Osea 14 - AI VOLA TABU

Ai vakaro me veivutuni, 1-3. A vosa ni yalayala vei ira sa veivutuni, 4-9.

¹ MO lesu, Isireli, vei Jiova na nomu Kalou; ni ko sa bale e na nomu caka cala.

² Kauta kei kemudou e so na vosa, ka lesu vei Jiova: kaya vua, Kauta tani kece na neitou caka cala, ka yalovinaka mai vei keitou: keitou na qai cabora nai madrali ni tebenigusu i keitou.

³ O Asiria, ena tawa vakabulai keitou; na ose, keitou na sega ni vodoka: ia keitou na tawa kaya tale, Na neitou kalou, ki na cakacaka ni liga i keitou: ni sai iko sa lomani koya na luveniyali.

⁴ Au na vakamavotaka na nodra dauvuki, au na lomani ira walega: ni sa lesu tani vua na noqu cudru.

⁵ Au na vaka na tegu vei Isireli: ena tubu ko koya me vaka na viavia, ka ti na wakana me vakai Lipanoni.

⁶ Ena tete yani na kena tubu-coke, ena vaka na olive na kena matavinaka, ia na kena boi vinaka ena vakai Lipanoni.

⁷ Era na lesu mai era tiko e na yaloyalona, era na bula tale me vaka na sila, ka tubu me vaka na vaini: a kedrai rogo ena vaka na waini ni Lipanoni.

⁸ O Ifireimi, ena kaya, Me yaga tale vakacava vei au na matakau? oi au kaʼu sa rogoca, ia kaʼu na vakaraici koya: au sa vaka na paini bulabula. Sa vu vei au na vuamu sa qai kune.

⁹ O cei sa vuku, ena vakasamataka na veika o qo? ka yalomatua, ena kila na veika o qo? ni sa dodonu na sala i Jiova, o ira talega na yalododonu era na muria: ia ko ira na talaidredre era na bale ga kina.