, koi rau sa cakacaka vata kei au e na veika i Karisito Jisu: (

⁴ a rau sa virikotora na domodrau meʼu bula kina: keitou sa vakavinavinaka kina vei rau, keitou kei ira kece na veivavakoso lewe ni soro vei ira na veimatanitu:)

⁵ vei ira talega nai vavakoso lewe ni soro e na nodrau vale. Me cavu mada na loloma vei Epinito, na tamata kaʼu sa daulomana, o koya nai sevu mai Akaia vei Karisito.

⁶ Me cavu mada na loloma vei Meri, o koya sa daucakacaka vakalevu e na vuku i keitou.

⁷ Me cavu mada na loloma vei Adroniko kei Junia, na wekaqu, keitou a vesu vata kei rau, a rau sa rogo vei iratou nai apositolo, erau sa nei Karisito eliu, au sa muri koi au.

⁸ Me cavu mada na loloma vei Abilia, o koya kaʼu sa daulomana e na vuku ni Turaga.

⁹ Me cavu mada na loloma vei Uripenu, o koya sa dau vukei keitou e na cakacaka i Karisito, kei Siteki, o koya kaʼu sa daulomana.

¹⁰ Me cavu mada na loloma vei Apeli sa dauvinakati e na veika i Karisito. Me cavu mada na loloma vei ira na mataqali i Arisitopulo.

¹¹ Me cavu mada na loloma vei Irotioni na wekaqu. Me cavu mada na loloma vei ira na mataqali i Narikiso, era sa nona ga na Turaga.

¹² Me cavu mada na loloma vei Taraifina kei Tirifosa, erau daucakacaka e na veika ni Turaga. Me cavu mada na loloma vei Perisi sa daulomani, o koya sa daucakacaka vakalevu e na veika ni Turaga.

¹³ Me cavu mada na loloma vei Rufu o koya sa digitaki me nona na Turaga, kei na tinana sa noqu talega.

¹⁴ Me cavu mada na loloma vei Asinikirito, ko Filekoni, ko Elima, ko Patiropa, ko Erimi, kei ira na veiwekani sa tiko vata kei iratou.

¹⁵ Me cavu mada na loloma vei Filoloko, kei Julia, kei Niriu, kei na ganena, kei Olimipa, kei ira kecega era sa lotu, era sa tiko vata kei iratou.

¹⁶ Dou ia na loloma vakai kemudou e na veireguci e na yalosavasava. Sa loloma yani vei kemudou ko ira na nona veivavakoso lewe ni soro ko Karisito.

¹⁷ Ia kaʼu sa vakamasuti kemudou, na veiwekani, mo dou kilai ira era sa vakatekivuna na veisei kei na veika e dauveitara-betaki, sa sega ni vaka nai vakavuvuli dou sa vakatavulici kina; ia kakua ni veiriti kei ira.

¹⁸ O ira era sa vakaoqo, era sa sega ni qarava na noda Turaga ko Jisu Karisito, na ketedra ga; ia e na vosa vinaka kei na loloma vakailasu, era sa lawakitaka na lomadra era sa wele.

¹⁹ Ni sa kuruvaki ki na tamata kecega na nomudou talairawarawa. O koya o qo kaʼu sa reki kina e na vukumudou: ia sa yaloqu ga mo dou vuku e na ka vinaka, mo dou kakua talega ni cala e na ka ca.

²⁰ Ia na Kalou ni veivakacegui ena butuki Satani vakusarawa e ruku ni yavamudou. Me tiko vei kemudou na loloma ni noda Turaga ko Jisu Karisito. Emeni.

²¹ Sa loloma yani vei kemudou ko Timoci na noqui tokani, kei Lusiu, kei Jesoni, kei Sosipatiro, ko iratou na wekaqu.

²² Oi au ko Teritiu, ka vola nai vola o qo, au sa loloma yani vei kemudou e na Turaga.

²³ Sa loloma yani vei kemudou ko Keio, o koya kaʼu sa dautiko e nona vale, kei ira kecega nai vavakoso lewe ni soro. O Erasito na mata-ni-vanua ni koro o qo sa loloma yani vei kemudou, kei Kuaritu a wekada.

²⁴ Me tiko vei kemudou kecega na loloma ni noda Turaga ko Jisu Karisito. Emeni.

²⁵ Ia vei koya sa kaukauwa me vakataudeitaki kemudou me vaka na noqui tukutuku-vinaka, kei na vunautaki Jisu Karisito, me vaka ni sa qai vakatakila mai na ka vuni, sa vuni tu mai na gauna makawa,

²⁶ ia ka sa qai vakaraitaki mai, ka sa vakatakilai e na nodrai vola na parofita, me vaka na vosa ni Kalou tawa mudu, ki na veivanua kecega me ra vakabauta ka talairawarawa kina:

²⁷ io, vua na Kalou sa vuku duaduaga, me ia na vakarokoroko e na yaca i Jisu Karisito, ka tawa mudu. Emeni.