Roma 12 - AI VOLA TABU

Sa vakatavulici ko ira na tamata lotu me ra soli ira vua na Kalou, 1-2. Me ra yalomalumalumu ka gumatua me kitaka na nodrai tavi, 3-8. Me ra veilomani sara vakai ira, me ra lomani ira talega na tamata kecega, 9-21.

¹ O KOYA o qo, au sa vakamamasu vei kemudou, na veiwekani, e na vuku ni loloma vakavuqa ni Kalou, mo dou solia na yagomudou mei madrali bula, me savasava, me vinaka vua na Kalou, me nomudoui soro vakayalo.

² Ia dou kakua ni vakatauvatani kemudou kei ira era sa vakavuravura: ia dou mataliataki ga ni sa vakavoui na yalomudou, mo dou kila rawa kina na veitalia ni Kalou, a ya sa yaga, ka vinaka, ka dodonu sara.

³ Ia me vaka na loloma walega sa soli mai vei au, au sa kaya kina vei ira yadua na tamata vei kemudou, me kakua e dua me dokai koya me vaka sa sega ni dodonu me dokai koya; me yalomatua ga na nona nanuma, me vaka nai vakarau ni vakabauta sa vota ko na Kalou vei ira yadua.

⁴ Me vaka ni sa dua bauga na yagoda, ka vuqa na tikida, ia ka sa sega ni vakaitavi vata na tikida kecega;

⁵ sa vakakina koi keda, na lewe vuqa, eda sa yago vata e na vuku Karisito, eda sa veitikina vata talega vakai keda.

⁶ Ni da sa dui rawata na veisolisoli tani me vaka na loloma walega sa soli vei keda: kevaka sa vosa e na Yalo, me vaka nai vakarau ni vakabauta;

⁷ se na dauveivota, me ia na veivota; sei koya sa dauvakatavuvuli, me vakavuvuli tiko;

⁸ sei koya sa dauvunau, me vunau tiko; o koya sa ia na dausolisoli, me dina na lomana; o koya sa ia na daulewa, me gumatua kina; o koya sa ia na dauloloma, me marau na lomana.

⁹ Me kakua ni vakailasu na loloma. Mo dou cata sara na ka ca; mo dou kabita sara na ka vinaka.

¹⁰ Dou veilomani sara e na veilomani ni veitacini; dou veiuasiviti e na veivakarokorokotaki:

¹¹ e na gumatua mo dou kakua ni vucesa mai: me katakata na yalomudou; mo dou qarava na Turaga;

¹² dou reki e nai nuinui; vosota na ka rarawa; ia tikoga na masu:

¹³ veivotayaka vei ira na dravudravua era sa lotu; vakasaqara me daukaroni ira na vulagi.

¹⁴ Dou vosavakalougatataki ira era sa vakacacani kemudou: vosavakalougatataka ga, ka kakua ni rukaka.

¹⁵ Dou reki vata kei ira era sa reki, ka tagi vata kei ira era sa tagi.

¹⁶ Dou lomavata tiko vakai kemudou. Kakua ni nanuma na veika vakaturaga, ia mo dou veiriti kei ira na kaisi. Dou kakua ni vakasami kemudou ni dou sa vuku.

¹⁷ Kakua ni veisausaumitaka na nona ca e dua. Nakita eliu na veika sa dodonu e na matadra na tamata kecega.

¹⁸ Kevaka sa rawa, mo dou vakatovolea me veilomani kei ira na tamata kecega.

¹⁹ Oi kemudou sa lomani, dou kakua ni saumi kemudou, ia mo dou vakaberaberataka ga na cudru; ni sa volai, A noqui tavi na cudru; au na sauma koi au, sa kaya na Turaga.

²⁰ O koya mo qai vakania na nomu meca, kevaka sa viakana; kevaka sa viagunu, mo vagunuvi koya: ni ko na binia na qilaiso sa waqa tu ki na uluna, e na nomu kitaka na ka o qo.

²¹ Me kakua ni rawai iko na ca, mo rawa ga na ca e na vinaka.